لانـي حزيـنٍ ولامسـرور بالمـره
الوضع هادي لوانك ناوي ازعاجـه
ولاني من اللي جنون البهرجه غـره
لاشفت كـلٍ يلـوذ بعالـي ابراجـه
ولاادري عن البال من زاره ومن مره
لو ان اسمك ورسمـك تـم ادراجـه
حبر القلـم للـورق بالله مـن جـره
يوم الاحاسيـس ماتحتـاج ديباجـه
بيحت سر القصيد ولافضـح سـره
مات اعذب اللي كتبته داخل ادراجـه
والهاجس اللي سماه امطر على بـره
كم ليلةٍ في نحرهـا يقـدح اسراجـه
حبيسـة البعـد والاحـزان ياحـره
من كثر ماحتاج لك ماعادلي حاجـه
من فضل حبك ومن خيره ومن شره
جرحٍ زبن وسط قلبي صعبٍ اخراجه
عقب استدارة همومي جـات مفتـره
كني على جال بحرٍ تصفـق امواجـه
تفتق الصدر مـن همـي وانـا ازره
في معمعة نـاس شماتـه وهراجـه
لااقبل بوجهٍ عبـوسٍ قلـت اباسـره
تركت له ضحكةٍ في عقدة احجاجـه
مافات لو اجمعـه ثـم ارجـع اثـره
يضيع في زحمـة التيـار وامواجـه
ومن برني في وصالـه لازم ابـره
له مني ابقى علـى عهـده ومنهاجـه
وان كان في الدرب مشوارٍ لنا جـره
يـومٍ يجيبـك لـزومٍ فيـه نتواجـه
ناديت باسمـك ليالينـا وكـم مـره
صوتٍ سمعته عليـه عـوّد ادراجـه
من ذّوق الوقت طعـم ايامنـا المُـره
واللي عجزنا نطيقه كيـف نحتاجـه