محل حلاقة..ارجوكم الفزعة

بنت سلطان · #1 (**permalink**) 01-05-2011, 02:00 AM

السلام عليكم ورحمة الله

الموضوع باختصار

انا خريجة ماتعينت

ومعي كم قرش جمعتهم منا ومنا

المبغ يقدر بحوالي 40 الف ريال
( أدري إنه بسيط لكن وش نسوي )

لذا فكرت بعد مشوار طويل من المناورات والمد والجزر أن أفتح محل حلاقه ..

-كم بيكلف المحل؟
اقصد من حيث أجار المحل+المعدات+الديكور+تضبيط المحل+ الرخصة ... إلخ

- هل رأس المال ( 40 الف ) يكفي ؟

-هل الأفضل استقدام عامل جديد والا نبحث عن عامل موجود وننقل كفالته؟

- هل المحل مشروع مربح؟

ملاحظة:
سأجعل أحد أخوتي وهو طالب في الثانوي أن يشرف على المحل ( هل يحتاج إلى خبرة خاصة أم لا ) ؟

نسيت أضيف إن المدينة هي حائل

والله يرزق اللي يرد ويوفقه وينوله اللي في باله

انتظر ردودكم

زهرة جدة · #2 (**permalink**) 01-05-2011, 02:10 AM

نفس الاسئله ياليت اللي عنده خبره يرد واللي اعرفه ان هذا المشروع ميكلف كثير ودخله حلو عشان كدا متحمسه له

ننتظر الردود وشكرا للجميع

فقدت روحي · #3 (**permalink**) 01-05-2011, 02:18 AM

أختي بنت السلطان

هذا رابط من منتدنا العملاق سوف تجدين دراسة أولية باسم العناية بالرجل

وراح تستفيدين منها بأذن الله

https://www.btalah.com/showthread.php?t=121734

دعواتك

وبالتوفيق لك

بنت سلطان · #4 (**permalink**) 01-05-2011, 02:48 AM

زهرة جدة

تشكرين على المبادرة بالتعقيب.

فقدت روحي

نشكرك على التعاون
لكن دراسة الجدوى الموجودة بالرابط مبالغ فيها !
حيث يبلغ رأس المال 159 الف

نريد دراسة جدوى بحدود المبلغ الموجود ..

على كلٍ
تشكرات كثيرات

وننتظر البقية

وش هالحاله · #5 (**permalink**) 01-05-2011, 06:17 AM

السلام عليكم ورحمة الله وبركاته

٤٠ الف ممكن تفتح محل كرسيين .. اما اذا اكثر من كرسيين ما اتوقع بتكفي طبعن اذا كان بس حلاقه .. بدون اي خدمات اخرى

طبعا التكاليف تعتمد علي نوع المشروع والخدمات المقدمه ... وبالنسبه للخبره هالنشاط بالذات مايحتاج خبره

تبي محصل كل شهر يمر عليهم وياخذ الملبلغ الشهري المتفق عليه مع الحلاقين .. ويخلص لهم امورهم من اقامات وشهادات صحيه وبطاقات عمل

هذي نبذه مختصره عن النشاط .. الحين راح نبدا بالتفاصيل

اول شي لازم تعدف ان الحلاقين ما يشتغلون بالراتب

نظامهم نفس نظام الخياطين ومغاسل الملابس تتفق معهم علي مبلغ كل شهر وتجيهم اخر الشهر وتاخذ منهم المبلغ المتفق عليه .. وهم يتكفلون بكل شي من مصاريف وايجار المحل وتجديد اقاماتهم
واذا فيه حلاقيه عندهم خبره وتقدر تنقل كفالاتهم افضل من الجدد

ايجارات المحلات عندكم تتفاوت من ١٦ الف الى ٢٥ الف وتعتمد علي مساحة المحل والمكان بس ما تزيد عن ٢٥ الف

بعطيك مثال عشان توضح لك اكثر

مثلا خذيت محل بموقع حلو ايجاره ٢٠ الف

بدفع اول شي ١٠ الاف قيمة الايجار ٦ شهور

١٠ الاف تقريبا تجهيزات للمحل
من سباكه وبويات وكرسيين يعني ديكورات تمشي حاله علمن ان اسعار الكراسي من ٢٥٠٠ الى ٣٠٠٠

اجرائات البلديه و الترخيص والفيزتين تقريبا ٦ الاف

هالتكاليف تقريبيه مهي دقيقه للمعلوميه

فتحت المحل وجو الحلاقين

طبعن اول شهرين تتابعهم وتشوف كم الدخل بالشهرين وتتفق معهم

تاجر عليهم الكرسي ١٥٠٠ الي ٢٠٠٠ بالشهر

وفيه بعض الحلاقين ياصل الي ٤٠٠٠ الاف طبعن هذي علي المحلات اللي عنهدهم خدمات في اي بي وعنهدهم قسم للمعاريس يعني نفس اللي بدراسة الجدوى

