بسم الله الرحمن الرحيم
السلام عليكم ورحمة الله وبركاته ,,,
هذا اول مشاركة لي بالمنتديات عموما وبصراحه اعجبني هالمنتدى لانه نفس توجهي ... فنبداء على بركة الله ..
اغلب الاخوان والاخوات يسال كيف اشغل مؤسسة المقاولات وكيف انجح و .. و .. انا اقول اللي مشتهي الشغله او حاب يعرف عن شي لازم يبحث وراه الين يعرف شنهي احسن الطرق للنجاح ...
انا توي جديد في هالفكره ( المقاولات العامه ) ولا عزمت اني افتح مؤسسة مقاولات الا بعد 4 شهور من البحث والتحري عن هالمشروع لان لي تجارب سابقة في مشاريع قديمه وخسرت فيها ...
الزبدة ندخل في الموضوع والسوال كيف انجح في موسسة المقاولات :
اولا مسالة انك تدخل مشروع دائما تحتاج الى راس مال وراس المال يكون على حسب المشروع اللي انت داخله فمثلا مشاريع موسسات المقاولات اذا صاحب العمل حاب يدخل في بناء العظم هذا بيكلفه تقريبا الخشب مع الشدادات وباقي الاغراض كلها حوالي 50 الى 70 الف ريال وتعتمد طبعا على حسب المباني اللي بيستلمها .... وما انصح اي شخص يحاول يدخل مجال المقاولات انه يدخل في بناء العظم لان العماله ماراح تحافظ على الخشب لان مو على حسابهم بيبدون يقطعون فيه زي مايبون ويتلف الخشب وبتضطر انك تشتري زود خشب وعلى هالموال الين يطفشك العامل وتجلس مثلك مثل باقي المؤسسات تستلم اخر كل سنه 2500 على كل عامل وهو ياكل اللقمة الكبيره .
عشان كيذا انا انصح اي واحد بيدخل مجال المقاولات انه يبداء ( بالتشطيبات ) لان مافيها خساره كبيره يمكن من 10 الى 15 الف تجيب جميع اغراض العمال
الخطوة الثانيه في مجال التشطيبات حاول انك تجيب العمال كلهم على مجال واحد يعد يعطيك مكتب العمل 3 تاشيرات جيبهم كلهم مثلا ( مليسين او مبلطين او دهانين ) وانا انصح بالمبلط والدهان هم اللي عليهم طلب كثير سواء في المباني الجديده اللي تحتاج تشطيب او في مباني الترميم مطلوبين اكثر ...
الخطوه الثالثة اذا جبت العامل حاول انك تكون تعرف هندي او باكستاني يجيب لك احد يعرفه في ديرته يعرف في الشغله اللي تبيها ..
الخطوه الرابعه لاتحاول انك تتفق مع العامل على اي راتب لان الرواتب ماتنفع مع العماله لانه ماراح يؤدي العمل على الوجه المطلوب وراح يتاخر ويرفع ضغطك كل مره الين ترفع راتبه عشان كيذا اتفق معه قبل لايجي باي نسبه تبي 40% او 50% او مثل ماتبي من حيث تخارج نفسك في هالشغله ..
الخطوه الخامسه اغلب الناس يقول طيب شلون اجيب زيادة عمال ؟؟ انا اقولك كيف الحين مافيه احد منا مايعرف له اي واحد يبني بيت او استراحه او اي مقاولات .... انت روح وكلمة الله لايهينك وقل له ابي فسح البناء بشرط ان الفسح تتعدى مساحته 500 متر مربع لو كان اقل من كيذا حاول انك تقدم فسحين بناء تجمع مساحتهم سوا وتقدم بها وتوقع بينك وبين صاحب الفسح عقد عمل وتاخذ العقد مع الفسح وتقدم به على مكتب العمل وتخلص باقي الاجراءات ويعطونك عمال عاد على حسب انا مابعد جربتها لكن هذا النظام اللي دارج في السوق او متعارف عليه ...
الخطوه السادسة والاخيرة ... اوصيكم ابتعدوا عن الحرام والغش عشان يبارك لكم ربي في عملكم واعرفوا ان لكل مجتهد نصيب ومو شرط انك اذا خسرت في مشروع يعني انك فاشل بالتجاره لا بالعكس حاول انك تاخذها بالوجه الايجابي وتتعلم من اخطاءك وتتفادها في المراحل المستقبليه..
وبالتوفيق للجميع واي استفسار انا مستعد باللي اقدر عليه ..