اقبلت ياوجه الغلا.. حيّ هالزول
زول ٍ تغيب عباد ربّي ليا غاب
تطلع طلوع سهيل من حول لا حول
وتشّخص لك عيون .. وتلافت لك أرقاب
ومن يوم جيت الله وكيلك على طول
سلامك عتاب !! وسواليفك عتاب !!
طوّل علي بالك عسا عمرك يطول
ماكل موقف تنشرح فيه الاسباب
عطني يدينك وأنثر الليل مجدول
خلّه يطير أسراب .. ويعوّد أسراب
وأضحك وفرّق جمرتينك عن اللول
بفتح لك سموعي قبل ما افتح الباب
خمر الكلام اللي من شفاك معسول
أبيه يدرج في عروقي وينساب
سوالفك فيها من السحر مفعول
تأثيرها على الجوارح والاعصاب
بأملا عيوني من تهاياك وأقول :
ياوجه صبح ٍ لبّس الليل جلباب
عذر القصيد إليا قصر عنك مقبول
أوصافك أكبر من مدى شعر وإعجاب
عودك معزّل ومتنهّض ومفتول
اليا تعدّل رمح واليا انحنى داب
ومعنّقك فارع و زامي ومنتول
وصدرك جمع مالذ كلّه وماطاب
وسودك طلايع قوم وسيوف وخيول
خيّالها يارد على الموت ماهاب
ايّوه من صحوة هدبها ويحّول
وإن سلّهمت ( هذا بلا ابوك ياعقاب )
قريب لكنّك بعيدٍ عن النول
واحر كبدي حرّة الظن لاخاب
من لا جمع راسك براسه على طول
والا يقضّي تالي العمر عزّاب
مطلق بن شويه ...
وبس ...