السلام عليكم ورحمة الله وبركاتـه
تحية لكم يااعضاء المنتدى الكرام واسال الله ان تكونوا بأتم الصحة والعافية
حقيقة يااخواني لما اطلعت على هذا القسم وشفت الكثير والكثير من المواقف والقصص الصعبة اللي مرت عليكم مااخفيكم اني تنفست شوي من همي ومشكلتي اللي
انا فيها الان وعلى قولة المثل : ( من يشوف مصايب غيره تهون عليه مصيبته ) فقلت لازم اشارك معاكم وابغى اخذ رايكم ومشورتكم بخصوص وضعي الحالي
والمستقبلي وما خاب من استشار وانتم باذن الله وانا مااعرفكم اهل للثقة والرأي والمشورة السديدة وقبل كل شي اخوان في الله الله يجمعنا دايما على طاعته ورضاه

المهم باأقولكم : انا شاب عمري حاليا 30 سنة متزوج من حوالي سنتين وعندي بنت عمرها سنة وعليها الله يحفظها ويخليها . من عام 2006 بعد مااتخرجت من
جامعة الملك عبد العزيز ببكالوريوس ادارة خدمات صحية ومستشفيات انتظام طبعا جلست ادور وظيفة لمدة سنة وعليها في اكثر من مستشفى ومستوصف بحكم
تخصصي وماتوفقت بسبب لغتي الانجليزية اللي كانت ضعيفة للغاية وحالت بيني وبين امنيتي بالوظيفة فما كان قدامي خيار فسافرت إلى بريطانيا لدراسة اللغة
لمدة 5 شهور طبعا على حساب الوالد الله يحفظه ويخليه وبعد مارجعت للسعودية قدمت على وظائف والحمد لله انقبلت بمستشفى الملك فيصل التخصصي ومركز
الابحاث بجدة بوظيفة كاتب وكنت اشتغل في البداية براتب 3400 ريال بس ما همني قلت هاذي بداية والجاي ان شاء الله احسن وخلال سنة ونصف وصل راتبي
إلى 4000 ريال وبعدها بفترة جاءت الاخبار السعيدة لي بضم تخصصي جدة لفرع التخصصي بالرياض تحت مؤسسة واحدة والحمد لله رب العالمين بفضل هذا
القرار ارتفع راتبي الى 6500 ريال وفوقها صرف فروقات باثر رجعي وجاني مبلغ محترم جدا يالله لك الحمد والشكر ساعدني كثير اشتريت سيارة جديدة اخر
موديل وتزوجت ورحت قضيت احلى شهر عسل وكان وضعي المادي الحمد لله مية بالمية وكنت ساكن بعمارة للوالد يعني ماكنت حتى شايل هم ايجار وغيره
بس كانت الاشكالية ان العمل عندى كان ضغط مررة تقريبا 8 ساعات يوميا يادوب ترجع البيت وكم مشوار صغير وبعدها نوم وهكذا وكنت ابغى اترقى على
وظيفة تانية غير اللي انا عليها تعرفوا الواحد اذا حس انه اكتسب خبرة وانه بداخله طاقة كبيرة من النشاط والابداع يبغى يطلعها يبدأ يدور على أي مجال يقدر
من خلاله يطلع كل اللي في داخله . المهم بعد زواجي بحوالي 8 شهور جاني ترشيح من ديوان الخدمة المدنية على وظيفة حكومية بالمرتبة السادسة بمسمى كاتب
بوزارة الصحة وبصراحة بيني وبينكم كنت متردد بشأن الوظيفة هاذي للاسباب التالية : أولا : الوظيفة جاتني في مكان بعيد مرة بالتحديد في جازان وانا كنت شغال في
جدة واهلي بالمدينة المنورة يعني بتكون مسافة بعيدة مررة حوالي 1000 كيلو متر لو ابغى ازور اهلي بالمدينة مو زي لما تكون بجدة تقدر اسبوعيا لو بغيت اروح
ازورهم وغير مشاكل الحجز بالطيران وغلاء التذاكر بعكس لما اكون بجدة بس ادق سلف وكلها 3 ساعات ومايكلف إلا 60 ريال بنزين رايح جاي . وثانيا : راتب على
