مساعده : في تنفيذ مشروع ( كوفي شوب )

[سنكوح مملوح]

السلام عليكم ورحمة الله وبركاته ..

هذا اول مشاركه لي وحاب اخذ رايكم وتعطوني من خبرتكم في مجال التجاره

حاب افتح كافي شوب ( تيكا ويه ) >> يعني محل سفري في منطقه تجاريــه

لقيت محل صغير بس خفت البلديـه ما توافق عليــه ( ابي اعرف كم المساحه الي تطلبها البلدية لهلمشروع )

طبعاً للتوضيح راح يكون مع القهوة ( عصير ) و وجبات خفيفـه + كيك راح اجيبه من برى


ابي اعرف شنهو المطلوب من اجرائات وشروط للمحل وراريكم في هالمشروع + العماله اجيبها من الفلبين او تركي او عربي ؟؟ >> شنهو افضــل

[رياض الأحباب]

العماله من الفلبين افضل

الله يوفقك

[سنكوح مملوح]

تسلم عزيزي على مرورك العطر ...

واتمنى ان احصــل على تفاصيــل اكثر من باقي الاخوه في هذا المجال

وتقدير التكلفــه للمعدات

[سعودي هام]

العماله انتبه لاتجيب تركي
وتتورط معه
لان رواتبهم عاليه

[سنكوح مملوح]

ماقصرت عزيزي الحين من وين ابتدي >> استأجر المحل او اروح البلديه قبل او وش اسوي بالضبط

[أحلام ورديه]

شوف لك معقب افضل

[سنكوح مملوح]

شكراً لك عزيزيـــ ^

[طمأنينة]

دامه محل ترى ماعندنا نظام كله مش حالك الاهم اولاً عقد ايجار ثم البلدية صحة البيئة وبعدهم الدفاع المدني من تجي البلدية راح يعطونك كل الشروط ...

والله يعينك على المندوب يطلع ولا يغربلك

ومبروك مقدماً مشروع حلو

[طيارعاطل]

كوفي شوب تيك أوي أو مايسمى بدرايف ثرو

أول شيء أحب أهنيك على الفكره وأنا أشتغلت بهالشغله سنه ونصف
وشريك المويه مايخسر إن شاء الله
حطها في بالك
ثانيا عزيزي الكوفي شوب التيك أوي لاتفكر أنه غير مكلف

ولاتفكر أبداً أنه صعب

ولكن يبغى له رجال كفؤ وأنت قده

ليش؟


أولا التيك أوي مكلف ولكن أرباحه جيده والمتوقع مابين 500 و 600 إذا الشارع عادي أما إذا كان على كثافه سكانيه أبشر والله بأرباح لاتقل عن 2000 ريال وأنا أتكلم عن أرباح ويوميا



الكوفي شوب يحتاج إلى ثلاث عوامل رئيسيه لإنشاءه

الأول
مقاول
الثاني
معقب يريح مخك بإجراءت البلديه حتى أخر لحضه

الثالث ابن الحلال اللي بيجلس فيه



المقاول تبدء تسعيرتهم للإنشاء من 65 ألف إلى 80 ألف كامل مكمل

كيف

أول شيء أنت بتبني يعني بلوك ويعني أساس مصغر لصبه مصغره (أتكلم عن بلديات الرياض)
وبتحط واجهة المحل من أربع جهات حجر وانصحك بالألوان الفاتحه أطلع بجديد وأبتعد عن الألوان الغامقه

بعد البناء بيكون عندك تمديدات من ماء كهرباء ولا تقول مابي تلفون ماحتاج بتحتاج بس على الله يكون فيه كبينه متوفره لك

الكوفي شوب التيك أوي حتكون مساحته على الأقل 4 في 4 ومافوق كي تتمكن من تموينه يوميا

بعد البناء سيتوجب عليك لوحة وأنصحك في النيون على أنها مكلفه ولكن لافته ليلا ونهارا

وبعدها المعدات

إن كنت من الرياض أختصر عليك لفة السوق وأشتري لك من قهوة المساء عيون للقهوه وهم وكلاء قهوة ماريوmario
مابين 25000 الى 30000بتقول غاليه
نفس الشعور في البدايه هههه
الأن موقعهم على طريق خريص

بعد شراء العيون
بتحتاج إلى بليندر (خلاط) ويجب أن يكون جيد النوعيه وإن كان غالي ممكن يوصل إلى 600 ريال بس عادي لاتستخسر لإنه بيشتغل طول اليوم

