ماهو نصيبي يازمن..ولا الله كتبلي فيه فال
راح وتركني واجتمع (حزني) مع القلب (الصويب)
ونّيت من شوقي عليه وانا ادري بوصاله محال
وضلوع صدري يازمن تبكي واعياها النحيب
ازريت اداري دمعتي..سالت ومعها (الحلم) سال
شفته قبل هاك السنين ماكنّها الاّ من قريب
في بيت جدّتنا نطيش .. نسوّي انواع الهبال
اصيح له بصوتي تعال..ومن كلّ كلّه لي يجيب
ماكان يناديني ماغير امّ الحلى وامّ الدلال
وماكنت انا الاّ طفلتن بعيونها (العالم غريب)
من غيرته يشدّد عليّ ..(لاتلعبي وايّا العيال)
ومن الشقاوه اقهره اقول له (ماهوب عيب)
عشق الطفوله يازمن..اصفى من الماي الزلال
وانقى من قلوب البشر..مايدخله شكّن وريب
اعيش لاجل يعيش بي ..واتذكّره بسود الليال
ارسمْه قدّامي بدر ,,اتأمّله قبل المغيب
ولاغاب وشمسي اشرقت.. اتخيّله بجنبي ظلال
من وين ما امشي يظلّني ..استشْعره بوقت اللّهيب
لبيه ياسيّارته لبّى شماغه والعقال
ولبّى الطناخه والغلا ..عزّ الله ان جرحي عطيب
ياربي ترزقني الصبر ..ياللي عليك الاتكال
تغسل ذنوبه من برد..بالجنّه الملقى يطيب
تجمعني فيه بجنّتك..ويكون لي وحدي حلال
واسقيه من (نبع الحنان) اللي من عروقي( سكيب)
بقول واسمحلي يابوي..عقبه انا عفت الرجال
والله ما ارضى به (بدل).. لو كل شعره بي تشيب