بـي جــرح مــن كــم شـهــر مــاودي أجــهــر بــه !!!

عاشق الشمس · #1 (**permalink**) 15-12-2010, 12:12 AM

مدري ليش أحس هالنص قريب مني حيل من أول ماقريته !!!
أتركم مع هالابداع : -

للشعر حربه مدام إن للقلم حربه
تثّر على الشاعر وتثّر على الغاوي

يلجا لها .. لا فقد شي يتصبر به
ولاّ لامنه تعذّر دائه مداوي

يبعد عن العالم اللي ماتفكر به
ويغيب في الشعر عن ماضيّه الخاوي

يدور لجرحه اللي ما يشهّر به
علاج يغنيه عن قاري وعن كاوي

بي جرح من كم شهر ما ودي أجهر به
خايف أحس الرفيق وأفرح الواوي

أوضح من الصبح .. وأغمض من مسا الغربه
وأغزر من البحر وأوسع من فكر راوي

وأقرب من اللي يبيك وما تبي قربه
وأبعد من الشمس لأطمن سطح متساوي

أيسر من الأبتسام .. أعسر من الكربه
أهيب من الذيب في قلب وعقل .. شاوي

أنساه مع كل صبح بسجّه وطربه
وإذا أولج الليل فالصبح الاّ هو ضاوي

وأبلش .. بقوّاي عزمي في وجه حربه
الى غدا الليل لجموع العرب طاوي

لأن طيحة الذرب من همّه ماهي ذربه
إن كان ماني قوي !! بعيش متقاوي

مادامني ذرب .. موتي داء أو ضربه
ما أصبح غدا هم .. لو أمسي عشا عاوي

الهم ذا .. جرح من رجالٍ أفخر به
ماهوب هم الهواوي من جفا هاوي

لو قال أبي من دَمِك شرّبته وشربه
من طيبه أفداه .. وآنا ماني فداوي

بروح في دربي وبيروح في دربه
والجرح ذا اللي حصل لي من جهل غاوي

في صدر رجّال ماهو في طرف قِربه
يعرف من يعادي .. ويعرف من يخاوي

تقديره إن جا صدر مجلس .. شحم ثربه
فنجال بنّ اليمن .. شلقة كسر جاوي

الى قلط !! ما أبي عذْر يتعذر به
وإن دبّر الله يوصلْه اللي هو ناوي

عروق راسي من التفكير مضطربه
محتاج راحة فكر من عام متهاوي

محتاجها حاجة الأعشاب للتربه
أو حاجة أغلى الكلام لراوي وحاوي

لـلـشــاعــر / مشاري المري ..

الشعر والنثر