في شركتي القديمة وهي احدى الشركات المساهمة في السوق السعودي والمتخصصة في للانابيب الملحومه وغير الملحومه كانت بيئه العمل جدا سيئه مافي تقدير ولا احترام وضغط عمل ولا في راتب يشفع !!
بديت مشواري الوظيفي في الشركه سريعا توظفت اول ما تخرجت وانا خريجه بمعدل 4.2 من جامعه الدمام ..
ماحبيت اشتغل في شركه صغيره الانو عارفه الشركات الصغيره ما توفر خبره او تدريب بس يخلونك تشتغلين في كل شي صح او غلط ..
رفضت الكثير من العروض الوظيفيه وجاني عرض للشركه الي قدر الله انو توظفت فيها
وتوظفت في بدايه كان راتبي فل باكج 5900 واكتشفت انو راتبي قليل راتب الفني الي بالشركه خريج ثانوي اعلى مع أني خريجه بكالوريوس ودبلوم..
المهم جلست في الشركه سنه وشهر في بدايه الأشهر كانت الشركه مافيها اي مقومات صالحه انو موظف يتوظف مافي أدوات مكتبيه او شي قسم فاضي فقط كمبيوتر وطاولات اضطريت اشتري من حسابي الشخصي أدوات مكتبيه كامله الله يكرمكم حتى الأقلام والأوراق والخرامه وحتى الكوفي والسكر الي نشربه وبعض أغراض العمل زي المناديل المكان مافي غرفه راحه او مكان اكل بس كان معزول الشباب عن البنات .
الشركه مافيها سلم وظيفي او سلم رواتب واضح وتأمينها الطبي للبنات سئ جداا بالنسبه لشركه متوسطه تقدم سلع أساسيه و صناعية وتجيها مشاريع الارامكو بالملايين ..
ماكان في عداله في توزيع المهام الوظيفيه يعني موظف ياخذ مهام وموظف لا أسلوب تطفيش ،ولا في عداله بالتعامل يعني كنت أواجه صعوبه بالتعامل مع قسم الموارد البشريه مايفرون الطلبات جلست سنه كامله كنت احتاج اشياء ما توفرت لي وكانت أساسيه
كنت أداوم للساعه 6 بالليل بسبب ضغط العمل وعدم قدرتي على معالجه الطلبات كان القسم يحتاج موظفين واكتشتفت لاحقا انو مافي تقييم اداء وظيفي يعني الي يشتغل زي الجالس وزيادته 2٪ سنويا .
طلعت زميلتي بالعمل لشركه افضل وزميلي بالعمل اجازه كنت حرفيا اعمل شغل القسم كامل جلسو 4 شهور من طلعت زميلتي ماوفرو بديل
غير ان اغلب الموظفين بالشركه كبار او ماعندهم شهادات بيئه العمل سيئه كان فيه مهندس مصري يسب السعوديات بالاجتماعات و يتصل فينا لوقت متاخر من البيت ويرسل رسايل تحرش وأثبتنا عليه ولا تصرفو معه الشركه بالعكس كان ودهم احنا البنات نطلع وهو يجلس الانه منجر البيئة سيئه الموظفين يسالون السواقين عن بيوتكم ويلحقونكم بالسيارات وتحرش ..
غير انهم يتسلطون عليك بالقوانين بمواقف السيارات وغيره يعني عادي الموظفين حقين الاتش ار يوقفون قدام البوابات بس انت يالموظف العادي مو مسموح لك .
عموما الشركه قسم البنات مافيها حتى موقف او مكان توقف فيه
موظفه الاتش ار سيئه جداااا راعيه مشاكل و تعدت علي رفستني وعند الشكوى عليها قالو انتي غلطانه هي رفستك بس ماضربتك يعني الرفس مو ضرب ! ..
فما كان الحل الا أني طلعت
مافي ميزانيه للموظفين ولا للاتش ار
قبل لا اطلع عن شغلي كنت اشتغل زي الآله طلبت ترقيه قالو الترقيه على سنوات الخبره فقط وهم كذابين لا سنوات خبره ولا هم يحزنون ماعندهم سياسات ولا حتى هيكل تنظيمي او وصف وظيفي واضح و في بالشركه ناس مايعرفون حتى لغه ومش دارسين أصلا جامعه حتى ولا يشتغلون يطلعون وقت الدوام ولا يرجعون الا متاخر مترقين ورواتبهم احسن
فهنا كانت الشعره الي قصمت ضهر البعير زي مايقولون وطلعت وشتريت نفسي
علما أني كنت أداوم من الدمام للجبيل و اشتغل داخل الشركه وخارجها و احيانا يطلبون مني اشياء خارج أوقات العمل أنفذها

بالاختصار مايستحون ومهم رجال وحسبي الله ونعم الوكيل