يبــــدو والله العالم ان المدارس الاهليه والمعلمين السعوديين لها حكايات على غرار الف ليله وليله !

بندخل في زبدة الموضوع وقشطته وكل شيء فيه .


قبل سنوات قدمت على مدرسه اهليه في شرق الرياض وكانت ناشره اعلاناتها في الرياض والجزيره وحتى المسائيه في ذلك الوقت


المهم اتصلت عليهم واخذت الوصف وقالوا جب كل الاوراق المطلوبه وحددوا موعد بعد المغرب

المهم زبطت حالي وتطيبت وكشخت ومن زود الحرصه قبل المغرب بنصف ساعه وانا جمب المدرسه

صليت المغرب انا ومجموعه من الاخوه الذين مثل حالي (( الله يرحم الحال ويرحم مزنه ))

المهم الطعنا (( للي مافهم الكلمه - طنشونا -)) الى قبيل العشاء المهم كنا حوالي 13 الى 15 شخص مختلفي التخصصات اللي فيهم دين واللي فيهم عربي وتاريخ

المهم وكيل المدرسه كان فلسطيني وقال بسوي مقابلات شخصيه لكل تخصص

وبحكم ان تخصصي كان المطلوب فيه ثلاثه وحنا ثلاثه قال تفضلوا على بال ما يجي مدرسين اخرين في التخصصات الاخرى .

دخلنا المكتب وجلسنا قام يطالع في الشهادات

ثم التفت لي وقال شوفوا يا اخوان أحنا بنخليكم توقعوا على عقد براتب 2800ريال كذا لكن في الواقع ما راح نعطيكم الا 1300 ريال ؟؟؟؟

وفيه دوام يوم الخميس من اجل الانشطه !!!

المهم التفت على زملائي الاثنين اللي معي وطلعوا شقرديه !!! قلت تبون الوضع هذا قالوا لا

فقلت له غير الكلام هذا !!!!


قال اذا تبغى الله والنبي محييك واذا ماتبغى غيرك بيقبل الوضع !!!

المهم طلبت منه الملفات وفتحت الباب وقلت للشباب اللي برا بالموضوع قالوا معصي

المهم حصل بينا وبينه شد

تطور الوضع الى ضربه في المكتب انا والشعب العربي المفلس المنتف!!

والبطاله يا اخوان شينه المهم


هجينا (( للي عندهم تأتأه يعني هربنا ))

وركب معي مجموعه ما كان عندهم سيارات على ابو عزيز (( تدليع للددسن العراوي )

وصارت بيني وبين الاخوان صداقه مستمره الى اليوم هذا .


والى حلقه اخرى من مواقفي مع الاهليات


ملاحظه حقوق النسخه محفوظه لدائرة المعارف البريطانيه