السلام عليكم .. ياجماعة الخير .. بالله أفيدوني .. وبالعقل ( بدون عاطفه ) .. !!

أنـا أتوظفت الحمدلله في خدمة عملاء ( كول سنتر ) ..

وفي رمضان بأكمّل سنه إن ششاء الله .. لكن ورب البيت خلاص .. جاتني حاله نفسيه .. من ثالث شهر في الوظيفه وأنـا مستحمل وأقول أمسك الوظيفه أحسن من العطاله .. والآن أنـا في الشهر العاشر تقريبا ..

أول كان مسكّتني إنه الراتب مع البونس .. ممكن يوصل إلى 5 آلاف وشويه .. يعني الراتب يسكّت .. لكن الآن أتغير نظام البونس .. وصاروا يطلّعوا للواحد أي شي عشان ما ياخذ البونس .. وأنـا صار راتبي أغلب الأشهر ينزل 3700 بدون أي بونس ..

هذا غير طبيعة العمل المقرفه اللي كل يوم بتتكلم مع أكثر من 100 عميل .. وتلاقي منهم العبيط والمهايطي وقليل الأدب .. وأنواع القرف .. !

وغير دوام الشفتات اللي يخليك مقلوب فوق تحت ولا لك نظام محدد تمشي عليه !!
وغير إنه مقر العمل بعيد عنّي وكل يوم أضرب مشوار في زحمة الخط السريع وأنـا من النوع العصبي والمتهور .. وكل يوم وأنـا رايح الدوام .. أكون معرّض لخطر الحادث .. بسبب عصبيّتي والزحمه .. !!

وغير إسلوب المشرف حقي اللي زي الزفت .. ويعتمد على إسلوب التهزيء قدام الناس .. وأنـا أضطر أمسك نفسي لأنه لو خربتها معاه بيستقعدلي على أي شي ويعطيني إنذارات إلين ما يطردني !

والله مابقي أي شي إيجابي في وظيفتي .. وقلت بما إنه الراتب أصلا 3 وشويه !!!
ليش ما أريّح في بيتي أحسن لي وآخذ 2000 من حافز إلى ما ألقى وظيفه ثانيه زي الناس !!!؟
وأصلا كذا ولا كذا أنـا مخطط إن ششاء الله أطلع أدرس برّا بإذن الله لو ربّي سهّلها .. !!

إنتوا إيش رايكم في الموضوع .. والله كنت منسدح من الساعه 7ولا جاني نوم من كثر التفكير .. وأضطرّيت أقوم الآن ( الساعه 10 إلا ربع ) أكتب الموضوع لعل وعسى أرتاح وألقى أحد يفهمني !!

ودوامي الساعه 2 الظهر .. واليوم جمعه .. وأنـا مواصل ومو جايّني نوم !! الله يعين بس !!!

باللللللللله أعذروني على الإطاله .. والله في قلبي كبت وقهر وأضطرّيت أفضفض !!!