طبعا انت لك المبلغ الشهري اللي اتفقت معهم عليه وهم يتكفلون بالباقي

المكاسب اذا صملو العماله وصار عنجهم شغل ارباحه علي المدى الطويل

هذي هي الية العمل مع الحلاقين بشكل مختصر والاسعار التقريبيه للتكاليف

والعذر اذا نسيت شي او ماقدرت اوضح شي لاني اكتب من جوال

واي اسفسار او اي شي ما اتضح اطرحه والله يقدرنا نفيدك

بس انا من وجهة نظري اذا ما معك الا ٤٠ الف لا تحطه بهالمشروع لانه بتفتح محل بهالمبلغ علي قد امكانياتك

والعماله اللي بتجيبه من الجنسيه الباكستانيه او الهنديه وزباينهم هالجنسيتين قليل ولا يدفعون اكثر من ١٥٠٠

والحلاق اذا تبي تكسب فيه يبي لك اربع كراسي الي ست وقسم للمعاريس والناس تفصل الحلاقين من الجنسيه التركيه وممكن يدفعون لانهم عارفين شلون يكسبون الزباين وهي شغلتهم بصراحه

اذا فيه احد من اخوانك مستعد انه يتابع فيه مشاريع غير هذي افضل ولو ماكسب به ماراح تستنزف راس مالك اللي جمعته علي الفاضي ... فكر ... ومثل ما قلت اي استفسار اطرحه

والله يكتب لك اللي فيه خير

طلق الشرعبي · #6 (**permalink**) 01-05-2011, 09:39 AM

وعليكم السلام ورحمة الله وبركاته

اختي بجاوبك بحكم اني فتحت محل حلاقه قبل فترة بسيطه

اولا محل الحلاقه تعتمد ربحيته على اشياء منها ( الموقع - شغل العامل - الديكور . . الخ )

بالنسبه للموقع انا اشوف انه اهم عنصر لمقياس الربح والخسارة للمحل يعني حاولي يكون الموقع قريب من شقق عزاب او مجمع عوائل او شارع خمسين او ثلاثين بحكم انها شوارع تجاريه

اما بالنسبه للعامل اهميته تأتي بعد الموقع مباشره فأغلب الزبائن يفضلون التركي لانهم فاهمين بأمور الحلاقه ويدهم خفيفه وبعده المغربي و السوري والمصري اخيرا البنغالي .

ثالثا الديكور كل ماكان فخم كل ماكان افضل وارغب .

رابعاً محلات الحلاقه تنقسم الى درجات من ناحية الفخامه . حتى عند استخراج الرخصه يحددون البلدية محلك يندرج تحت اي درجه وهي درجه أ ودرجه ب ودرجه ج

درجه أ = اكثر من 3 كراسي حلاقه + ساونا + جاكوزي . . الخ

درجه ب = 2 كرسي حلاقه + ساونا + الاضافات البسيطه

درجه ج = كرسي واحد + بخار + الاضافات البسيطه

طبعا الدرجه ترتبط بالرخصه فقط يعني لو طلعتي رخصه أ راح تقدرين تستخرجين 4 تأشيرات يعني 4 عمال

اما درجه ب تأشيرتين يعني عاملين فقط

درجه ج تأشيرة واحده = عامل واحد فقط

فرضا استخرجتي رخصه درجه ج عامل واحد ماهو معناته ماتقدرين تضعين ساونا او جاكوزي . لالالا الدرجه مثل ماقلت ترتبط بأستخراج التأشيرات فقط يعني خدمات المحل مالها علاقه بعد استخراج الرخصه .

-كم بيكلف المحل؟
اقصد من حيث أجار المحل+المعدات+الديكور+تضبيط المحل+ الرخصة ... إلخ

بالنسبه لمحلي انا استأجرته على شارع خمسين وشهرياً 800 ريال وعلى فكرة المحل اخذته بلاط

يعني فاضي لابويا ولا سيراميك ولا اي شى . اللي عملته :

سباكه كاملة للمحل وتوصيل المواسير لكراسي الحلاق وتركيب سخان حار بارد

تركيب سيراميك من افخم الانواع للمحل

تركيب الواح جبسيه وانوار مضيئه وانوار خافته للزينه

تركيب ديكور الحلاق مع المرايا الجانبية + كرسيين حلاقه

تركيب ستائر متحركه ( مثل ستائر سيدار )

عمل تعتيق للمحل

شراء اشجار زينه واشجار معلقه بالسقف

عمل لوحة للمحل + ملصقات كتابية على زجاج المحل الخارجي

تركيب واجهة زجاجية للمحل ( السكوريت )

شراء كامل معدات الحلاقه ( من الى )

تركيب انوار زنون خارجية للمحل لاجتذاب انظار الماره

التكفله النهائية = 22000 ريال

- هل رأس المال ( 40 الف ) يكفي ؟

بالنسبه لرأس مالك يكفي وزياده بكثير بعد

-هل الأفضل استقدام عامل جديد والا نبحث عن عامل موجود وننقل كفالته؟

انا اشوف تتفقين مع عامل موجود داخل البلد ( اهم شى يكون حلاق ماهو بالاخير يطلع سباك ويلعب بروس الناس ههه على قولة اخواننا المصريين بتاع كله )

فيه اكثر من طريقه / تتفقين انك تاخذين من العمال مبلغ شهري محدد شهريا وهم يتكفلون بالايجار وفاتورة الكهرب و . . .الخ

او مربح المحل النص بالنص

او راتب شهري للعامل وهذي الطريقه ماانصحك فيها لاسباب عديده .

