الشرهه اللي تعاندني واعانـــــــــــدها
من وين ما آروح عنها غصب تلقاني

علــــــى حبيبٍ نوى روحي وواعدها
وخلّوني ابــــدون روح ودون خلاني

ما شفت فيه المــــزايا ؛ شفت سيّدها
وما ينقصه شي دامي نصفه الثانـــي

أعْذرهِ لا غاب عنّي مير زودهــــــا
ولا جيت بـ أشْره لقيت العذر بلساني

يقول للناس : ( أنا موتي على يدها )
وآقول : يستاهل أكثر ليه يهواني ؟!

العشق عشقي .. حبيبي لا تعقِّـــدها
لا تضيِّع أحلى سنيني والعمر فاني

ما اقصر ليال الجفا لولاي اعدِّدها
وما اطول ثوان اللقا لولاك تجفاني

سيد الدواهي تراني مثـــلك وأدهى
إثبت لي إنّـــك إلى هالحين تقواني

غيبـــتك لو كنت أهمك لا تعوَّدها
والا تراني بغيب ولا تحـــــــــدّاني

والشرهه اللي تعاندني .. بعاندها
واصير مــن وين ما رحت انت .. تلقاني