المرتبة السادسة اقل من راتبي بالتخصصي بـ 1500 ريال هاذي اقلقتني مرة لكن عدد من اقاربي اكدوا لي اني اقدر بعد مااباشر بالوظيفة الحكومية ارفع شهادتي لوزارة
الصحة عشان يتم تعديل وضعي من سلم الرواتب العام إلى سلم الكادر الصحي وبمسمى وظيفة اخصائي وبراتب افضل واحسن على المدى البعيد . هذا طبعا غير ان
الوظيفة حكومية يعني أمان وظيفي طول العمر .فتوكلت على الله وقدمت استقالتي من التخصصي ورحت باشرت بمقر عملي الجديد في جيزان . وهنا يااخواني بدأت
معاناتي اللي مازلت أعاني منها لحد الان . فمنذ ان انتقلت واوضاعي الوظيفية والمادية من سي إلى اسؤا : فمن الناحية الوظيفية : للاسف اصطدمت بالواقع المر اللي
شفته عن الوظيفة الحكومية واللي غير نظرتي عنها 100% كل انواع التسيب والاستهتار بالدوام : موظفين يدوامون وقت مابغوا الساعة تسعة عشرة احدعشر وبعضهم
مايجي الدوام اصلا ولا اهتمام بتطوير العمل وغياب تام للرقابة لا متابعة ولا تفتيش واجهزة كمبيوتر ومعدات من العصر الجاهلي وكل ما اطلب تجديد اجهزة او
تطويرها دائما مافي أي تجاوب والغالبية العظمى من الموظفين كده ماشية معاه بالبركة طلبت الانضمام لدورات تدريبية للاسف ماحد اعطاني وجه وزاد علي الوضع
بان وضعت في وظيفة مالها أي علاقة بتخصصي في قسم الحاسب الالي وادارة المعلومات مثلي مثل الفني اصلح اجهزة الحاسب وابرمج واركب شبكات وخلافه .
في البداية صبرت وقلت كلها فترة بس ارفع اوراقي للوزارة ويتعدل وضعى على الكادر الصحي وامارس تخصصي بكل راحة وامان . لكن للاسف رفعت اوراقي
من شهر 7 1432 هـ ومافي بعدها إلا كل انواع المماطلات والوعود الكذابة من مسئولي الوزارة من شهر لشهر إلى الان وانا على الحالة هاذي كل مااكلمهم
يتعذروا باتواع الحجج الواهية واللي مالها أي منطق مرة الاوراق ماكملت ومرة المديريات الصحية ماخلصت من موظفيها ومرة مافي وظائف اتنظر الميزانية

ولما انتظرت لحد مانزلت الميزانية واستبشرت خير رجعوا وقالوا الخدمة المدنية تشرط تقييم فني وعملنا التقييم الفني ورفعناه للوزارة وبرضه مازالت المماطلة والوعود
لحد الان بدون أي فائدة برغم صدور تعميم عام من الوزارة ينص على تحسين اوضاع الاداريين الحاصلين على مؤهلات علمية على الكادر الصحي . ولي الان سنة
وستة شهور على هذاي الحال والله لدرجة كرهت الوظيفة الحكومية وقلت والله ساعة الخيبة اللي التحقت بالعمل الحكومي مهما قالوا عنه امان وظيفي وامان وظيفي
بالله يااخوان وش فايدة الامان الوظيفي اذا انت بتحلس محلك سر الموظف المجتهد زي الموظف الكسلان لاترقيات ولاتطوير بالعمل وتسيب وغيابات بدون أي داعي
ورواتب ماادري اش اقول الحمد لله على كل حال . اما اوضاعي المادية فحدث ولاحرج . الراتب 6000 تروح منه 2000 ايجار يبقى 4000 ريال حاولت ويعلم الله
تعالى اني اصرف واوفر بقد مااقدر لكن المشكلة ماهي بيدك توفر شهر وشهرين ويجيك الشهر الثالث يأخذ كل اللي وفرته والله عانيت كثير خصوصا برمضان والعيد
