دلونا على السوق
 

ممكن تستفيد بمجال تخصصك على حسب تخصصك وانت ذكرت تخصصات كثيره

لكن ماهو شرط انك تعمل في مجال تخصصك لان التجاره على قولتهم شطاره وفن وحرفه

شف وش ميولك وش الشي الي تحس انك تبدع فيه والشيء الي مهتم به وتتابعه واعمل فيه

مثل شخص يعشق الالكترونيات يفتح محل لبيع واصلاح الجوالات او الحاسب

شخص يحب الطبخ يفتح مطعم

شخص مهتم بالاراضي ويعرف خبايا العقار ويتابع اخباره وعنده علاقات يفتح محل عقار ......... الخ

شكراً لك بزنس مان

يعني هذه التخصصات نضرب بها عرض الحائط ......حتى لا الأفكار شحيحة فيها معقووووووووول ما تنفع بالحيل لدرجة إننا ننسى إننا درسناها ..ننسى إننا تعبنا فيها ..ننسى أن أعمارنا ذهبت في تحصيلها ....معقول أدخل سوق العمل مثلي مثل إلي ما خذ الإبتدائية ......نريد نستفيد من هذه التخصصات في غير مجال التعليم

كيف نستفيد من هذه التخصصات ؟؟؟؟؟؟

أعتقد أن لهذا السؤال .....جواب يشفي الغليل ........لكن أين أجده لا أدري؟؟؟؟؟؟؟؟

السلام عليكم ورحمة الله وبركاته

كيفك اخوي اسمحلي انت من نوع اللي يبي يكسب ولا يبي يفكر ولا تزعل مني
ياخي انت لا تقول لا هذي ماتنفع لا هذي ماهي تخصصي (معقوله ادخل السوق مثل اللي ماخذ الابتدائيه) ايه معقوله وش المشكله ووشفيه راعي الابتدائيه بالعكس نجح وصار مدخوله اعلى من اصحاب الجامعات فمادام انك تقدر تسوي مشروع في غير تخصصك سو ياخي وصير مثل راعي الابتدائيه
ياعم الاجانب اكلو الاخضر واليابس
وهم ما يعرفون حتى يقرون ويكتبون
وماله داعي نحدد من هم الاجانب
(سمعت شو هاض يازلمه ابو مازن وابو مصطفى عم يعملوا مشاريع بالمليارات
وابن البلد يازلمه كاعد في البيت يكول بدو متل تخصصه)

وبعدين ليش ما تبي التخصصات التعليميه
اشتغل مدرس خصوصي ولا حسنين ومصطفى ومتولي والزول حزيفه وعبد الغادر احسن منك؟؟
ترى مدخولهم اليومي ما يقل عن 200 ريال وفي ايام الاختبارات يروح دوامه مواصل
من كثر الزحمه اللي عنده والله اني اخبر واحد من اخويانا ايام الدراسه جاب عنده مدرس
الساعه 2 بالليل ولا خلص الا اذان الفجر وعلى المدرسه على طول ودفعوله 600 ريال على مثل تخصصك كيمياء وفيزياء
والشعب الجامعي
متسدحين في القهاوي جيب شيشه وهات معسل والمباره الفلانيه واللعب الفلاني الى الفجر


اسمحلي على صراحتي يمكن تجرحك لاكن والله مقهور من هالاجانب وشبابنا متسدح في البيوت



