صدقني محد معصب هنا ولا متشنج
طيب خلنا من المحتسبه الي ولاها عمر أمر السوق،وش رايك بالنساء الي كانوا يجاهدون مع الرسول صلى الله عليه وسلم ومع الصحابه من بعده؟
نساء يسافرن مع المجاهدين ويدخلن أرض المعركه وممكن يلتحمن مع رجال العدو أثناء القتال ومع ذلك محد انكر عليهن هالشي!
فيما عدا الصحابيات الي كانوا يعالجون المصابين......يعني نفس الممرضات في وقتنا هذا والي انشغلوا عنهن المنتقدين بالبائعات في المحال التجاريه،مع انه مازال البعض الى الان ينظرن لهن نظره دونيه!
طيب خلنا من هذا كله وشوف فريضة الحج والعمره والي تختلط فيها النساء بالرجال وممكن من شدة الزحام يتلاصقون.......طيب لو الإسلام يحرم الإختلاط كان فرق بينهم بالحج وما يعجز عن الله اي طريقه تنظمهم.
لما ما أؤيد الاختلاط فهذا لأن مجتمعنا غير مهيأ للتعامل مع المرأه بإحترام فنظرة اغلب رجال المجتمع للمرأه انها عوره وعيب وحرام.....الخ بدون النظر لها على انها انسانه مكلفه امام الله مثل الرجل-ولهن مثل الذي عليهن بالمعروف-مو مخلوق عاجز ناقص يفترض يموت من الجوع ويتخبى حتى ما يثير مشاعر الغيره عند البعض،ونتيجه لذلك راح تكون المرأه العامله بين نارين.....نار المحتقرين لها ونار الطامعين فيها وكلا الطرفين مشاعرهم ناتجه من عدم الأحترام لحاجة المرأه
ما أؤيد نعم لكن أبداً ما أحرمه.
لكن الإختلاط مو حرام........اعطني نص صريح من الكتاب والسنه بحرمته،نعم الخلوه حرام لكن الإختلاط مو حرام.
أضف الى ان الحرام هو تحريم مالم يحرم الله....( ولا تقولوا لما تصف ألسنتكم الكذب هذا حلال وهذا حرام لتفتروا على الله الكذب إن الذين يفترون على الله الكذب لا يفلحون متاع قليل ولهم عذاب أليم )
بالنسبه لعام المجاعه فقياسي عليه هو قياسي على الحرام من وجهة نظرك.....اذا كانت السرقه حرام ومع ذلك رفع حد السرقه عن السارقين عام المجاعه،فليش تعترضون على عمل ما حرمه الله و النساء فيه محتاجات؟!
بصراحه هذا هو الفرق بين المسلمين الحقيقين وبين المتنطعين ولهذا قياسي في محله
بالنسبه لمطاوعتنا الأفاضل الي يطالبون ويثيرون العامه بدون ما يتبعون الحديث الشريف(من رأى منكم منكرا فليغيره بيده....)اذا هم شايفين ان هالعمل حرام ليش ما يغيرونه بيدهم؟!
انا اتحدث عن اصحاب الملايين،وما شاء الله اغلبهم أصحاب ملايين ويطلعون بالقنوات الفضائيه الي يحرمونها وياخذون من هالفلوس الحرام وبعدين يجون يقولون عمل المرأه الشريف حرام لأنه أختلاط!!!!
هالمطاوعه الي ينتهجون باب سد الذرائع(ونلاحظ هالباب ما يستخدم الا في قضايا المرأه)ليش ما يقتدون بعثمان بن عفان رضي الله عنه والي أشترى بئر رومه لوقف حد لابتزاز اليهود(بما ان عمل المرأه مخططات يهوديه وامريكيه)ليش ما يوجدون بيئة عمل غير مختلطه للمرأه بفلوسهم الي يتفسحون فيها بأوروبا ويشترون فيها الأراضي والفلل؟!
ليش ما يقتدون بأبو بكر الصديق والي كان ينفق ماله كله في سبيل الله لحد ما أقسم عمر رضي الله عنه أن لا يسابقه في عمل الخير.....ليش ما ينفقون اموالهم على كل محتاج بمؤسسات خيريه تصل للمحتاجين وتكفيهم مذلة السؤال وتكفي النساء العمل المختلط؟!
هم يشوفون ان القضاء على الفقر مسئولية الدوله،وهو فعلا مسئولية الدوله لكن وزير العمل ما يشتغل الا بموافقة الدوله لذلك يفترض يخلون عمل الدوله كله للدوله.
احيانا احس مسائل المرأه هي اشغال للرأي العام عن فساد القضاء،والوزارات،والبنوك،والانظمه،والحال الي وصلها المجتمع من الانحطاط بسبب القنوات الفضائيه الي يطلعون فيها مطاوعتنا ما شاء الله.
كمثال ليش ما تثار قضية ربا البنوك المستتره بمسمى القروض الاسلاميه بينما هي كقصة اصحاب السبت.....المشكله هالفتاوى المبيحه لها!
وما شاء الله حاسبين فايدتهم 1% ويقولون اسلامي!
المختصر المجتمع غارق بالفساد وعاجبهم لكنهم يشغلون الناس بقضايا المرأه حتى ما يتلفتون لهم فرجاء خلوا هالمسلمات بحالهن،وبدل ما تهاجمونهن وتحرمون عليهن شغلهن وعوهن بحقوقهن وكيف يتصرفن لو ابتزهن مديرهن في العمل.
حنا في زمن كل شي يبي فلوس والا بتلاقي نفسك بالشارع او بالسجن.....فالله يخليكم لا تهيجون العامه على اي وحده تبي تكفي نفسها بشغل حلااااااااااااال
اكتفي بما قلت و ان شاء الله تفهم وجهات النظر المختلفه والي ما تعارض الدين
بأمان الله