كان ياما كان ..! والنسيان للعشّاق بـاب
................ عاشق ٍ لاشدّ درفة باب .. صاح بلا شعور

يقدر النسيان ينزع غصن من فوق التراب
................ بس مايقدر يقـرّب للتراب وللجـذور

كيف أبنسى ذكريات الطيش الأول .. والشباب
................ ورفقة الليل العتيقه .. وأول الفجر الطهور

والمواعيد وشغبها .. والوله قبل العتاب
................ وساعة ٍ كم كنت أحاول في عقاربها تـدور

والمكان اللي وهن سقفه من الفرقا وشاب
................ من بعـد ماكان يحضّنا مثل طفل ٍ غـيور

والمطر لا لوّن الشارع .. وقلنا للسحاب :
................ بللّ أيدينا .. ترى العشّاق أياديهم زهور

كيف أبنسى والرياض لسيرتي مثل الكتاب !
................ حافظتني بيت بيت .. و حي حي .. و دوُر دوُر

من كثر ماكنت أدوّر في شوارعهـا جـواب
................ هو صحيح الحب أعمى ! أو عيون الناس عور ؟!

كنت أشوف الحب عذب .. وهـم يشوفونه عذاب !
................ كان هذا الحب سر ! .. وقلته وكلي سرور

علمّوني في المدينه كيف لاحبيت أهاب
................ لكن القريه قمرها قال : كُن للحب نور

في بلادي كنت عاشق .. بس شاعر بإغتراب !
................ لين صرت الشاعر اللي تعشقه كل البحور

علمّيني يالقصايد هو خطأ وإلا صواب ؟!
................ لارفضت أنسى عيون ٍ عشتها شعر وشعور

هذا أنا لحالي .. هزيل الحال .. وأشعر بإكتئاب
................ كن قلبي جال بحر ٍ هاجرت عنه الطيور

أجرع الفرقا وأقول الحب عذب .. وللعذاب
................ كل قلب ٍ لاحرمه الوقت من خلّه .. يبور

ولين هذا اليوم أدوّر في المدينه عن جواب
................ ليه في شرعك .. يكون "الحب معنى للفجور" .؟
منقـــول