السلام عليكم ورحمة الله وبركاته
بكتب لكم معاناتي مع احدى جهات العمل وارجوا منكم تنصحوني كيف اتصرف
أنا في شهر سبعه (بالهجري) اللي طاف , كنت ابحث عن وظيفة ودخلت احد المواقع بالانترنت و وجدت اعلان مكتوب فيه (( مطلوب سكرتيرة للعمل في مجمع طبي وحاطين رقم جوال للتفاهم ))
اتصلت على الرقم وردت علي سيدة سألتني عن مؤهلاتي , وعلى طول طلبت صورة من هويتي والسيرة الذاتية الخاصة بي , وقالت لي : راح ندخل اسمك في التأمينات الاجتماعية و الدوام راح يكون بعد شهرين أي قبل رمضان بيومين لأن المكان جديد ولسى ماجهز و وصفت لي المكان .
أخذت اسمي وأدخلته في التأمينات بدون مقابلة شخصية وبدون ماتعطيني معلومات واضحة عن الوظيفة مثل الراتب وغيره لحد ماسألتها انا عنه
وللأمانه هي سألتني اذا عندي حافز أو أي شيء اخر عشان ماينقطع اذا ادخلت اسمي بالتأمينات , قلت لها ماعندي وبعدها بكم يوم سألتني اذا انا حابه يرسلون لي 800 ريال عشان ادخلوا اسمي بالتأمينات , قلت لها انا ماانقطع عني شيء يوم استخدمتوا اسمي بالتأمينات واذا الفلوس هذي من حقي اكيد ابيها واذا مو من حقي مابيها , وارسلت لها رقم حسابي في البنك وماشفت منها شيء .
المهم صار قبل رمضان ودقيت عليها أسألها قالت للأسف مارح نداوم في رمضان لأن المكان لسى ماجهز ودوامنا راح يكون بشهر شوال , و صبرت الى شهر شوال ودقيت عليها قالت لسى ماخلصنا وراح ندوام بنهاية شهر ذي القعده
صبرت كم يوم وارسلت لها رساله قلت فيها (( لو سمحتي عطوني تعويض مادي عن الفترة اللي استخدمتوا فيها اسمي بالتأمينات الاجتماعية وماعندي مشكلة انتظر لو ظروفكم المادية حالياً لاتسمح )) وردت علي برسالة قالت لي : ابشري .
ولحد الحين ماصار بيني وبينها أي اتصال على انها وعدتني ان الدوام بيكون بنهاية شهر ذي القعدة .
أنا الحين مقهورة وحاسة اني تسرعت يوم سمحت لها تدخل اسمي بالتأمينات بدون ماعرف معلومات كافية عن الوظيفة
ومقهورة لأني فرطت بحقوقي المادية من الأول
لانهم هم ربطوني معهم لا هم اللي خلوني اتوظف في مكان ثاني واشوف رزقي ولا هم اللي مشوا لي راتب ولا حتى شفت منهم ريال واحد وحتى التعويض اللي هي وعدتني فيه احتمال يكون مايسوى , والله العالم انا بجلس انتظر هالوظيفة لمتى !
بس أنا نويت انه بعد اجازة العيد ادق عليها واطلب منها يعطوني راتب كامل (4500 ) عن كل شهر انتظرت فيه , من رمضان وحتى اليوم , لأنه مو ذنبي يوعدوني بالوظيفة ويخلفون وعدهم معي , ويعطوني 800 ريال عن الشهرين اللي انتظرت فيها بالاول , ولا بهددها اني بشتكي عليهم في وزارة العمل .
سؤالي
وش رايكم في الشيء اللي بسويه هل هو صح ام لا ؟
ولو اشتكيت في وزراة العمل هل بياخذون لي حقي منهم ؟ وهل بيجيبون لي تعويض يسوى ؟ وماهي الاجراءت اللي لازم اسويها عشان اشتكي ؟
أخاف اشتكي وماطلع منهم لابحق ولا باطل , واصير خربت كل شيء بعد هالاننتظار
ارجوكم انصحوني