المشاركة الأصلية كتبت بواسطة دبلوم آدارة

اول شي الله يرزقني ويرزقكم من واسع فضله
حبيت افيدكم بما ان عندي خبره بالمعهد ولد خالي متخرج منه واثنين من اخوياي اعرفهم دخلوه
اولا المدة سنتين ونص بالضبط اذا ما نزلوك دوره
أقصد بنزلوك دوره يعني (جبت مخالفه بالمعهد او انك مبزوط او رسبت راح تتأخر وينزلوك دوره تكمل مع الي دخلو بعدك المعهد)
ثانيا دراسته انجليزي والمدرسين امريكيين كلهم ما في كلمه عربي اول شي دوره فرد اساسي بعدها تدخل مدرسة اللغه تدرس فيها سنه ونص تقريبا اذا اجتزت جميع الاختبارات ونجحت بعدها كل واحد يخش يكمل على التخصص الي راح يختارونه لك برضو بالانجليزي وبعدها ان الله يسير امورك تتخرج برتبة وكيل رقيب
ثالثا من يوم تخش المعهد ما معك الا خميس وجمعه وتحضر السبت وحجز الى يوم الخميس طول السنتين ونص ورمضان يعطونك اجازه الشهر كامل
رابعا المكافئة طول السنتين ونص 900 ريال فقط
خامسا راتبك بعد ما تتخرج راح يكون من 7200 الى 9500 اطنخ تخصص هو راتبه 9500
سادسا اللغه الإنجليزية راح تستمر معك حتى بعد التخرج لكن بعد التخرج مافيه لا فصل ولاشي حتى لو ما تعرف تكتب اسمك انجليزي بس راح تاخرك بالترقيات وراح يعرفون انك من جنبها عكس الشخص المتميز باللغه
انا ولد خالي تخرج منه بس كان دافور تخرج من الثانوي نسبته 89
واثنين من اصدقائي الي تخرجنا سوا من الثانوي دخلو المعهد واحد تخرج من المعهد وتوفق وكانت نسبته بالثانوي 87 وهو دافور حق دراسه
والثاني فصلوه بعد ما جلس عندهم قرابة سنه وعليها بسبب اللغه اصلا هو من جنبها اعرفه شخصيا نسبته بالثانوي 75 جاه ابتعاث لامريكا وراح وجاب العيد باللغه ورجع مفصول
فنصيحه المعهد حلو جدا اذا كنت واثق من لغتك وعمرك مناسب تخيل تدخل عمرك 18 سنه دوبك متخرج من الثانوي تتخرج من المعهد عمرك 20 سنه ورتبتك وكيل رقيب شي كويس احلا من جندي حاف يعني يوصل عمرك 26 وانت رقيب تتقاعد ريئس رقباء زي الحلاوه
صحيح فيه ناس اعمارهم 21 رتبته ملازم ومدة دراسته بالكليات العسكرية 3 سنوات ونص لكن شي افضل من شي يعني وكيل رقيب افضل من جندي
بس اذا ما راح تتحمل الحجزه سنتين ونص والانجليزي والتعب لا تسجل
وبالتوفيق