موظفتين سعوديات ومدير سعودي ...هل اقدر ارجع حقي والا فات الاوان؟؟؟
 

[align=center]
بسم الله الرحمن الرحيم




انا عضوه جديده في المنتدى ...وعندي مشكله ابي حلها +مشكلة مديرتي .....




المهم انا كنت اشتغل في معهد إداريه كرف مو صاحي وغثى بنات :mad: ولا زود على كذا مدير نفسيه ...طبعاً اشتغلت سنتين الا شوي في المعهد على راتب الف ريال فقط لا غير مع ان المعهد يدخله مردود فوق الممتاز وطبعا قادرين يدفعون للموظفات أكثر من هالراتب بس مستغلين حاجة البنات للوظائف ولا زود على كذا يالله ينزل بعد اربع شهور او شهرين والاجنبيات على طول اول باول من يبدا الشهر الميلادي ينزل ليش؟لانهم اجانب ومساكين وصاجينا بالسعوديين تجار ومدري ايش مايحتاجون ...ومره اعترضنا نبي رواتبنا وش قال المدير :اللي محتاجه عطوها !!!!!!!! كانننا نطر يبي يحرجنا يعني ؟؟!! ...المهم قلت يمكن الراتب مايسوى بس الخبره واكتشفت انهم ماسجلوني بالتامينات يعني خبره مافي ...لا طلت خبره ولا راتب ....ابي اسوي شي كيف ارجع حقي ابي الخبره سنتين من عمري ضاعت على الفاضي مستحمله غثا المديرررر كل يوم طالع له بموال والبنات كاننا نطر منهم دفعنا ودفعنا يبون يسوون الللي يبون بدون حسيب ولا رقيب والمعلمات قسما بالله كل يوم مشاكل يتطاقون بالسكن ويجون يفرغون طاقتهم عندنا تعبت تعب كل يوم بلوه هذا غير المستخدمات وحركاتهم البايخه يافتنه يامشاكل مع السواقين هذا غير السواق المغزلجي ...



المهم ابي الخبره كيف آخذها؟؟؟؟ علماً بان مديرنا مسجل بنته على انها تشتغل معنا بالتامينات والله ماعمرنا شفنا وجهها يعني قاعده ببيتهم مرتاحه وتجيها خبره واحنا نكرف ببلاش ...ليش؟؟
وشي ثاني انا قدمت استقالتي لمديرتي المباشره ووافقت ماعلمت المدير اني بستقيل ولا هي قالت له يمكن يقول اني ماقدمت استقالتي له او شي كذا كانقطاعي عن العمل بدون اذن ومعي الخبره اللي تثبت اني مشتغله عندهم من... إلى....(الخبره من المعهد وعليه الختم وتوقيع مديرتي واللي اعرفه اذا ماسجلت بالتأمينات ابل هالخبره واشرب مويتها يعني مالها داعي)



الشي الثاني اللي هي مشكلة مديرتي قدمت استقالتها للمدير المهم هو اصلا قايل لها قدمي استقالك والعذر انها موقعه عقد تشتغل مدرسه(يبي يتخلص منها لانه يبي وحده يمشيها على كيفه ماترفض له طلب قصدي يطلع شهادات بالهبل للي يعرفهم عشان يثقل ملفاتهم وشغل حوسه يعطي برامج من دون تراخيص وكل شي بوجهنا ومشاكل مع المؤسسه بسبة هالبرامج ...المهم قدمت استقالتها وبعدين اتصلت عليه تبي الخبره وش قالها النفسيه ....اصلا انا ماوافقت على استقالتك!!!! (أنا شايفه رسالته بنفسي اللي يطلبها تستقيل) قالها اول شي تعالي واذا جت بديلتك دربيها وبعدين قدمي استقالتك يعني ماراح يعطيها اخلاء طرف (على فكره هو جايب بديله ومعلمتها جزء من الشغل اللي هي تسويه باقي الشغل اللي انا مسؤله عنه ومعلمته للموظفه الثانيه بس هي بعد استقالت ورحت للمعهد عاساس اعلمها بس اغلبه موجود بالتعاميم تقدر تطلع عليها يعني مافيه شي غامض )
ابي اسال هل هي تقدر تاخذ اخلاء الطرف والخبره غصب عنه؟؟؟بدون ماترجع للمعهد؟؟؟



المدير للمعلوميه سعودي ....


اتمنى تفيدوني وكلي ثقه باعضاء منتدى البطاله .....





