وقفت ف الاطلال من دافع الشوق
لمصافحة ذكرى الليال الخوالي
راح النظر يجري على الارض من فوق
ينقلي الواقع ويرثي لحالي
القاع ماكنه وطاء فيه مخلوق
بان{ن}على اطرافه سخيف الرمالي
والذاكره تنفك صندوق صندوق
ترسم ملامح ماضيات الليالي
اغيب معها فكر لحظات وافوق
مدري وش الي في مكاني جرالي
احيان كني داخلن ساحة السوق
واسمع صدى صوت الاوادم قبالي
واحيان اركّزوقضب الارض واتوق
والقشعريره وقتها راس مالي
وحشة خلا شي موكد وموثوق
اشوفها ماهوب علمن يقالي
لابوك دنيا لاحلاوه ولا ذوق
من يوم راحوا متعبين الدلالي
ريف الضيوف الي لمن ضدهم عوق
صلفين الاريا محتمين التولي
خلوا لنا الدنيا بها الطاق مطبوق
وباقي رسومن ماحياتن بوالي
اخذت مع ذكرى المطاليق طاروق
والمنظر يجاوب بليا سوالي
من موقفي صديت من غيرمنطوق
{وصفقت بالكف اليمين الشمالي}
عيني درج ما ها على الخد من فوق
ارخصت دمعي بعد ماكان غالي