حبيت اشكر بيزنس وومن .. على موضوعها هذا اللي شجع الكثير ..
و اعرض تجربتي ..
انا قدمت لصندوق المئويه عن طريق موقعهم في الانترنت ..
و صلتني رساله بعد ايام ان لازم اسوي دراسة الجدوى .. في البداية خفت ما تضبط معاي
فكلمت مكتب مختص في عمل دراسة الجدوى ..
قال انه راح يسوي لي الدراسه و يسعى في ايصال الاوراق و متابعتها في صندوق المئويه حتى الموافقه بـ 21000 ريال .. طبعا المبلغ كبير .. فأستعنت بالله و سويت الدراسه بنفسي .. بعد ايام وصلتني رساله للاتصال بهم علشان المقابله الشخصيه .

بعد الاتصال اكتشفت ان المقابله بتكون في الرياض و انا من سكان الدمام ..
بسبب ظروفي ما رحت المقابله و اتصلت عليهم في اليوم المقرر للقاء و اعتذرت منهم
قالت لي اللي كلمتني ان ممكن تأجلي الموعد .. قلت لها ما راح اقدر ..
قالت لي هذا يعتبر انسحاب لك و احنا سجلنا انسحابك .. صراحه الكلمه هذي اثرت فيني كثير .

طبعا سويت مناحه و دموع حسيت ان حلمي اللي حلمت به تدمر بعد ما كان قريب مني
مرت ايام و نسيت الموضوع لكن مفاجئه لي ان بعد اسبوعين رجعوا اتصلوا فيني
وقالوا يبون يحددون لقاء ثاني لي .. طبعا استشرت بعض اللي اثق فيهم و منهم بيزنس وومن ( فديتها )

لقيت ان الجميع يشجعوني اني اروح للمقابله الشخصيه و فعلاً اخذت اجازه من وظيفتي ولميت اوراقي المطلوبه .. طلعت من الدمام الاربعاء الساعه 2 منتصف الليل و صلت الرياض الساعه 6:30 صباحاً
غسلت وجهي في محطة النقل الجماعي و شربت بايسن

الصراحه اني كنت تعبانه لدرجة الموت الساعه 8 طلعت من الانتظار في النقل الجماعي و رحت الى مقر صندوق المئويه دخلت و لقيت بنات ماشاء الله اخلاق .. الكل مبتسم و يبشرك بالخير .. جلست في الانتظار و شوي عطوني اوراق اعبيها .. اقل من ربع ساعه دخلت في مكتب فيه ثنتين مثل العسل .. وحده عدلت معاي دراسة الجدوى و كانت صراحة قمه في الذوق و الباقه طرحت علي افكار و اشياء ممكن نضيفها للمشروع .. و نبهتني لبعض الامور .. بعد ما انتهينا ..
كانت المقابله الثانيه سألتني فيها عن امور شخصيه مثل بعد تخرجي من الثانويه وش سويت الى اليوم ..

انتهيت من اللقاء بعد ما رشقوني بدعوات التوفيق طلعت من عندهم على النقل الجماعي و اخذت اقرب رحله كانت الساعه 10:30 و رجعت الدمام في انتظار اتصالهم .

رغم التعب اللي كان فيني الا اني قدرت اتغلب عليه شوي و دخلت المقابله و طلعت من عندهم و انا مليانه دموع من الارهاق اللي فيني ..
الحين انا اتمنى ان يتم قبول المشروع و متحمسه كثير .. لكن لو ما انقبل فما راح احزن ابداً لاني جربت شيء جديد و تعلمت اشياء في هذه الرحله ..

طبعا في حال ما انقبل مشروعي انا ناويه اقدم على جهات ثانيه نفس المشروع
المفروض ان الانسان ما يتملكه اليائس .. و يكون ذو اصرار و يحاول قد ما يقدر انه يتجاوز الحلم للحقيقه .




بالتوفيق للجميع