وبتحتاج إلى أكواب ورقيه وانصحك في أكواب سولو solo
ومتواجدين تقاطع التحليه مع طريق العليا تجده على يسارك إذا كان وجهك غرب


قيمة الكوب الواحد ممكن يكون نصف ريال وإذا بعلامتك التجاريه ممكن يكون ريال إلا ربع

ليش أكواب سولو

سهلة التخزين

ماتحتاج معها إلى حوامل للأكواب ضد الحراره أو البرودة
إلا بتكلفك نفس السعر وأنت ماتدري مع الأكواب العاديه ولاننسى أن شكلها وبعد بيعك للزبون ستجد الفرق


بعد الإنشاء المبدئي ستجد نفسك محتاج أيضا إلى معدات النكهه
أو مايسمى بمكملات النكههsyrup
هذي برضو من قهوة المساء وهم وكلاء أفضل سيرب اللي هو ديفنشي وتأخذ معك الوحده إذا عندك زباين مره نص شهر واذا زباينك معتدلين شهر وتحتاج تنوع في النكهات مالايقل عن سته

طبعا ثلاجات مصغره
وفليزر مصغر أيضا
وحافظ الخبز والدونات
وغاز وأعتقد لن تحتاجه مبدئيا ولا أنصحك شراءه على طول

طبعا تحتاج بن القهوه

كل هذي بتكفي وبتوفي على 65000 إلى 80000
طبعا أنت الأن تقول واو لاتخاف أمورك زينه أعرف مبتدئين مساكين دفعوا إلى الميه بكذب المقاولين

بخصوص المقاولين إنتبه ثم إنتبه ثم إنتبه

لا تنام يوم واحد ولاتقول المحل صغير مايحتاج أقف عليه وقف على سن ورمح ورجل وأصبع بعد تراها كلها 15 يوم وانت خالص

لإنه إذا حاس عليك وغير خطتك والله بتندم وكثير لأن هذا المحل هو زبدتك فلا تغفل عنهم

لاتعمد على أحد في شراء المنتجات الأساسيه أشترها أنت مع التواصل مع أحد له خبره

حاول ان لاتشتري مستعمل ابدا فبعد شهر او اكثر ستجد العيوب


المعقب عاد انت وشطارتك



العامل الثالث الا وهو من هي اليد العامله اللي بتريحك وتكون لأمينه

من الأخر فيه مثل يقول المال السايب يعلم السرقه الامين يظل أمين بس أنت مانت فاتح معمل تجارب

سيح الدم من اوله وانا اخوك

في انظمه محاسبيه تعلمك وش يصير في محلك وانت في بيتكم عن طريق النت اسمها
proflex
بس غاليه شوي الجهاز مع السي دي 15000 الف ريال لأول جهاز

وبعدها اي جهاز ب5000 ريال

ليش لان الحكمه في السي دي مو في الجهاز خخخخخ لاعبينها صح

بس طول بالك شوي علي
فيه مليون ومليون نظام محاسبي

أنصحك بجريدة المبوبه أشوف لهم إعلانات كثير وأسعارهم من 3000 إلى 5000

ونصيحة أخيره

لاتمون محلك من القهوه والعصيرات والنكهات دائما

لأسباب عده
توفرها تخلي العماله تلعب فيها
فمثلا انت تقدر تعرف دخلك من إستهلاك الأكواب والنكهات وكمية البن والقهوه

وكذلك من الشاي وغيره

بس لاتخلي العامل يوصل مرحلة انا سويت وخرب

خله عنده شوي عشان مايحاول يلعب في ذيله

واذا نقص انت تموله

ولاتخلي المندوبين يتحاسبون مع العمال خصوصا في الدونات والسندويتشات

خل لك جلسه اسبوعيا معهم في كوفي شوب
كلها نص ساعه
هات فواتيرك
وخذ دراهمك

(أنصحك في العماله النيباليه وأشرط في العقد اللغه الأنجليزيه والعمر من 25 إلى 30)
أسأل الله العلي القدير أن يفتح لك أبواب رزقه وأن يجعل الدنيا أخر همك ولامبلغ علمك وأن يجعل في مالك بركه


أخوك
طيار عاطل

[انتظرتك ولكن]

موفق بإذن الله ... لك مني أجمل تحية .