البارحه .. شفتك بحلمي وفزيت
مدري جنون الحب والا وفا لك
يوم الوعد وانته تنادي ولبيت
ترسم قمر وآقول غاب بكمالك
وترسم قصر وتقول مُلكه تمنيت
وهذي سوارة حب .. وهذا عقالك
وهذي مدينة حبنا كلما جيت
وهذي حدود أملاكنا مع عيالك
لا ضاق صدرك ترتكي ثم غنيت
زين اللحون اللي توارد فِـ بالك
وانا آتسمع كلما جيت واقفيت
وآقول لبى الصوت لا جا مجالك
وفي غفوة الاحلام عكس التواقيت
مَ يدوم صدق الوقت لو هو صفى لك
طاحت صروح البيت يا راعي البيت
هذا زمان الصدق ما هو خيالك
أحلامنا عاشت وصارت توابيت
واكفاننا قطعة شماغي وشالك
أسهرت من شانك حروفي وشبيت
واركيت دلة حلمنا يم جالك
ومديت فنجال الغلا ما تقهويت
قهوة زمانك مُرّةٍ في دلالك
وما فاض من شعري كتبته وخليت
باقي تفاصيل التعب في وصالك
واطفيت نار الشوق والحب والليت
وسكرت باب القاف دامه بكى لك