الله يعينك ادارة المشاريع مو شي سهل ابد وفعلا الارباح ماتجي بسهولة ومو بس انتي تعانين اتوقع كل المشاريع
التجارة ممتعة لكن تحتاج صبر ويقولك من صبر ظفر
طالما يجونك زباين وتجيك طلبات ماشاء الله قولي الحمدلله هذا دليل ان شغلك ناجح وماشي فاستمري
تخيلي لو ماتجيك طلبات ؟
اما الاحباط انك تشتغلين وتتعبين وبالاخير تدفعين اللي دخلتيه هنا وهنا وهنا ومايصفى لك شي
فكري فيها بإيجابية
ترى اللي تدفعينه للايجار هذا بالاصل تدفعينه لنفسك لو ماعندك محل يعتبر ماعندك مشروع
اللي تدفعينه للعاملة او الموظفة تدفعينه لنفسك لانها تشتغل لك ولحسابك
حتى اقساط البنك,القرض كان نعمه وتعبتي عشان تحصلين عليه ولولا الله ثم هو ماكان فتحتي مشروع وتعلمتي واستفدتي وحققتي حلم كان عندك تحلمين فيه غيرك يتمنى وماقدر
وقيسي عليها باقي الامور

استجمعي طاقتك وتذكري اول ايامك لما قدمتي على القرض كيف كان الحماس والامتنان والسعادة لما قبلوك ولما كنتي تجهزين محلك
اقرأي كثير بتطوير الذات والتنميه وفيه كتب كثيرة عن عقلية الفقير والمليونير وتابعي حسابات ايجابية بتويتر وانستقرام وسناب
لاتخلين اليأس يدخل قلبك او تفكرين بسلبية وتصيرين تشوفين النعمة نقمة وتكثرين من ندب الحظ
ترى طريقة التفكير هي كل شي , حياتك تكون حسب طريقة تفكيرك اذا تفكيرك سلبي ومحبط وتحسين بالحرمان والقلة بتشوفين وتتعاملين مع كل شي بحياتك بهذه الطريقة .حياتك بتكون كذا سلبية واحباط وحرمان وقلة
واذا تفكيرك ايجابي وتحسين بالوفره وتستشعرين النعم فحياتك بتكون كذا
حتى التعب والشغل هذا يعتبر نعمه احمدي الله عليها تعب الشغل هو التعب اللي يجيب السعادة , التعيس هو اللي ينام وياكل مايشتغل ولايتحرك
اعطي نفسك اجازة لنفسك عليك حق لو يوم بالاسبوع ...لو بس شغل شغل شغل تطفشين لازم تجديد الطاقة
بعد الحالة النفسية شوفي الحلول الفعليه
هل دفعتي زكاة المحل ؟
هل شفتي محل ثاني ايجارة اقل؟
هل فكرتي بنظام العمولة مع الخياطات ؟
هل فكرتي بتسعير خدماتك ؟ مجدي غير مجدي ؟
اذا فيه ضغط حاولي تخلي العميلة تأجل موعد الاستلام مقابل تخفضي لها سعر
يعني اللي تبغى فستانها خلال اسبوع او اقل احسبي عليها سعر زيادة عشان تحسين انك اخذتي حق تعبك والضغط
واللي تبغاه خلال 3 اسابيع مثلا سعرها اقل
ادفعي من راتبك او من اللي يصفى لك لو عشره ريال تصدقي بها , الصدقة تزيد البركة
ادعي قبل كل عمل بتشتغلينه اللهم بارك لي في جهدي ووقتي ورزقي

شوفي لو تتشاركي مع خياطة او اكثر من خياطة ترتاحين من الرواتب ويكون لها عمولة لو 50% من كل فستان تخيطه
فكرة الشراكة والعمل بالعمولة جدا رائعه ومحفزة اكثر من الراتب تخلي الوحدة تشتغل وتحرص على الشغل كأنه شغلها وتصير تبغى تشتغل اكثر عشان تكسب اكثر وانتي يكون عندك احد تعتمدي عليه بالمقابل






خارج موضوعنا::
مواقع التواصل لانها تظهر جانب الرفاهيه فقط من حياة الناس وتظهرها كأنها الحياه المثالية والكاملة , صار الواحد لما يتابعهم يحس بحسره يشوف نفسه انه يكرف ويتعب وماوصل للي وصلوله الناس .
كيف ناس بسهوله يحققون اعلى الدرجات ان كان نجاح شهره رفاهيه ثراء وناس تشقى ولاتوصل
شفت كثير ناس بسبب متابعتهم لهذه الحسابات تأزمت نفسيتهم وحسوا بالتعب حتى النعم اللي عندهم ماصاروا يشوفونها
وهذا غلط
ركزوا على حياتكم والنعم اللي عندكم لانها قد تكون حلم يصعب تحقيقه عند غيركم
ولاتراقبوا اللي اعلى منكم الا لو كنتو قادرين تتحكمون بأنفسكم مشاعركم وتعتبرونها تحفيز لكم لاتحبيط