وعليكم السلام ورحمة الله وبركاته

شوف يا صاحبي ودي أنصحك بكذا نصيحة و بعد كذا الموضوع راجع لك إنت
لكن فكر بكل كلمة أقولها لك ok

طبعاً مثل ما نعرف إن الزواج قسمه و نصيب و غلطك إنك تواصلت معها قبل الزواج أو قبل ما تملك عليها و هنا صار خطأ مثل ما تخبر إن هذا ما يجوز و كلنا نعرف هالشيء .. صحيح إنك تحبها و هي تحبك وهذا هو واقعكم الآن صح ولا لأ ؟ شوف الحين إنت كيف حالتك و هي كيف حالتها قلق مستمر و خوف من بكرا و خوف إنها تروح عنك .. لنفرض إنها ماهي من نصيبك !! وش راح تسوي ؟ راح تبكي ؟ ولا راح تضارب اللي تقدم لها ؟ ولا راح تعمل في روحك شيء ؟ فكر يا صاحبي ... أعذرني أخوي تحمل كلامي

إنت جاوبت نفسك بنفسك يا صاحبي و قلت البنت تحبك و إنت تحبها و هي تعرف عنك كل شيء و أختك الواسطه و الواصله بينكم صح ؟
خلاص وش المشكلة ؟ إذا كنت تبغى تعرف أخبارها أعرفها عن طريق أختك المصون و خبرها عن كل شيء و عن كل خطوه و نصيحتي بعد كلم الوالده في البدايه عن الموضوع و إنك تبغى تتزوجها هي بالذات و شوف وش تقول لك الوالده عسى ربي يحفظها لك و بعد كذا لازم الخبر يوصل للوالد الله يكسبك رضاه و بعد كذا عائلة البنت تعرف ...

ولا تنسى الله عز و جل و لا تنسى صلاة الإستخارة يمكن هالبنت ما تكون من نصيبك و ممكن إنت ما تصلح لها و ممكن هي اللي ما تصلح لك ... يا صاحبي الحب غير و الزواج غير
من وجهة نظري الحب ما يجي إلا بعد الزواج لأن كثير اللي حبو قبل الزواج و بعد الزواج مهاوشات و خصام و من ثم الطلاق لكن أسأل الله تعالى إن وضعكم ما يكون كذا عسى ربي يوفقكم و يستر عليكم ... آمين
الله يجعلها من نصيبك و يجعلك الزوج الصالح لها و يجعلها الزوجة الصالحة لك ... آمين

يقول الله تعالى في كتابه الكريم : { وَأَنكِحُوا الْأَيَامَى مِنكُمْ وَالصَّالِحِينَ مِنْ عِبَادِكُمْ وَإِمَائِكُمْ إِن يَكُونُوا فُقَرَاء يُغْنِهِمُ اللَّهُ مِن فَضْلِهِ وَاللَّهُ وَاسِعٌ عَلِيمٌ }النور32 توكل على الله و تقدم ولا تروح عليك البنت اللي قلبك يرغبها طالما إنك تبغى الستر و تبغى الحلال قال تعالى : { وَشَاوِرْهُمْ فِي الأَمْرِ فَإِذَا عَزَمْتَ فَتَوَكَّلْ عَلَى اللّهِ إِنَّ اللّهَ يُحِبُّ الْمُتَوَكِّلِينَ }آل عمران159
و الحمدلله إنك موظف الحين قال صلى الله عليه و سلم : (( ثلاثة حق على الله أن يغنيهم المكاتب الذي يريد الأداء والناكح يريد العفاف والمجاهد في سبيل الله ))
الراوي: أبو هريرة المحدث: ابن العربي - المصدر: عارضة الأحوذي - الصفحة أو الرقم: 3/5
خلاصة حكم المحدث: صحيح
و قدم هنا و هناك و أطلب من والديك يدعون لك عسى الله يكسبك رضاهم و الله عز و جل راح يوفقك إن شاء الله

المهم طالما إنك رجال و تشتغل توكل على الله و تقدم و الله يكتبها لك من نصيبك

ولا تجلس كذا حيران و مشتت الفكر


و الله تعالى أعلم