الناس تفرح بالحبيّب وانا انحاس
لانه يحرك علة ٍ محتويها
روحي تعذب كلما هب نسناس
تقول ماكن المحاني عليها
يزيد جرح القلب والقلب حساس
حتى نسانيس الهوى مايبيها
ومن عادتي لادك فالصدر هوجاس
اشرد بنفسي في الخلا واحتديها
الناس والدنيا منازل بلا ساس
رحيلها وان طولت مقتفيها
ومن هي رصيد له تواليه للفلاس
وبيموت ماشاف الغنى من حديها
هذي هي الدنيا وهذي هي الناس
خسران من علق هقاويه فيها
غرارة ٍ فيها الرجا كنه الياس
حتى ولو جادت فمنها واِليها
اللي يلاقي وجهها الشين ينداس
واللي يلاقي زينها يهتويها
كم من رفيع ٍ خلته يرخي الراس
وكم من وضيعٍ خلته يعتليها
يشوف فيها العاقل اشكال واجناس
يزهدبها ويراقب اللي يليها
فلاباس ياشكاية الوقت لاباس
عند المدبر دبرة ٍ نحتريها
منقول