ارجو تثبيته للفائده
تجارة في نظرهم شطاره
الأجانب لايحتقرون أي عمل
مادام يدخل لهم مكسب وأرباح :
@ الذين يجمعون الجديد أي نوع , حتى البراميل الفاضية والمطعوجة , حتى الشينكوات التي ترمى في نفايات ومحرقة البلدية ..
المطلوب فقط سيارة دنه + نفس طويل ..
أحد الوافدين مكسبه يوميا لا يقل عن 300 ريال ..
بعدين الحديد ياخذه مجانا من الشوارع ومحارق البلديات ويباع والسوق زين جدا وغير مكلف ..
@ عمال بلديات لا يدعون علب البيبسي والسفن وغيرها يجمعونها في خياش شعير حتى تكون حمولة سيارة دنه ..
وكذلك الجرايد والكراتين الممزقة والاقمشة الممزقة ثم يبيعوها وتدخل لهم مكسب لا باس به وما خسروا من جيوبهم شيء بل يجدون من يساعدهم ,, الله يرزقهم .. جد ونشاط ..
@ في أسواق الخضرة الكرتون الفاضي الصغير بريالين والكبير بخمسة وكلها مجمعة من عند المحلات ,, أكلف ما عليه يروح في الددسن أو الدنه للمحلات والسوبر ماركات أو براميل البلدية ويجمع من هذ الكراتين ,, هذا كرتون موية , وذا كرتون حفايظ أو شنبوات أو مطهرات أو كراتين حليب مجفف .. المهم يجمع له كم كرتون ويجلس عند سوق الخضار ورزقه يجي له .. والرازق في السماء والحاسد في الارض ..
@نفايات الاسلاك والكيابل واستخلاص النحاس منها فيه رزق ,, لكن سمعنا بظاهرة سرق الكيابل من البيوت الجديدة والمحلات .. وهذا كسب محرم لا نريده ..
@ أشوف بعض العمال الوافدين بدأوا يدخلون معارض السيارات والنقل الثقيل ويشترون ويبيعون بمكاسب لا بأس بها مثل سيارات قديمه أو حراثات ويحاولون تصديرها لبلدانهم , ويذكرون فيها مكاسب مغرية ..
@ بعض الوافدين والذين يعملون في حراجات المزاد شرق الرياض وغيره يحجز عدة سيارات في المعرض ويوقفون المزاد ثم يأتي المواطن فيجد المزاد متوقف , فيقول الوافد ( وهو بالطبع موظف عند صاحب المزاد ) فيقول اختر اللي تبي وانا ابيعك اياها ,, فعندما تقع رغبتك على سيارة يقول راعيها حادها بمثلا 19000 ريال والنقل والتأمين 800ريال وعمولة المكتب 1000 ريال .
وعند الكتابه ياخذ منك ألف ريال ويضعها في الدرج وياخذ منك 198000 قيمة السيارة والنقل والتأمين .. ولا يسجل في الايصال إلا مبلغ 19000 ريال فقط .. ليه ؟؟ يقول عمولتنا والتأمين ما تسجل في الوصل ..
وافهموها !!
يعني الألف في جيب الوافد , والسيارة ملك المعرض له 19000 ألف ..
والسؤال هل صاحب المزاد يعلم ؟
أو اخدمني وسو اللي تبي ؟؟
الله المستعان
في هذ الحالة المتضرر المواطن فقططط ..
@ بطاريات السيارات التالفة تباع الواحدة منها بعشرة ريالا ,, والجميع يرمونها في الزباله وغيرنا يجمعونها ..
@ علب الحبر حبر الطابعة نرميه وغيرنا يشترها العلبه بخمسة ريالات ويقوم بتعبئتها بعشرة ريالات تقريبا ويبعها علينا بثلاثين ريال .. الله يرزقهم .
@ يا زين مشروع التمر خذ ( من أو منين أو أكثر فله ) من القصيم أو الاحساء ونظفها وعطها مكبس راعيه ثقة لا يسرقها ويعطيك بداله شين ..
ثم وزعها على من تعرف من أصحاب المحلات وحط عليها استيكر تمر أو فلان ورقم جوالك
وإذا جاز للمشتري سوف يتصل بك ويحجز للسنه الجايه وتكون كونت لك زباين ..
@ سوق الغنم مهوب شين المظارية فيها أحسن من الاسهم اشتر بنقص خمسين ريال وبع بمكسب خمسين ريال ويارب لك الحمد ,,
تبي واحد يقوم مبكر ويعرف الاسنان والدفيع والحيل والمتابيع ..
واللي يقتنص التيوس بسعر رخيص ويبيع على اهل المطاعم ومطابخ المندي يبشر بمكاسب خيالية ...
@ احذر تربي جمال واسأل مجرب تاكل ولا منها مكاسب حاشي في السنه تبيعه بعد سنه بالف وخمسمية وغلى امه ماكله خلال سنه الحمال وسنة الرضاع عشرة أضعاف قيمة الحاشي ..
وبصراحة اللي يربون الجمال يربونها هوايه فقط مولعين فيها وغلا خساره في خسارة ..
@ لو كان معك ددسن حوض وجلست في سوق خضار لتوصيل مقاضي المشترين لوجدت فيها خير كثير..
قولوا ماشاء الله ( واحد يقول بلسانه وأنا اسمع .. دخلت قيمة سيارتي النيسان ابوغمارتين ثلاث مرات ما شاء الله )
المطلوب : قم مبكر + خلك وسيع بال .. وابشر بالخير ..
@إشتر فان هونداي تسعة ركاب أو 14 راكب ..واتفق مع 6 مدرسات أو أكثر نقل داخل الرياض بـ500ريال لكل واحدة في الشهر ..
أو إلى مدارس خارج الرياض بـ 1000ريال واحمد ربك على النعمة ..
المطلوب : ملصق فيه كنيتك أبوفلان + رقم جوالك + فان بالتقسيط + نوم مبكر واستيقاظ مبكر
علشان ما تنعس في الطريق وتقضي على حياتهن ..
والله يرزقك ويستر عليك ..
@لماذا المجازر الملاحم في يد الوافدين .. مهوب عيب ..
@لماذا لا نجد خبازا سعوديا .. مهوب عيب ..
@لما لا نجد حلاق سعودي .. مع ان السوق زين ..
@ الخياطين ليه اجاني ولا نجد سعوديين ..
لماذ نعيب على من يقوم بها من السعوديين
مع أننا نجد من السعوديين حمانا الله واياكم من يتاجر بالمحرمات
مخدرات - دخان - مجلات تحمل صور عارية - محلات فيديو تروج مسلسلات فاسدة - محلات ستريو غناء ورقص محرم - وغيرها ......
اللهم اكفنا بحلالك عن حرامك وبفضلك عمن سواك
التواصي بالخير مطلوب والنصيحة لكل مسلم
جمعنا الله وغياكم في مستقر رحمته ..
اخوكم في الله
منقــــــــــــــــــــــــــــــول للفائدة
