اول يوم :
جينا مجموعه بدري الساعه 7 ولا دخلنا الا 9 وربع بعدين عطونا استماره نعبيها فيها اختيارات صح او خطا معلومات عنك اذا فيك امراض او لا بعدها تقيس طول ووزن واشعه ( صدر وظهر وبطن ) وبكذا انتهى اليوم الاول طلعنا تقريبا 11 الظهر ..
ملاحظات اليوم الاول : تعال 8ونص احسن من تجي بدري وتنلطع لين 9 ، ( هويتك الوطنيه مهمه في جميع الايام بدونها ماراح تدخل ) يفضل لبس رياضي ..
اليوم الثاني :
تجي بدري 7 وانت عندهم تدخلون طابور وتقعدون على الكراسي وبعدها ينادون بالاسماء لين كل شخص يستلم ورقته بعدها يطابق اسمك مع ورقتك ويدخلونك بالسرا على المختبر تاخذ عينة بول ( وانتم بكرامه ) ومعها رقم هالرقم مهم لانه بيناديك عليه وبعدها تحليل دم والساعه 9 بالكثير وانت طالع وبكذا انتهى اليوم الثاني .. 
ملاحظات اليوم الثاني : الهويه الوطنيه مهمه جدا
باقي يوم ثالث واخير راح اذكره اول ما اخلص ان شاء الله
وصف المستشفى :
طريق خريص يجيك مستشفى الملك فهد على يسارك امشى سيده بعدين تطلع كبري اول ماتطلع كبري امسك يمين يجيك نزله انزل معها بعدها تجيك اشاره رح يمين بعدين سيده اول اشاره روح سيده ثاني اشاره يكون المستشفى على يدك اليمين من عند ثاني اشاره امش 100 متر بعدين تجيك لفه يمين ادخل معها وروح سيده لين يلف فيك الخط اجباري اذا لفيت فيه لفه يسار اتركها 
و امش سيده لين يجيك اول تقاطع خذ يمين بعدين اول يوتير ديور ولف يمين بالمواقف هنا تكون وصلت للمستشفى ( تراه مبنى لحاله اسال وين الكشف الطبي العسكري وهم يدلونك بتشوف ناس وقفين كثير عنده )
اي استفسارات حاظرين .. 
وابي دعواتكم لي ولاخواني المتقدمين بالتوفيق والقبول النهائي ..