السلام عليكم ورحمة الله وبركاته
آقبلت لي .. مثلـك مثـل أي مخلـوق
ما بينـي وبينـك .. عهـود ومواثيـق
آقبلت : ( غيم ٍ في مقاديمـه بـروق ) !
وراه سـر .. وفـي خفايـاه : تشويـق
جيت بـ/ شموخ اللي من الناس مرموق
لكن عجزت آلقى لـ.. جيّتك تعليـق !
وفجأه ؟ بديت أشتاق وآحـن وأتـوق
وأغفى على وسادة ملامحـك .. وأفيـق
تهب ريح , و ( قدّ طاريـك ) ممشـوق
وآلمح تفاصيل ٍ على جسمـه .. تليـق
مدري هي الصدفه تسوق القدم سـوق
والا أنهـا ( أقـدار المحبـه ) توافـيـق
بس الاكيد : أمسيت وأصبحت مسروق
أثر الذهب .. مـا تحتميـه الصناديـق
خلاص ما أنت بـ.. صورة ٍ تسكن الموق
نزلت مع موقـي .. وجيـت المعاليـق
وطار آلك قلب ٍ عنك ما عايقه عـوق
فكيته .. وفكيـت معـه : المسابيـق !
خذ راحتك .. لا صرت للروح معشوق
تقدر تعدّي كـل الأضـلاع .. وتويـق
من قال ماللشعر في وصفـك حقـوق ؟
ونظرة عيونـك .. تستثيـر الطورايـق
إن ما تغنّت فيك طـاروق / طـاروق
ماني لـ.. أميرة قصر الابـداع عشّيـق
الحب مثل المسك : رغبة هـل الـذوق
إن طال عمره .. عتّق الشـوق تعتيـق
نفس الحياه اللي ملت شـارع السـوق
الفوضويه منك .. مـن غيـر تنسيـق
لكـن هـدوءك .. مـا يخلينـي آروق
مثل الهوى الساكن بـ/ روس الشواهيق
فرحت لأني كنت مانـي بـ( مسبـوق
عليك ) وأنت أقصى طموح العشاشيـق
وبعد بزغ نجم الرحيـل .. ولمـع فـوق
بداء المكان يضيق , ويضيـق , ويضيـق
الحلم : مظلـوم ٍ .. للإعـدام مسيـوق
ماهو بـ/ لا فاسق .. ولاهو بـ/ زنديق
لو مات في حبل المقاديـر .. مشنـوق
يبقى غرامك .. شامـخ ٍ كنـه طويـق
وتبقى حضاراته .. وهـي دمّ وعـروق
أشبه ما أشبهها .. حضـارات الأغريـق
مثّلت لي بسمه .. ولا قلـت منطـوق
هنا ؟ تحمّلت الألـم فـوق مـا أطيـق
ودعتني حسـره .. وودعتنـي شـوق
وكنك معك .. خذيت كـل المخاليـق
ماني مصدّق .. كل مطـرود : ملحـوق
وأنت السراب وعاشقك ناشف الريـق