وفترة المواسم هاذي وفوق كده الوضع في جيزان اسعار فاحشة جدا في كل المحلات العفو ياجماعة والله ما اقصدي اساءة لأهل جيزان والله انهم ناس على العين
والرأس وتحطهم على الجرح يبرأ لكن حتى هم والله مظلومين ومضحوك عليهم من التجار الجشعين اللي رافعين الاسعار لا حسيب ولا رقيب . والله يااخوان اكلمكم
وانا صادق ان اموري المالية تدهورت مررة لدرجة اضطريت اخذ قرض من البنك وانا اللي طول عمري مااحب القروض ولا ادانيها اضطرتني الظروف عليها
غصبا والله بعد ما حاولت وحتى بعض اقاربي الله يجزاهم خير ساعدوني وما قصروا بس والله ياجماعة استحيت بعد كذا اخذ منهم شي وشفتها كبيرة بحقي انا متوظف
وعندى اسرة واخذ من غيري كبيرة والله . بس ظلم وربي ماخذ بكالوريوس وخبرة 3 سنين وشويه في افضل مستشفيات المملكة وبالاخير اشتغل بالمرتبة السادسة
درجة اولى وبمسمى كاتب ؟؟؟؟؟ ولي حق التعديل على الكادر الصحي وفروقات اثر رجعي وتماطل فيه وزارة الصحة بأعذار ووعود كلها كذب × كذب ؟؟؟؟
فكرت ياجماعة لما شفت الوضع كده ارفع شكوى لديوان المظالم ضد وزارة الصحة بس المشكلة ديوان المظالم جلسات طويلة بالشهور ويمكن بالسنين ويمكن تطلع
بنتيجة ويمكن لا ويروح تعبك عالفاضي . صارت حالتي النفسية والمعنوية بالحضيض وادعو الله تعالى ان يفرج كربتي ويرزقني من واسع فضله . تخيلوا قدمت
على عدة جهات زي مستشفى الحرس الوطني ومستشفى الهيئة الملكية ومستشفى القوات المسلحة ومستشفى قوى الامن وكلهم طلبوني بوظائف عندهم وانا اصبر حالي
من سنة واقول يحولوني على الكادر الصحي بالوزارة اضمن والله للاسف مااكلت الا التراب .
معليش يااخواني الاعزاء اعذروني على الفاظي اعرف ان مالها داعي ولكن كاتم في نفسي وقلبي طول الوقت ولا أعرف افضفض لمين وما لقيت الا انتم احكي اللي
في خاطري وابغاكم تساعدوني بمشورتكم : انا بداخلي اتمنى لو اعمل بواحدة من المستشفيات اللي قلتها فوق الحرس الوطني او الهيئة الملكية وغيرها يمكن بعضكم
يقول لي لا خلك بالحكومي افضل واضمن بس ياجماعة مثل ما قلتكم اش الفايدة من امن الوظيفة الحكومية اذا انت اجتهدت وعملت بتظل مثلك مثل المهمل ومافي رقابة
ولاتطوير وسلم رواتب مشي حالك ولامميزات وظيفية ولاهم يحزنون ؟؟ والحرس الوطني والهيئة الملكية فيهم مميزات توظيف مررة رووعة تأمين طبي وسكن
ورواتب حلوة وخلافه ؟؟ يمكن ماهي حكومية 100% بس طالما انك ماشي بالسليم ماحد يقولك شي او يمسك عليك حاجة . وهذا الشي الحمد لله ماشي عليه من يوم
كنت في التخصصي الكل هناك يشيد بانضباطي ولااحد مسك علي حاجة او شي وطلعت منه ولله الحمد وصفحتي بيضاء مثل مايقولوا .
كثرت عليكم الكلام بس هذا كل اللي بخاطري وحبيت انكم تشاركوني عشان اقدر احدد وضعي مستقبلا وخصوصا انني مسئول عن عائلة والله ماأفكر الا براحتهم
وكيف اقدر اعيشهم مبسوطين ومرتاحين اكثر مني والله لو سعادتهم وراحتهم على حساب صحتي ووقتي انا ماعندي مشكلة على قلبي زي العسل .
ياريت تفيدوني الله يجزاكم بالخير ويحقق لكم امانيكم ويرزقكم من حيث لا تحتسبون

اخوكم تخصصي