- هل المحل مشروع مربح؟

تبين الصراحه اختي . انا ندمت على مشروعي اقولك ليه . مشروع الحلاقه يعتمد على سمعة المحل بالدرجه الاولى بعدها تأتي العوامل اللي ذكرتها في البدايه . وثانياً ربح المشروع بطئ يعني ممكن يمر عليك شهرين او 3 شهور وانتي تدفعي مصاريف المحل من الارباح

اذا تبين نصيحتي . افتحي مشروع وجبات سريعه . لان مربحها سريع ومطلوبه بشكل يومي خاصه اذا كان الموقع يساعد . واسئلي وشاوري ولاتستعجلين

سأجعل أحد أخوتي وهو طالب في الثانوي أن يشرف على المحل ( هل يحتاج إلى خبرة خاصة أم لا ) ؟

انا انصح انك تسلمينه شخص بالغ نوع ماً حتى يكون له هيبه عند مراجعه الدوائر الحكومية وخاصه عند شراء حاجيات المحل يعني بالعربي الاجانب لو شافوه صغير راح يطمعون وراح ياخذ الشى اللي بــ 100 ياخذه بــ 200

ملاحظة : تقدرين تتفقين مع معقب ويطلع رخصة المحل + تأشيرة العامل بـ 500 ريال لايأخذ اكثر من كذا

وبالنسبه للرخصه تأخذ لها من شهرين الى 3 شهور على حسب نشاط المعقب
بالتوفيق واي سؤال حنا حاظرين

جنيزر · #7 (**permalink**) 01-05-2011, 02:17 PM

بظروفك الحاليه
اعتقد ولا اقول الغي الفكره لكن انتظري والنشاطات كثيير

عطر الشيخ · #8 (**permalink**) 02-05-2011, 03:57 AM

السلام عليكم ورحمة الله وبركاته

ارجوا الابتعاد عن الحلاق لانه حررررررررررررررام ولا يجوز انك تبدا حياتك في الحرام

اسال قبل فتح الحلاق

عزيز آلطآئي · #9 (**permalink**) 02-05-2011, 05:45 AM

صبآح آلخير أختي بنت سلطآن ,,,

ودي أضيف على كلآم آلآخوآن تجربتي آلشخصية آللي يمكن آنهآ رآح تفيدكـ .. !!

شوفي ..
آلحلآقين آلآترآكـ متشبع منهم آلسوق وصآروآ مآ يرضون بآلقليل عشآن آلشغل في بلدهم ارتفع وصآر حلو شوي ..
وغير كذآ مآ فيه أي تميز لو تجيبين حلآقين أترآكـ أو بآكستآنيين أو هنود
أنآ حلقت بدون مبآلغة عند أكثر من 50 حلآق في آلخبر وآلريآض وغيرهآ من آلمدن
مآ فيه تميز وآضح عند آلآترآك آلآ أنهم أخذوهآ بآلسمعة فقط لآغير ويمكن لو آختبرتيهم رآح تحصلين آلمعلمين آلصح منهم مآ يتجآوزون 5% فقط لآ غير
انآ بعد عنآء مع آلحلآقين وكل شوي قآط وجهي عند واحد يتعلم فيه
وجروح وتخريب ومآيعرفون شي اسمه تحديد .. !! نظآم جززز

بعد هآلمعآنآت رحت لحلاقين مغآربة وصرآحة آرتحت معآهم مرة من نآحية
[ مآيقرقون كثير زي آلآترآك - أغلبهم يديهم خفيفة بآلحلآقة - عرب ونتفآهم معآهم بآلرآحة - عندهم مميزآت آلحمآم آلمغربي وآلخطآت آلمغربية آلطبيعية - محبوبين من آلشبآب آلسعودي]

فأنآ انصحك بآلمغآربه لأسبآب كثيرة جداً
وبرضو تقدرين تسوين ديكور آلمحل ديكور مغربي وبكذآ رآح تكونين مميزة بحآئل آللي أعرف عنهآ كثير و زرتهآ كم مرة

ويآليت لو تزودين مبلغ آلتأسيس شوي عشآن يطلع محلك حلو ومميز ويكسب زبآين بسرعة ..

وأنآ والله لو أبي أفتح حلاق مآ رآح أفتح لغير هآلجنسية آللي مجربهم وحبيت شغلهم وشفت تميزهم ..

ولآ تغفلين على أنك تجيبي "معلمين" مو مغآربه وبس
لو تعرفين أي احد توصينه وهو رآيح للمغرب يتفآهم مع كم حلآق هنآك وهم مآيصدقون يجون آلسعودية بس

بس انتبهي
لآ ترسلين أخوكـ آللي بآلثآنوي يروح للمغرب ولآ عآد يرجع لحآيل

وآلله يوفقكـ يآرب ويبآركـ لكـ في مشروعكـ
وإن شآء آلله تكونين سيدة أعمال في حآئل عن قريب