الشغل مو عيب العيب انك تاخذ مصروفك من ابوك وانت تقدر تشتغل
حتى لو ما لقيت عمل بشهادتك
انا عندي ثانوية عامة ودبلوم تجاري وعندي دورات في الإدارة والضيافة
تخصص فنادق اول ما استغلت بالثانوية والدبلوم سنة 1993 في فندق
كانت وظيفتي حمال شنط كل يوم كرف 12 ساعة براتب 1200 ريال وغير
الهنود والبنغال ما يرحموك كل تفكيرهم انك جاي تاخذ مكانه واحنا لازم ناخذ مكانهم
بعد حمال شنط ترقيت الى منظف غرف وحمامات عزك الله وحصلت على زيادة بعد
سنة وثمانية شهور 35 ريال وانبسطت فيها بعدها انتقلت للمطبخ تقطيع بصل وبطاط
كل يوم اخلص دوامي الساعة ست المغرب طبعا من الست الى الست الدوام
وعشان الراتب ما يكفي وانا اكبر اخواني والوالد راتبه ضعيف اطريت اغسل سيارات
بعد الدوام من الست لين الساعة 11 بالليل بعدها ترقيت وصرت جرسون في مطعم الفندق
وصار راتبي 1500 ريال بغيت انهبل طفرة في الراتب المهم ما ابي اطول عليكم
لفيت اقسام الفندق كله لين وصلت الى الأستقبال وصرت مسئول الاستقبال
بعدها طلعت واشتغلت في فندق ثاني بالراتب اللي حددته انا وطلعت من عندهم ورحت
غيره برضو براتب انا اللي احدده لين وصلت الى الشركة الحالية براتب جامعي
ما يحصل مثله ولله الحمد خبرة اكثر من 14 سنة ومتقدم في عملي
واسف على الأطالة بس حبيت اقول لكم
الشغل مو عيب
ولا انتظر في البيت لين اقدر احصل لي عمل بشهادتي او تخصصي
تحياتي
علي الربح