بسم الله الرحمن الرحيم
السلام عليكم ورحمة الله وبركاته
تحية طيبة للجميع ,,
أما بعد :
طلع أسمك بالترشيح النهائي ومسمى الوظيفة ومقرها والجهه الحكومية .. طيب (مبروك مبدئياً يا أخوي الكريم وأختي الكريمة) فيه مرحلة ثانية ? (المقابلة الشخصية - ممكن تنجح فيها وممكن ما تنجح وتروح الوظيفة عليك) ولآكن تبي تعديها ! أتبع الخطوات التالية بتركيز عالي جداً :
1- الجهة الحكومية اللي بيكون ترشيحك عليها أدخل على موقعها بالنت .. وأكتب بورقة مهام عملها .. وأحفظها كأنك تحفظ مادة عليها أختبار. ملاحظة (أحفظ أسم الوزير ومساعدة للجهة الحكومية وأحفظ أسامي الشهور بالهجري محرم,صفر الخ).
2- أدخل على موقع وزارة الخدمة المدنية وأكتب مسمى وظيفتك بخانة البحث وأضغط على كلمة (بحث) وبيطلع عندك مهامها ومراتبها .. أكتب بورقة المهام وأحفظها. ملاحظة دائماً أكتب مسمى الوظيفة بالبحث أكتبه بالإملاء الصحيح - مثلاً مساعد اداري .. كذا خطأ .. أكتبه مساعد (إ)داري .. أو أكتب أول كلمة وبالسهم تحت يظهر معك باقي المسميات الوظيفية.
3- لا تروح للمقابلة وأنت مواصل وما نمت (التركيز العقلي بيكون عندك 50%)
4- رتب مظهرك كأنك رايح (تخطب) وأزرار ثوبك كلها مقفله .. وتكـــون متواضــــع جـــــداً بحديثـــك .. وأبعد عن (التشخيص الغروري وشوفت النفس نهائياً) وجوالك يكون على الصامـــت .. وأدخل بإبتسامه خفيفه (وبتحية الإسلام) وتحية صباحية أو تحية مسائية فقــط هذا أن كان وقت المقابلة بعد الظهر .. ولآ تقول وشلونكم ومن هل الكلام .. أنت في موقع الرد فقـــط (الحمد لله طيب بخير ...) لآ تعدل بشماغك أو الغترة أبــداً .. لآ تقاطــــع بجاوبك أبـــــــداً أبـــــــداً حتى لو توك ما كملته (حتى لو كان يعطيك سؤال وتوك تجاوب شوي ويقطعك بالحديث ويعطك سؤال ثاني وتوك تجاوب شوي ويقطعك بالحديث .. يعني قاطعك وقف كلامك على طوووول وأسمعله أو قل (سم أو آسف) ما سمعت السؤال) لآ تتنرفـــــز أبــــــداً .. لآ تقول وجهة نظرك المخالفة أبــــداً على أي سؤال .. (يعني مافي مجآل للفلسفه نهــــــائيـــــاً).
5- لو تدخل للمقابلة وتلقى قدامك أكثر من واحد 2 3 4 5 لآ ترتبــــــــك (يا أخي لآ يرهبونك ترآ كلهم مروا بنفس حالتك كانوا طلاب وتخرجوا وبحثوا عن عمل وعُمل لهم مقابلات و و و و و إلى أن توظفوا ومر عليهم الزمن) كل ما بديت ترتبك شوي تذكر هذا الكلام صدقني وثق بالله - يصيرون قدآمك كأنهم أخوياك وقاعد تسولف أنت وياهم (بس بكامل الإحترام).
6- إذا أنتهت المقابلة لآ تطرح أي سؤال (تشرفت بشوفتكم - فمان الله).
7- اللي ينجح بالمقابلة - الجهة الحكومية ترسل الموافقة لوزارة الخدمة المدنية - الخدمة يتصلون عليك للفحص الطبي والفحص أمورة سهله جداً نص ساعه أو ساعه ونت منتهي منه .. عينة دم والعينة الأخرى - أكرمكم الله - وفحص النظر والسمع (أي كلام ويمشي) ويسألونك هل تعاني من أمراض مزمنه (ربوا سكر - عافانا الله واياكم وجميع المسلمين) عادي أذكر اللي موجود طبيعي وما تأثر أبداً هل كانت تعآني من مرض نفسي (حتى لو قديم جداً لآتذكـــرة) والفحص يآخذ وقت للنتائج 12 يوم تقريباً بس أحياناً 9 أيام وتظهر النتيجة .. (تحليل المخدرات تظهر نتيجته مع تحليل الدم والعينه الأخرى - أكرمكم الله - فرصه للمتعاطين وقــــــــف وبطـــــــل من الآن لأن أن ظهر بتحليلك شي فا لللأسف -غير لآئق طبياً- بيتم إستبعادك عن الوظيفة من قبل وزارة الخدمة المدنية - عافانا الله واياكم.
8- تآخذ خطاب من جهت تعيينك موجهه للأدلة الجنائية .. البصمات الجنائية .. تبصم بالشرطة بالأدلة الجنائية .. تبصيم سريع ما يآخذ معك 5 دقايق وينتهي .. بس النتيجة تآخذ لها 14 يوم .. بس أنت بعد 9 أيام مر عليهم بالرقم اللي بيكون عندك .. وأستفسر وأن خلصت عادي يسلمونها لك وتوديها للجهة الحكومية اللي عليها تعيينك.
9- جهة تعيينك يعطونك خطاب للأحوال المدنية تعدل فيه مهنتك إلى موظف حكومي .. أنت بنفس اليوم أدخل على النت وأدخل على موقع وزارة الداخلية - الأحوال المدنية - وسولك موعد عشان تروح لهم لآزم موعد .. وسهل جداً بتشوف عندك من ضمن الخيارات (تعديل المهنه) والموعد سهل جداً وتقدر تحجز بنفس اليوم أو اليوم الثاني .. ومآ يآخذ منك وقت وأنت بالأحوال تخلص التعديل وأنت واقف.
10- ترجع الخطاب لجهة تعيينك .. ويومين ثلاث ويخلونك تباشر عملك (وأحياناً يخلونك تباشر وبنفس الوقت تروح تعدل المهنه).
ملاحــــظة .. الوظائف اللي بدون مقابلة شخصية (يتبقى عليها فحص طبي -لآئق/ غير لآئق طبياً- وبصمات وتعديل مهنه ويبآشر لعمله.

أخيراً .. لآ تتحطم لو لم تقُبل بعد المقابلة الشخصية .. أحياناً يشوفون شي فيك أنت ما تشوفه في نفسك .. مثلاً أنا أعرف واحد أسلوبه (دفــش معنى ثاني خشــن) طيب أقوله ويقولون له اللي حولي أنت ليش كذا يرد علينا ويقــول (أنا أشوف أسلوبي طبيعي مافيني شي?) ولآ تتحطم أبداً لأن نقاطك مرتفعه وراح تترشح مرة ثانية بالتقديم القادم ويكون عندك تجربه سابقه وبإذن الله - تُقبل وأمورك تزين .. وتمشيت الحال بالشركات وراتب يمشي أزين من القعدة والحاجه .. والتجارة للي عندة راس مال أبـــــرك من أبو الوظايف كلها.
أتمنى من اللي حس أنه أستفاد من كلآمي شي بعد ما تتم أمورها كلها ويبآشر عمله لآ ينساني من (الدعاء بظهر الغيب).
الله يوفقنا واياكم أخوان كرام وأخوات كريمات وجميع المسلمين لكل خير ,,,