اقتباس:
المشاركة الأصلية كتبت بواسطة مدني ودمي عسكري
الله يكتب لك الخير ويرزقك ان شاء الله
بالنسبه لفتح مؤسسة مقاولات يبيلها تعب في البدايه حط في بالك ان خطوات فتح المؤسسه
تجلس من شهرين الى 3 اشهر لحد ماتستلم العمال ويبدون الشغل
اول شي تبدأ فيه البحث عن محل مساحته لاتقل عن 25 م
تستأجره وابحث في الاماكن الرخيصه لانك ماراح تحتاج المكتب وماراح تجلس فيه
اول ورقه تبدأ فيها هي عقد الايجار اول ماتدفع ايجار المحل وتستلم عقد ايجار المحل ورخصة فسح بناء من المؤجر اللي كتب لك العقد اطلب منه رخصة فسح بناء لمحلك اللي استأجرته وخذ صوره منها وروح قدم على السجل التجاري
واذا انت من مدينة الرياض بترتاح كثير لان اصدار السجل التجاري صار الكتروني يوصلونه لبيتك
خلال اسبوعين تقريباً عن طريق فيدكس مقابل 30 ريال
تدخل موقع وزارة التجارة والصناعة وتسوي اسم تجاري وتحجزه
مثلاً
نهضة الاسكان او الاسكان المطور للمقاولات << اذكر ان ما احد حجز الاسامي هذي
وتنتظر توصلك رساله موافقه على الايميل لاستكمال بيانات السجل التجاري
ويعطونك رقم سداد حساب المؤسسة وتسدد حسب ما انت اخترت مدة السجل
السنة بـ 200 ريال
تسددهم عن طريق الصراف
بعد ماتسدد رسوم السجل يطلبون منك سداد رسوم الغرفة التجاريه 800 ريال
حق سنه واحده
يعني السجل التجاري بيكلف تقريباً (( 1830 ريال ))
* رسوم سجل تجاري مدة خمس سنوات 1000 ريال
* اشتراك غرفة تجارية مدة سنة 800 ريال
* رسوم توصيل فيدكس 30 ريال
اهم شي لما تعبي البيانات في موقع وزارة التجارة بتحصل فراغ مطلوب العنوان
المقصود عنوان المركز الرئيسي للمؤسسه الي هو مكتوب في عقد الايجار (( عنوان المحل )) وليس عنوان المنزل
اذا استلمت السجل التجاري ومعاك عقد الايجار للمحل + رخصة بناء المحل (( فسح البناء))
تروح تأثث المحل بطاوله وكراسي للزباين والافضل يكون مستعمل ورخيص
وطفاية حريق حجم 6 كيلو ولوحه للمحل لايقل حجمها عن 2*1
وخذ فاتورة اللوحه والافضل تكون مختمه من الخطاط
تروح للبلدية التابعه للمنطقه المستأجر فيها
مثلا محلك في العليا تروح لبلدية العليا وهكذا
معك ملف اسود مقاس 45
فيه ملفين لونهم اسود اللي اقصده الملف الصخيف مو العريض
الي مقاسه 45 دايما تحصله باستقبال المستشفيات
تقريباً عرضه مثل عرض الجوال ابو كشاف << اهم شي الوصف
ترفق بالملف الاوراق التاليه :
1- صورة السجل التجاري
2- صورة عقد الايجار
3- صورة رخصة البناء او فسح البناء
4- صورة الهوية
5- صورة فاتورة اللوحه
وقبل تروح البلدية رح محلات الاختام واعمل لك ختم للمؤسسة مايكلف 150 ريال والافضل الكرستال
اللي حبره منه وفيه
وخذ معاك ظرف حط فيه الاصول للاوراق اللي ذكرتها لك فوق
وراجع البلدية
تعبي استماره عندهم (( طلب رخصة محل ))
ويطلعون بعدين يشيكون على محلك ويمترونه
ويصدرون لك رخصة المحل
بعدها تاخذ
رخصة المحل + السجل التجاري + الهوية
وتراجع مصلحة الزكاة والدخل لاصدار شهادة زكاة ودخل لمؤسستك
بعد ماتاخذ الشهادة
ترفق الاوراق
سجل تجاري + رخصة محل+ شهادة زكاة ودخل+ الهوية
وتروح تفتح ملف في التأمينات الاجتماعية ويقولون لك سجل الموظف السعودي عن طريق الاون لاين
وتسجل زوجتك بوظيفة سكرتيره بالمؤسسة
بعد ماتسجلها تروح لمكتب العمل تفتح ملف وتراجع قسم الحاسب الالي يفعلون لك يوزرك بمكتب العمل
بعدين تراجع قسم الاستقدام بمكتب العمل لاصدار الفيز تقريباً 3 فيز
لكن ممكن يتغير في المستقبل القريب من 3 فيز الى 5 ان شاء الله
يقولون لك سدد رسوم الفيز كل فيزه بـ الفين عن طريق الصراف
بعد ماتسدد الفيز بيومين تراجعهم تستلم الفيز وتستقدم العماله
وانصحك تشتغل بـ البلاط واللياسه لان ماوراها مشاكل ومكسبها حلو
والله يوفقنا وياك يارب
|
انت مية مية 
كفيت ووفيت الله يعافيك ويكثر من امثالكـ