السلام عليكم ورحمته الله وبركاته
د. نو-واي
بصراحة انا بقراء الهجوم والمقال وعيوني وصلت لجبيني من الدهشة ...
شئ ماقد سمعته ولا مريت بيه ..
وقعدت اراجع قائمة مدرائي والطاقم اللي انا فيه ولا وحدة منهم اجنبية
ولا حتى مديري ولا مدير الشوؤن ولا رئيس مجلس الادارة ولا سكرتير ولا حتى مستخدم
لا ادارتي في مكة ولا ادارة جدة لباب رزق جميل ولا البرامج ككل
هذا اولا ..
كرف وتطفيش؟؟؟
سبحان الله ... كيف يعني ؟
هل لانه انتا مطالب بالعمل وتأديته يسمى كرف وتطفيش
وليش ماتحسبه انك بتحلل الراتب
رح افهمكم نقطة او طريقة عملنا
وانتو احكمو
لكل واحد مننا من الموظفين له مستهدف معين كل شهر
وعليه انه يحققه ..
وانتا وشطارتك تحققه في اول الشهر في وسط الشهر
في اخره يعتمد على شطارتك ..
في النهاية انتا يا انك تكرف نفسك وتضغط عليها وقت تسليم العمل
يا انك من البداية تؤديه ويجي وسط الشهر وانتا تحط رجل على رجل
وقاعد تشتغل بكل راحة على تحقيق مستهدف الشهر اللي بعده ..
من اليوم اللي انضميت الى البرامج وانا ماسمعت كلام او شكوى
الرواتب بتنزل في وقتها البدلات معاها , البونص رائع
التامين الطبي .. وطاقم عمل متعاون ورائع غير التشجيع
الواحد ايش يبغى اكثر من كدة ؟؟
وبعدين على حكاية زين والبرامج
انا لسة في تاني يوم من رمضان سالت احد الموظفين في زين في احد
مواقعهم في مكة المكرمة وقلتله كيف اتعينت
قلي عن طريق البرامج .. انه قدم عندهم واتصلو عليه وقالولو يروح يقدم في اوايسيس مول
وانقبل ودربوه والان هوا احد الموظفين ..
يعني سار هنا تضارب قصص واحاديث ولا ايه يا اخوتي الكرام
الان انا ما بتحدث عن البرامج ولا ادافع عنها بصفتي موظفة
ولكن كانسانة عادية حاولت انها تتاكد من الحقائق وجات ترد عليكم
وطلبي بسيط
روحو زورو الادارة في جدة وشوفو اذا في اجانب
وروحو زورو ادارة البرامج في الهنداوية
وروحو زورو ابواب رزق
وتعالو زورونا في مكة
وطلعولي الاجانب ؟؟
العمل رزق يااخوتي والرزق بيد الله وحده سبحانه وتعالى
ولو انكتبلك الرزق عن طريق البرامج ولا باي طريقة تانية فهو لك لا محالة
لكن انك تحط الملامة على جهة معينة وتنسى نفسك ..
ليش مايكون انتا الملام
احدى الاخوات تقول شهاداتي ..
اختي الشهادات مو كل شي صدقيني .. يا في متقدمات بماجستير ودكتوراه
وتعالي ادخليها المقابلة
هيا في ناحية وشهاداتها في ناحية ..
ولا تقراء سيرة ذاتية وتعجب بمافيها
وتجي تطلبها وتشوفها تصدم بالواقع ..
العلم اذا مايرفع الانسان ويطوره معناته علم فاشل وماله معنى
وهذه هي الحال.. لاغلب الشباب
يتوقعو بشهادتهم انهم خلاص ملكو الدنيا ومافيها
ما الومهم لكن مع الشهادة دي في شخصية ..وانتا مُقيم عليها
وبعدين يا اخوتي انتو تقعدو في بيوتكم وتبغو الناس يتعبولكم وانتتو لا تتحركو
بس امرو انا ماابغى راتب اقل من الفين ولا ابغى اختلاط ولا ابغى ميداني
ولا لمن نتصل عليهم تعالو اعملو مقابلة ليه وكيف وعشان ايه .. وهذا كله وياريت يجو
لا .. ولا اشوف وجههم ... وبعدها يقولو ما اتصلو ..
ما قلنا شي واجبنا ولكن انتو كمان اتصلو وتعالو مرة واثنين وثلاثة اسعو لنفسكم اللي مارح احد ينفعها
غيركم ..
تحياتي للجميع
من موظفة في برامج عبداللطيف جميل