عذرك معك ياللي عن العين غايب
وأنا أدري انه لو هو بيدك ما غبت
الحظ خاب ودايم الحظ خايب
وإن خاب حظي معك .. معي إنت ما خبت
أنت المقرّب وأقرب من القرايب
بالحب هُمّ أجناب وإنته تقّربت
لو شفت غيرك من طوال الذوايب
ما ذبت فيهم وأنت في طلّتك ذبت
يا طيبك بقلبٍ بطاريك طايب
قلبٍ على عرشه عَلَيت وتنصّبت
على كثر ما مرّني من مصايب
نسيتها والحين من بعدك إنصبت
رحلت عن عيني بليّا سبايب
وأنا أحترق لنّي مَ احس أنيَ أذنبت
متمردٍ في الحب ما كنت هايب
واليوم من طولة بعادك تأدبت
مكبوت وأجذّب ما تجيب الهبايب
ولا قدرت أنسى ولا أسلم من الكبت
أنبتني بالحب وأنت السحايب
وما دام رحت وغبت من يسقي النبت
من تاب عن ذنبه يخاف العقايب
يا مذنبٍ فيني تبي تموت ما تبت
إرجع ورجّع ذكريات الحبايب
ذكرى نراجعها من السبت للسبت
ولانته بمعذورٍ إلى إبطيت غايب
وأنا أدري أنّه لوِّك تحب .. ما غبت