السلام عليكم ورحمة الله وبركاته
ياجماعة الخير بالنسبة للخربطة اللي صارت في الجنادرية
مسؤول الحرس الوطني مصرح تصريح خنفشاري في صحيفة سبق..
اللي شاف التصريح الله يعينه على التبريرات اللي تسد منافذ التنفس وتشل حركة المسار العقلي ..
واللي ماشاف التصريح نصيحة لوجه الله لايفكر أبداً إنه يشوفه...
بس راح أقول لكم الزبـدة لزوم يكون عندكم علم بالسالفة
مسؤول الحرس الوطني يسلم عليكم ويقول لكم ترى أريام جات للمهرجان بالصدفة..!!
وعضو الهيئة عمله إداري ماهو ميداني..وقطع مسافة كيلو ونص وجاء لجناح الامارات لإثارة البلبلة ولغرض في نفسه..
يعني أنتو ماكنتو فاهمين السالفة زين واتهمتوهم بالباطل..
أريام سلمكم الله كانت رايحه على لبنان عندها حفلة وبالصدفة كابتن الطيارة لف على مطار الرياض
وبالصدفة أريام كانت مارة من عند باب الجنادرية
ودخلت بالصدفة..وبالصدفة ودتها رجولها للمنصة
وبالصدفة شافت المايك قدامها
وبالصدفة طلع الصوت من حنجرتها ..
شفتوا كيف..؟؟!!
يعني هي ماكانت ناوية تجي ولاتغني ولا شي الله يهديكم
والمسؤول الاماراتي اللي قال أخذنا الاذن من الحرس الوطني ..قال هالكلام بمحض الصدفة
وهي يوم إنها قالت أشكركم على الدعوة..ترى قالتها بالصدفة
وياليل الصـدف
بس هذي هي السالفة كلها..الله يصلحكم وأنتو مسوين صجة ولجة ومقومين الدنيا
عشان صدفـــــة..!!
باقي نعرف سالفة عضو الهيئة
ترى الحق كله على عضو الهيئة..!!
شوفوا الجرائم الي ارتكبها
هو عمله إداري..وش نزله للميدان المفروض يلزق في كرسيه ومايتحرك شبر ..!!
وشهوله يتعدى الكيلو والنص اللي هم حاشرينه فيها ..!!
وشهوله يلبس مشلح أسود ويثير الرعب في قلوب الجمهور..!!
كل هذي التصرفات ترى مترتب لها وصارت لغرض في نفسه
وانتبهوا لا أحد يبرر ويقول صدفة ..!!
لأن هذي الكلمة عـُملة غير مسموح بتداولها في مجتمع الحسبــــــــــــة..!!