يافاتـنـه ياساحـره يافريـده
من عاد قدش هيه من عاد قدش
ياغـاويـه ياجافيـه ياعـنيـده
ياقصر مسيارش وياطول صدش
ياصاهرة قطب الشمال وجليده
ويامخجلة شمس الضواحي بــ خدش
ياريسة بنك الجمال ورصيده
ياكثر تسليفش وياقل مـدش
ماتنطقين الا بجمله مفيده
وماتسكتين الا على برد كبدش
حواجبش شطرين بيت القصيده
شطر على ايده وشطر على ادش
عنقش مثل عنق الغزال الشريده
وعينش عليها ملحمة فعل جدش
ياوحدةً ملتـزمـة بالعـقـيـده
ولا طربت مع الاغاني على الدش
حجزتي ورحتي برحله اكيده
وليتش خذيتيني مع اطراف شدش
لكن على اية حال رحله سعيده
يمكن مع غربتش يزداد ودش
لو ان دمي محترق في وريده
ولو باح سدي بيح الله سدش
عسى حمام الشوق ياصل بريده
واذا وصل ثم راح ماشاف ردش
باطوي مسافات الغرام البعيده
الين اوقف بالمراكيب عندش
سيده انا والشوق والحب سيده
من وين ماهبت نسانيس بردش
والا وصلتش بالجروح العتيده
افضمديها من مزاهير وردش
وانا ترى عندي قصيده جديده
قصيدةً مكتوبةً فيش وحدش
باكتب على يدش بيوت القصيده
وان كان ماكفت مسامات يدش
بـعيني اقـريـهـا قــرايـة جريده
والا اسمعيها يالغلا...ويش ودش؟؟؟
الشاعر علي بن عبيد بن فجيحه