بسم الله
الحلقة 3
من الاشياء اللي تعين المسلم على تقوى الله في الصين
اعرف لا مو تعرف لا زم تؤمن بمعية الله ايش يعني معية الله يعني ( ان الله معك ) الله في السعودية هو الله في الصين
لاتطلب مترجمة (( حرمة )) انحش منها مثل ماتنحاش من الاسد ليش ..... طبعاً المسلمين في الصين احسبهم والله حسيبهم من احسن الناس خلقاً وادباً واحتراماً النساء محجبات ولا احلى ( طبعاً الشعب الصيني محترمين محد يكلمك ابد كل واحد في حاله ) لكن انت رجل وهي حرمة وانت ملازم لها في كل مكان من الصباح للمساء ( لا تقول انا مسلم ) احذر الجميع اطلب مترجم اسلم لك . لازم تتغدون ولازم تشربون شاي وقهوة واحياناً كثيره زحمة ............. انحش اسلم لدينك .
عود عيونك على الفخوذ البيض اللي تقول مراية واجعل الله امام عينيك ( يعينك ) الشعب كله مفصخ فخوذ في كل مكان الجو عندهم حار ورطوبه وفتن في كل مكان صينيين وغربيين وروس ويا قلب لا تحزن .
انصح الجميع اشتر جهاز mb3 يجي على شكل طوق شعر من الاذن اليمين الى الاذن اليسار حمل فيه قرآن وامش مع الناس واتق الله ويا بلاش بسعر 10 ريال وموجود في كل مكان .
النساء في الصين هم كل شيء الرجال مالهم كرت .
طبعاً بالنسبة للفلوس
انصح الجميع اذا بتسافر مثلي لا تاخذ معك الا دولار فقط من البنك واحرص على الجديد وتكون مرقمة متسلسلة احسن لك لانهم في الصين ما يتعاملون الا يعملتهم اليوان فقط هو نفسه ( الريممبي ) تغير مسميات فقط
طبعاً تذهب مع المترجم الى مكان يجتمع فيه تجار شنطة في الشارع تصرف وانت واقف والمترجم يعرف يميز بين الاصلي والمزور وانت ( ياغافل لك الله ) ما تدري وش يقولون لكن الي يهمك السعر
طريقة الحساب
الدولار x سعر الصرف = يوان
يعني
100 دولار x سعر الصرف 6.29 = 629 ريممبي او يوان
اذا تبغى تعرف كم يساوي سعودي
629 ريممبي / تقسيم 6.29 x ضرب 3.75 = 375 ريال
هذه الطريقة لاي مبلغ يواجهك مثال
1500 يوان /تقسيم 6.29 x ضرب 3.75 = 894 ريال
الفنادق يستلمون منك دولار مثلاً 200 دولار ويعطونك سند مسجل فيه رقم تسلسل الدولار واذا جيت بتمشي يرجعون لك الميتين دولاد اللي عطيتهم بنفس الرقم المتسلسل وتحاسبهم ريممبي
طبعاً الاكل الله يعينك ما فيه اكل مسلمين الا في المطاعم الاسلاميه فقط ونادراً ما تلقى شي حلال غير الفواكة
هناك مشكله واجهتني واتعبتني اللي هي الحمامات الله يكرمكم ما فيها شطاف كل شي مناديل حتى الفنادق لكن مع الايام تتعود مويتك معك وين ما تروح