خلوني ارقى ف السمـا بارايلـي
والقى وسيلة الاتصـال الهايلـي
اللـي تقولـه شَرِكـات التقنيـه
في هرجها المعسول والمتحايلـي
ياربعنـا تعاونـوا فـي نهبـنـا
ياشركـة الجـوال والموبايـلـي
هذا المواطـن جـوّدوه بفطحتـه
لايفوتكم هـذا السميـن الحايلـي
كلٍ يعشّي فـي جنوبـه ينهشـه
القلب مفضوخٍ وحجمـه عايلـي
باقـي مكانيـنٍ علـى فقـارتـه
تلقونها خلـف السنـام المايلـي
اقضوا عليه وريحوه مـن الشقـا
لاتطاولونـه بالطويـل الطايـلـي
ياكم وطاه من الخسايـر والعنـا
من سوق الاسهم يوم جا متهايلي
ومساهماتٍ في الهوى راحت سوا
طاروا بهـا لاكـن مانـي قايلـي
خلّو حياة النـاس قـاعٍ صفصفـا
ماعاد تلقى في الوجيـه سمايلـي
وتجارنـا فـي حقنـا ماقصّـروا
مـن حبهـم فينـا لقينـا مايلـي
اركـوا علينـا ميسـمٍ ماينطفـي
احر من صالـي لهيـب القايلـي
كلٍ علينـا قـام يرفـع سلعتـه
ويقول ماجا في طرف مخباي لـي
والبدو جاهم حقهـم فـي برّهـم
الشـاه تبكـي والبعيـر يخايلـي
يشكون حـر الجـوع والله ربهـم
يالله دخيلـك مـن نعيـمٍ زايلـي
شيٍ ذكرته يوم جا فـي خاطـري
من بعض الاشيا اللي تعبي فايلـي
والناس مثلي يشتكون من الغـلا
هوايـل العالـم مثـل هوايـلـي
اكتب رسايل في هموم المجتمـع
وهذي رساله من بَعَض رسايلـي
وان كانها ماجت على حسب الطلب
خلونـي احـوّل واجيـب ارايلـي