ــــــــــــــــــــــــــــــــ تدري وش اللي يوجع الرجّال ويبيح خفاه لا صار فعله تمدحه لاجناب والربع ابخسوه .. وتدري وش اللي يقهر الرجّال ويزود عناه إليا انوخذ حقه غصب قدام عينه واظلموه .. وتدري وش اللي يسبي الرجّال قدره ويحداه الفقر وصدوف الليالي والرجال إليا بلوه .. وتدري وش اللي يخلّي الرجّال عالي مستواه طيبه وصدقه واحترامه للرجّال إن واجهوه .. وتدري وش اللي يجعل الرجّال له هيبة وجاه فعله ووقفاته مع ربعه وبذله إليا طلبوه .. وتدري وش اللي يميز الرجّال من بين أقرباه يدمح خطا ربعه ويسمح ويتصبّر لو قذوه .. وتدري وش اللي يرفع الرجّال عمن هم سواه إنه ما يهفي حق ذربين الأيمان إليا إسألوه .. وتدري وش اللي يفرق الرجّال من بين أقرناه صمته ومنطوقه ومردوده على من حدّثوه .. وتدري وش اللي ينجح الرجّال غصب على عداه تجاهل أعداء النجاح الحاسدين إليا شذبوه .. وتدري وش اللي يضعف الرجّال ويقلل إحلاه لا صار ما وجّب بني عمه إليا منهم دعوه .. وتدري وش اللي ينقص الرجّال في عين أخوياه لا عاد ماهو كفو للوقفة إليا منهم إزهموه .. وتدري وش اللي يهفي الرجّال ويشين نباه إليا صد من تكريم ضيفانه ليا منهم نصوه .. وتدري وش اللي يجعل الرجّال يمشي في عماه إنه مَ يسمع من محبينه ليا منّ انصحوه .. وتدري وش اللي يمحق الرجّال ويضيع حياه لا رام تحليل الحرام وما ارتدع يومٍ نهوه .. وتدري وش اللي يسعد الرجّال ويصفّي سماه قربه من الله قبل موته وأقرب عياله نسوه .. قواعدٍ تبقى على مر الدهر نقش بصفاه يعدّه الشاعر جديده للرجّال إذا نشدوه .. ــــــــــــــــــــــــــــــــــ