السلام عليكم
ان شاءالله تكونوا بخير
انا عندي مشكله بعملي
طبعاً توظفت بوظيفة قدمت عليها عن طريق هالمنتدى الرائع
وكتب الله لي وتوظفت بشركه صغيره تابعه لشركه كبيره ومجالهم في البراندات العالميه
ومسماي الوظيفي مساعدة مبيعات
والعمل يكون في احد معارضهم بالمولات وتقريبا لي ست اشهر
كنت في مول لمده اربع شهور ونقلت لمول اخر بعد ماتنازلت عن مكاني لزميلتي بعد ماحصل معها ظرف يمنعها من الانتقال
مع اني كنت مرتاحه مع زميلاتي وبالمكان
ولكن كان لابد وحده تتنازل من المجموعه
ورحت ومن اول شهر وانا كل يوم بمشكله مع مديرة المعرض اللي من الجنسيه اليمنيه
والمديره المباشره من ذات الجنسيه ولكن عكس الاولى
فهي متعاونه واخلاق وتحاول ترضي الجميع ودايم تثني علي وعلى شغلي ومبسوطه مني ودايم تسمع ملاحظاتي ومشاكلي بالعمل
بس من بعد مانقلت لهالمكان وهي ماتزعل بنت بلدها وتقول اصبروا عليها وتحملوها !!
ومديره المعرض كبيره بالعمر و تعاني من مرض نفسي وامراض صحيه تداوم فيها ساعات اقل مننا
لكن بالفتره اللي تداوم فيه تحصل مشاكل كثيره كلها اوهام وشكوك وهواجس من عقلها المريض
والمديره المباشره تجبرنا نتحمل كلامها وتصرفاتها الغير مسؤوله
مع العلم انا اقدم منها بالعمل وسبق وتدربت على يدي
وصارت مديره معرض مع ان فيه سعوديات اقدم منها واكثر كفاءه !
ولازالوا مساعدات مبيعات
وهالمديره ماتعرف غير انها ترسل ايميلات شكاوي كيديه وافتراء للشركه
وترجع المديره المباشره تتحقق من شكاويها ويطلع كلها اوهام
وكل يومين مطلعه علي مشكله لدرجه نفسيتي تعبت وماعدت اتحمل الشغل
مره تتهمني اني ماخذه نسخه من مفاتيح المعرض بدون علمهم
ومن الكاميرات اتضحت الحقيقه
ومره اتهمتني اني رفعت صوتي عليها
ومع شهود زميلاتي قالوا المديره هي اللي اخطت
ومره تتهمني اني اغير شفتات من مزاجي وكيفي بدون مااخبرها
ووريتهم رسايلها بالليل لما تطلب مني اداوم بشفت غير شفتي المحدد بالجدول الاسبوعي
ومره رمت المفتاح برا كان مقصدها تتهمنا انا وزميلتي اللي نقلت معي لكن ماضبط معها هالخطه ومرت بدون عقاب لها
ومره ومره ومره مشاكلها ماتخلص
الى اخر شي اتهمتني اني مااطبع فواتير واني اقول للزباين يجون لفواتيرهم بوقت آخر وهذا الكلام من راسها
وان المبيعات تنقص بسببي وفيه نقصان وقدره كذا ، مع ان المبلغ اللي ناقص كان بسببها وزميلاتي كانوا شاهدين عالمبلغ اللي اخذته ومارجعته وادعت انها ماتتذكر
ويومها انا كنت off
ولكن اتهمتني فيها
وتوقفت عن العمل بنص الدوام وقالوا اروح للشركه اليوم الثاني للتحقيق
ورحت وكل شي كان لي رد عليه وكلها تصوير كاميرات هي مصورتها بطريقة هي بمخليتها تشوفها شبهه عشان بس تثبت اتهامها
وكان على كل مقطع لي توضيح منطقي وكان مقبول من اللي تحقق معي وايضاً اذكر لها ان فلانه كانت معي كشاهده
لاني مع زميلاتي اكون واضحه وصريحه واي موقف يصير معي اعطيهم خبر واخليهم بالصوره وهالشي خدمني
وتأجل التحقيق لليوم الثاني لجل تحضر المديره المباشره
ورحت ثاني يوم وكانت اللي تحقق معي غير موجوده وانتظرت ساعتين وطلعت وصادف يوم اجازتهم الجمعه والسبت
وانتظرت ليوم الاحد ورحت ومالقيت احد بالشركه وكلمت اللي تحقق معي وقالت عندي اجازه اضطراريه ثلاث ايام تعالي يوم الاربعا
وانا بهالفتره نفسيتي جدا تعبت واحس اني مظلومه من استقعااااااد هالادميه لي
واذكرها كانت تقول انتي بتاخذين مكاني على مجهودك
ومره كانت تلمح اني البنات اللي قبلي طيرتهم لانها كانت تشتكي عليهم بالشركه !!!
وهذا وهي موظفه لها ثلاث اشهر بس مديرة معرض بدون خبرات
وهي وصلت لمبتغاها وانا بترك لها المكان
والحين لي 15 يوم مارحت للشركه وهم بعد مااتصلوا ولاسألوا
وكل يوم اقول بروح ومااروح عارفه اني قدام المديره المقيمه خسرانه ولا باخذ حق ولاباطل دام اني سعوديه
الحين اللي بعرفه بعد هالفتره بيفصلوني ؟
عالرغم اني موقفه عن العمل لانتهاء التحقيق مع ان رحت وجيت وهم اللي يماطلون
زميلتي قالت لي اسحبي عليهم الى مايفصلو عشان مايكون عليك دوام انذار شهر اذا انتي قدمتي استقاله بعد التحقيق
انا وزميله اخرى سعوديات نقلنا سوا ونعاني من هالمديره ولالقينا من ينصفنا منها
واثنينا غايبين من يومها ولنا نية نشوف شغل بمكان آخر
معليش طولت عليكم بس والله من الغبنه
من هالشركه اللي صاحبها سعودي والمدراء اللي فيها كلهم مقيمين واجانب
واابناء بلده مالهم اي قيمة فيها
وحسبي الله ونعم الوكيل وكفى