هذا رايي وقلته لك بصراحه
فإن اصبت فمن الله وحده , وإن اخطأت فمن الشيطان ومن نفسي

تحياتي

يحيى صالح

اشكرك على الرد المميز وانا اشاركك نفس الكلام واحب اضيف

انة المرحله الدراسية تعتبر مرحلة تأهيلية لبداية مرحلة عملية

يعني

ابتدائي - متوسط - ثانوي - جامعة

اربع مراحل تأهيلية بعدها نجي للمراحل العملية

* نادر من يحصل عمل مطابق للتخصص لكن

ما يمنع انك تخوض جميع المراحل العملية

وبدايتها براتب قليل وحبة حبة يرتفع وتضبط الأمور

شوف معاي هذا المثال وااسف فية على الأطالة

نمثل الأعداد با المرحلتين

ونتخيل هذي الأعداد هي المراحل التأهيلية

1-2-3-4-5-6-7-8-9-10

مستحيل نقول

1-2-5-8-10

لأننا اذا جينا لحق التسلسل ما عطيناه حقه

واللي وصل للرقم 10 معناته معاه الجامعة طيب الحين نجي للمراحل العملية

11-12-13-14-15-16-17-18-19-20

الرقم 11 يمثل موظف جديد والرقم 20 موظف قديم خبرة 10 سنوات براتب اعلا نفس الشهادة

لكن عندة خبرة بس حبيت اوضح انو لابد من التسلسل الوظيفي ولا تطمح للراتب العالي وانت جديد

عندك شغلة ثانية

اللي هي لما تجي لشركة وانت متخرج من ثلاث سنوات مثلا وما اشتلت في اي شركة ولا مؤسسة بيسئلك معقولة ثلاث سنوات ما اشتغلت بتقول ما حصلت عمل يناسب تخصصي
بيقول لك خل اوراقك عندنا وان شاء الله خير

لكن اذا انت جامعي وقدمت على شركة ومتخرج مثلا من ثلاث سنوات ومعاك خبرات ما تمس بتعليمك بأي صلة بيسئلك انت درست هذا التخصص واشتغلت بتخصص غير مثلا درست محاسبة واشتغلت تسويق ليش ما اشتغلت في نفس التخصص بتقول له والله ما حصلت عمل يطابق تخصصي وقلت خلني اكتسب خبرة التسويق اضافة لتخصص الأساسي دايركت بيقول الموظف بخاطرة هذا يبي يشتغل وما عندة لا دلع ولا غيرة .


كنت بظيف سطرين على كلام الأخ يحى صالح لكن شكل الموضوع دسم ومسكت خط

ااسف على الأطالة وتقبلوا مروري

أخي الاعتماد على التخصصات فقط لا يسمن ولا يغني من جوع
ولكن اعتمد على عقلك في فتح مشروع يحتاج إلى مبلغ قليل وله دخل جيد
وخاصة سوق الخضار
أتمنى أن تجربه وخاصة التوصيل للمنازل
وبالذات أصدقائك أعرض عليهم توفير الخضار والفواكه إلى المنزل وبالسعر ذاته
وفقك الله

السلام عليكم ورحمة الله وبركاته



حياك الله أخوي


ليش بارك الله فيك ماتقدم على برنامج الابتعاث الحكومي ؟؟ الماجستير؟؟


أسمع عن دوره أمنيه عقب الجامعه ست او تسع شهور ناسي بالضبط ، هذي ياغالي تطلع منها تصير ملازم
.............


الله يفرجهالك ويرزقك وكل مسلم انشالله

الله يجزاكم خير وما قصرتوا ........لكن أحب أعرفكم أني أنا فتاة والأصح أننا فتايات في التخصصات المذكورة ......صار لنا أكثر من عشر سنوات متخرجين ودنا نستفيد من شهاداتنا ......حتى لو بفكرة عمل مشروع صغير ...لكن نستفيد مما درسناه ....والله يجزاكم خير لا تقلون دروس خصوصية لأن الناس هذي الأيام لا تهتم بالتفوق في الدراسة......

الله يهديك كان بينتي من اول انك بنت

وانا والشباب ماقصرنا استلمناك الين اذنتي :cool:

والله دامك بنت وشهاده جامعيه امممممممم


عندي مشروع لاكن غريب شوي ويمكن صعب شوي بعد
ويبيله اعلان قوي شويتين
لاكن راس ماله مش كثير
واتقد ان فكرته جديده على مجتمعنا واكاد اقول مجتمعنا الخليجي


بقول الفكره ولا تضحكون هذا ماجادت به بنات افكاري


وش رايكم تفتحون مركز مثلا نسميه المراجع العلميه نفس طريقه الدروس الخصوصيه لاكن بشكل مميز يعني مثل ما يقولون المثال يقرب المقال

