الصراحة راحة

ملفي طفش مني · #1 (**permalink**) 02-11-2006, 12:32 AM

مساء الخير للجميع (في المسا) وصباح الخير للجميع (في الصباح) أول مرة أشارك في المنتدى فمتلخبطة شوي ماني عارفة اكتب مقدمة حلوة لكن خير الكلام ماقل ودل بس شكله حيطول احنا الان مشاركين في المنتدى نفضفض لبعض ونحكي همومنا لبعض وممكن في بعض الحالات نلاقي حلول للاقلية فكلنا في الهوا سوا عاطلين عن إيجاد وظائف حكومية نخلل فيها إلين نروح القبر
المهم حبيت ألفت نظركم إلى حقيقة غافل عنها البعض مش الكل اللي هي انو شهادة البكالوريوس ماهي نهاية العالم (يعني إيش بكالوريوس )عادي لازم نبحث عن احتياجات قطاع العمل مثلا الان البكالوريوس صار زي شهادة الثانوية فمن الضروري نطور انفسنا ندعم خبراتنا نصقل شخصياتنا حتسألوني كيف أنا اقولكم كيف؟؟
نتوكل على الله ننجح من البكالوريوس بتفوق ناخد دبلوم حاسب آلي وناخد دبلوم انجليزي (مش دورة دورتين ونقول صرنا فنانين ) وإذا توفل ياسلام نكمل دراسات عليا الأجانب ماهم احسن مننا كلنا عندنا عقول والحمد لله جامعاتنا وكلياتنا ماقصرت وترى في مكافآت افرحوا ممكن تشتغلي في مدارس أهلية تطوعا منك عشان تكتسبي خبرة وصدقيني اذا شافوكي كويسة وملتزمة حيشغلوكي عندهم خلاصة الكلام اشغلي وقت فراغك بكل ماهو مفيد لايكون همك الأول والأخير الوظيفة لأنك حتعبي نفسك وتاخذك الهواجيس والوساوس الخيارات امامك كثيرة فقط ابحثي
وعندي دعاء انشا الله ينفع الجميع (اللهم اغننا بحلالك عن حرامك وبطاعتك عن معصيتك وبفضلك عمن سواك يارب العالمين الله آمين)
وصدقيني أختي الأرزاق بيد الله وربنا ماحينسى عبده فمثلا أختك في الله اللي هي أنا:o ولله الحمد الحمد متخرجة بكالوريوس كيمياء بنسبة 96,6% عام 1423هـ (الأولى على الدفعة)ومعاي دبلوم حاسب آلي امتياز واشتغلت معيدة لمدة سنة على بند الساعة وحاليا بادرس ماجستير وفي نفس الوقت ادرس الطالبات تطوع لاكتساب الخبرة في نفس الكلية
ولكن للأسف الشديد ماحد يطالع في وجهنا لأنو أصلا مافي وظائف وغيري كثيييييير بس إن تكن ذا همة تصل إلى القمة

عاطل طفران · #2 (**permalink**) 04-11-2006, 04:32 PM

اتمنى ان تصلي للقمة وتاخذي الماجستير والدكتوراه بعد اختي العزيزة

بس ذكرتي نقاط افعلو ادرسوا اذا اغلب جامعات عند البنات مقفله الاقسام على 96%
وين يدرسون ؟

ثاني شي قلتي تعلموا معاهد دورات يا اختي كل شي صار بفلوس والناس مو مثل بعض وانا اخوك ناس تقدر وناس لا ..

شي اخر دراسه علم وكل شي بالنهايه تقولينها انتي مافي وضايف ؟

يعني يمدحون نكبر الوسادة وعلى طاريها مرة قال لي ابوي شي حاول تجمع ملفاتك تحطها في وسط الوساده عشان تاخذ راحه اكثر في رقبتك اثناء النوم

وصراحه بحسدك على وساتك انتي خاصه ان فيها بكالوريس وان شاء الله بيجي معها ماجستير وبعدين اذا الله احيانا واحياك بيجي دكتوراه

وقتها لاتبخلين علينا وخلينا نشاركك الوساده هههههههه

تحياتي لك