الصبر زين وكل مطـرود ملحـوق
دام النجـوم العاليـات بسمـاهـا
ياهاجسي برفوق لاقلـت برفـوق
ماهيـب لحيـة علهـا ياعساهـا
ولاهيب لحية وين غيبـت ياشـوق
ولاهيب لحية مت انا مـن غلاهـا
هجس القصيد يتوق صوبي وانا توق
بسـم الله الرحمـن فـي مبتداهـا
رعادها رعـاد وبروقهـا بـروق
لامن حداها الشاعر اللـي حداهـا
كان القصيده بنت عـزٍ وغرنـوق
حلّيبـهـا حلّيبـهـا لعنـبـاهـا
لاجاتنـي حطيتهـا داخـل المـوق
والله يحييـهـا ويحـيـي نبـاهـا
لها علي حقوق وانـا لـي حقـوق
ولاّ بلاش امـن القصيـد وبلاهـا
مانيب اعدلها علـى كـل طـاروق
اليـن اجنّنهـا وابـيـح خفـاهـا
الفكر شاشة عرض والقلب صندوق
يعني على ماقيـل بيـر وغطاهـا
ياهل الوثايق جاكم العلـم موثـوق
نصيحـةٍ ياخـذ بهـا مـن قراهـا
ترى النصيحه كان في ساحة السوق
معروف بايعها على مـن شراهـا
لو كل روضٍ به خزامى ورقـروق
محدٍ شكـى الدنيـا ودورة رحاهـا
والمنخنق لا قال مانيـب مخنـوق
تشهد عليـه العيـن لاهـل ماهـا
والحر يخدم دام له وكـر وسبـوق
ولا الحديـا عيبهـا فـي حـدهـا
والرجل فعل وطيب موقف ومنطوق
والمفلس اللـي مايحصـل حداهـا
لاتبدي اسرارك على كـل مخلـوق
الناس ماتدري وش اللـي وراهـا
عليك باللـي طلعهـم دايـمً فـوق
اللي عـن الـزلات تكـرم لحاهـا
خلك عسر وارقى على كل شاهوق
وسلم على اللـي لارقاهـا رقاهـا
واحذر تخاوي من تجرد عن الذوق
اللـي بـزلات اللسـان يتبـاهـا
تلقاه بين الكذب والـزور والبـوق
وباقـي علومـه كلهـا ماخزاهـا
ياعوق يابعض الرجاجيـل ياعـوق
اللـي تثـوّر بندقـه فـي اخباهـا
منقول