هذي بنت اسمها نوره :Looking:<<< هذي نوره
وخويتها اسمها ليلى :d <<< هذي ليلى


المهم جات الدكتوره في الجامعه او المحاضره وقالت لهم سوولي بحث عن كذا كذا
او بكره عندك اختبار عن كذا كذا او اي شي يحتاج له الرجوع الى شخص خبير او كتب معينه ... الخ

المهم جات نوره :Looking: دورت في الانترنت ودورت عند زميلاتها وعند جيرانها وكل اللي لقتها هي افكار مستنزفه ومبتذله وقديمه ونوره :Looking: تبي تسوي شي جديد تبي تتميز
او على الاقل تبي شي جديد ماهي مثل بعض البنات والشباب يجون اثنين ينزلون نفس الموضوع من النت ويجون مبسوطين عند المحااضر ولا عي نفسها وفي النهايه صفر

المهم جت نوره :Looking: عند خويتها ليلى :d وهي خايفه البحث باقي عليه يوم واحد بس
وقالتلها : ياليلى والله تعبت وش اسوي ما فراسي شي ولا عندي وقت.

قالت ليلى (وهي قاعده تتفرج على نور ومهند ومتحمسه مع المسلسل) : ياشيخه بسييطه كلها نقزه نص ساعه ساعه عند مركز البحوث النسائي اللي جنب الجامعه ونجيب لنا ذاك
البحث اللي اذا شافته الدكتوره تعطينا الدرجه الكامله دبل.

قالت نوره :Looking: (وكانت ماسكه كتب تدور فيه ويوم سمعت كلام ليلى نزلت الكتاب وفتحت فمها معلنة دخولها مرحلة التفهيه من الذي سمعته ) : انتي تتكلمين من جد معقوله فيه مكان يسويلي بحوث واجيه اطلبه بحثي واخذه بالسرعه هذي .

التفتت ليلى :d على نوره :Looking: وقالت لها : انتي بالله قاعد كل يوم على النت وعلى التلفزيون ولا قد سمعتي عن المركز هذا ، تحسبين فاطمه وسوسن ماخذين درجات حلوه من روسهم وشطارتهم الله يخلي مركز البحوث النسائي ، ورجعت تبي تتابع المسلسل
وتذكرت شي والتفتت على نوره :Looking: بسرعه وقالت لها ليلى : حتى لو تبين تدرسين وشلون تسوين بحوثك او تبين بحث ولا تبين تشترين الكتاب ومن مكتبه في ثانيه ومشاوير
هم يوفرون لك دورات وشلون تسوين بحث وعندهم قسم فيه كتب عن طل الاقسام ومكان هادي مافيه رجه تقدرين تسوين البحث اللي تبين لا وحتى لوتبين تستفيدين من النت
فيه عندهم واير لس تقدرين تجيبين الابتوب وتدورين على اي شي وماتدفعين الا مبلغ رمزي اول مره تجينهم لا وعندهم بطايق عضويات vip في اي بي لك خصومات وهدايا وعندهم كوفي شوب صغير في اكلات خفيفه ومشروبات يعني مركز متكامل حتى لو ماتبين بحث تقدرين تروحين تقرين وتقضين وقتك فيه وباسعار رمزيه
وهم يقدمون لك المعلومات اللي تبينها في اي تخصص

وعلى فكره ترين اللي هناك كلهم سعوديات ودارسات نفس التخصصات
يعني تقدريتن تتفاهمين معهم باللي تبين وهم ما يقصرون .









فكرتي يمكن حلوه يمكن غبيه عاد انا قلتها وبكيفك يمكن اكون غلطان يمكن في مراكز كذا لاكن مما قد سمعت عنها لا للشباب ولا للبنات وهذا الدليل على انه يبيلكم اعلان قوي

حبيت الطف الجو شوي وسويتها لكم على شكل سيناريو خفيف :)
عشان لو ما عجبتكم الفكره على الاقل تتقبلونها نسبيا


حاولت افيدكم باللي عندي لكم اجمل تحيه

والسلام عليكم ورحمه الله وبركاته


اخوكم
يحيى صالح