اشهد ان الكلام اللي يجيب الكلام=ما نبي له مجال ٍ بالمجالس يدور
اللي طفل صغير ٍ ما وصل للفطام=ندري انه صغير ٍ من عداد البزور
فيه بعض الخلايق روسها كالنعام=يحسب انه مصيب وراح عمره دبور
نحشم النفس عنه ونتحاشى الصدام=لأن بعض الامور تجر بعض الامور
الحسوفة علينا يوم نبدا السلام=لا حضر بالمجالس واحد ٍ به غرور
ألزم الصمت ساعة واحكمه بالتمام=وأعلم ان المجرة في فلكها تدور
كل خفاش يسري في حلول الظلام=والحرار النوادر من خيار الطيور
وش يجيب الخزاما عند نبت الثمام=ذاك نبت الصحاري وهذا ريح العطور
فيه بعض الخلايق يشتكي الانفصام=ما خبرنا كفوفه وافيات الشبور
لو بعض الليالي جت على ما يرام=خايف من الصوادف والبنادق تثور
واهني من عيونه لا بغى النوم نام=ما درى بالمصايب والدواير تدور
الصغاير بقلبي صار منها احتدام=وانت تدري خويك دوم عبد ٍ صبور
علموني طرايق تجلب الابتسام=غير رب الخلايق ما درى بالصدور
الردي ما زهمته لا علي ّ بالحرام=لو حدتني الليالي جور يقفاه جور
ان حدتني ظروفي جيت ناس ٍ حشام=يركبون الصعايب يكسرون الصخور
يا وسيع البنايق وانت راس السنام=انت راعي الروابع واعطنا منك شور
كل بيت ٍ يسطر فيه مسك الختام=المعاني جليّـه واضحات السطور
الشاعر : يحيى بن شيبان