بسم الله لي كم يوم افرفر على النت اسأل عن المحافظات التابعه للمجمعه .. وبعد اتصالات ومباحثات مع اللي سبقوني بالمجال التعليمي .. قالوا لي تراك بمشذوبه !! المهم توكلت على الله وبديت بتهيئة نفس لمشذوبه .. طبعاً مشذوبه أرحم من جيزان ولا تبوك بحكم اني من سكان الرياض ومشذوبه تبعد عن بيتنا 400 كيلو المهم اول ماكتبت مشذوبه بقوقل الا ويطلع لي خبر عن مدرس انضرب من الطلاب وكسروا يده السنه الماضيه قلت يالله عساه فال خير يالله قعدت احوس واحوس على النت وقوقل ايرث عنها لقيت ان مشذوبه يوصل لها الزفلت ثم ينقطع يعني يوصل لها الزفلت .. اذا تبي تتعداها لازم تدخل في نفود الدهناء وتصارع الرمال قلت ماعليه هذا شي حلو .. اذا ضاق الخاطر فيها ادخل لك كم كيلو ونزل عزبتك وارتاح الشي الخطير والأخطر لقيت ان بين مشذوبه وبين ام رقيبه تقريبا اربعين كليو !! يعني الخط لاينصح فيه بالليل لكثرة الأبل السايبة ( الهمل ) اللي ممكن تقطع الطريق ثم يحدث مالا يحمد عقباه وقعدت ادور اماكن المكاشيت حولها ولقيت انها جنه في الربيع المهم بديت افكر وأفكر قلت كم بينها وبين ديرة تقدر تسكن فيها بأريحية ؟؟ لقيت أم الجماجم .. لكنها تبعد عن مشذوبه من الزفلت 74 كيلو ومن البر قطوع تقريباً 60 كيلو .. يعني مافيه فرق ذاك الزود فكرت وفكرت .. وقلت ياولد مالك الا تتأقلم وتجهز نفسك للأسوأ مايستفاد من الخثاريدز والكلام الفاضي اللي فوق :: لاتحط امالك انك بتجي في ديرة زينه .. او مدرستها مطورة او على الاقل بنائها حديث حط انك بتجي في مدرسة ماتروح لها الا بموتر دفع رباعي وماجلان وجارمن وكنود وثريا واذا طلعت الشمس وجات الساعة ثمان شغلوا المواطير عشان المكيفات واذا جات خمس العصر طفوها واذا جا المغرب معاد لقيت خبز تاكله واذا جيت تنوم تدخل ملحق المدرسة واذا حسيت بالحر تروح لسطح المدرسة تنام المهم المهم المهم اضبط امورك ولاتجي تاخذ ورقة النوجيه الا ومعك موتر ينشد به الظهر وجارمنك في مخباك الايمن والثريا بمخباك الأيسر عسى الله يوفقكم ويسعدكم في الدارين واللي يخلص مقابلته يوم الثلاثاء لاينسانا من العلوم الزينه