على الله توكلنا وبسم لله الرحمن
على اللي تبي يافكري العذب ميّلها
أبا آمد حبلي وانت حلِّق بلا جنحان
فضايه فسيح وصيدتك ما تخيّلها
تخيّر مَ بين الُّلول والدَّان والمُرْجَان
وجب لي من بيوت الغزل وانظم أجزلْها
حسيبي على اللي يسكن القلب والشريان
قضية جفاه وصدته كيف احللها
تركني ونا من غيبته تايهٍ حيران
ونا من غلاها ما اذكر انّي مزعلّها
تسوق الدموع الزرق من لوعة الحرمان
وجرحٍ تجدّد .. يالله انّك تسهلْها
تِعَدّى شَهَر والجفن من غيبته سهران
ومناديب همِّ العين للقلب ترسلها
أحبه وله في مهجتي منزل وعنوان
صروحٍ يمرّ ابها الزمن ما يحولها
وصاله سحاب إنْ هلّ منْه المطر هتّان
بساتين صدري قام يسقي مسايلها
غيابه جفاف امن الدهر يقتل الضميان
نفوسٍ من افراق المواليف يقتلها
حظوظ وتوافيق .. ما يجري على الانسان
مقدّر وِقسْمَه كيف يقدر يبدّلها
ياربي تغفر اللي مضى يَ عظيم الشان
تزيل الذنوب اللي على النفس باكملها