[/align]

والله موضوع ماينسكت عليه الصراحه انا ماعندي خبره بالسوالف هذي لاكن كلمي رجل اخوك او ابوك او احد من اقاربك يروح للادراه نفسها ويتفاهم معهم واذا مانفع روحي لديوان المظالم يجبون حقك غصب
الله يوفقك دنيا واخره وان شاءالله تاخذين الخبره

مشكوره عالرد اكيد راح الجأ لأهلي بس ابي اعرف الإجراءات للعلم انا طلبت من موظفه من القديمات تسأله هل انا مسجله بالتأمينات والا لا ومارد عليها (يعني عطيته فرصه)...أبيه يدري أني مهتمه بهالشي وللمعلوميه أغلب الموظفات اللي عنده ماسجلهم بالـتأمينات ...إذا قدرت اتواصل معهم ونرفع شكوى جماعيه ...ابي الاجراءات ولمن ارجع ...
بالاضافه لاستقالة مديرتي...

شوفي اختي

هل وقعتي عقد أول ماتوظفتي ؟؟

اذا كان معاك عقد تروحين للتأمينات الاجتماعية ( قسم التفتيش ) وهم يجيبون لك حقك

طبعا تطلع لجنة تفتيش ع المعهد ويغرم ويخالف ويوقف عن الاستقدام لمدة 5 سنوات

الكلام اللي اقوله لك من واقع تجربه شخصيه مريت فيها قبلك وحسبي الله ونعم الوكيل في القطاع الخاص ..

مشكور أخوي الله يوفقك وين ماتروح اي موقعه عقد بس مامعي نسخه بس اذا حصلت فرصه رحت للمعهد ونبشت الين ماالقى نسخه ...

سؤال وش دخل الاستقدام فينا؟؟

الله يكون بعونك , المفروض تكون عندك نسخه من العقد الوظيفي وقبل لا تقررون بالانسحاب كان تكتكتو ابسطها ودي افتح لي حساب في البنك الفلاني وطالبين مني تعريفه كوني موظفه
وماضاع حق وراه مطالب

والله بجد مشكلة ومنه لله ويارب تلاقي اللي يفيدك

معروف ان القطاع الخاص يقدر يطلع تأشيرات للاجانب ويآخذون عليها فلوس

والتأمينات توقف الاستقدام عنهم كنوع من العقاب لهم ..

انا حبيت اوضح لك اللي بيصير لهم اذا قدمتي شكوى , وابغى اقول لك شي

اذا قدمتي الشكوى بيقولون لك التأمينات ( حاولي تحلي الامور بشكل ودي واذا مانفع أرجعي لنا واحنا نتصرف )

طبعا انتي روحي لهم واذا وافقوا يحلون الامور بشكل ودي يتم تسجيلك ( بأثر رجعي ) وبس ..!! :Thumbs:

العقد موجود في الاداره بس مادري تغير مكانه والا لا ...انا رايحه انشاء الله يابكره يالاسبوع الجاي وبشوف ان لقيته والا اتوقع الخبره تغني عن العقد كاثبات عن المده اللي اشتغلتها ...


كلي امل في الاعضاء الكرام ومشكوره على تفاعلك معي والله يوفقك


الله يجزاك خير عالتوضيح والله تعبتك معي ...تدري الوضع هناك للموظفات السعوديات مزري يعني يمكن تقولون ماعليك منهم اهتمي بنفسك مااقدر قسما بالله يتقطع قلبي على زميلاتي والمعلمات السعوديات من القهر ...أكيد هو بيحلها ودي ويطلع باقل الخسائر ...دايماً يسويها اهم شي نسكت وخلاص ...تخيل مواقف يسويها معنا تقهرررر ...يعني مافي ادنى مراعاة اننا بنات ولنا سمعه.... في مره طالبات المعهد كتبوا في منتدى للمحافظه يسبون فينا سب اللي احنا الموظفات ونظام المعهد اللي هو طبعا نظام المؤسسه اللي ماشيين عليه هذا غير الكذب وتطاولوا علينا بشكل ........ مشرف المنتدى قال لصاحب المعهد تبي نحذف الموضوع؟؟؟

قال :لا خله نبي نشوف الشكاوي والاقتراحات عشان نطور المعهد....الموضوع سب فينا بالاسامي وتشويه سمعه ...يعني لو صدق اقول جزانا ونستاهل ماقالوا شي من فراغ.... تخيل احد يحش فيك ويطلع سوالف وبهار وانت ساكت والمدير مستانس يقول ردوا عليهم معجبه الوضع وطنشنا ولا سوينا اللي يبي يبينا نتناقر معهم بالمنتدى والله ماوصلت وننزل لهالمستوى ...


...الله عالظالم بس...

^^^^^

ربنا كريم وبيعوضكم إن شاء الله ..

أجل بدون حل ودي قولي لهم أبغى حقي ويجيبونه غصباَ عن انوفهم ..

اللي يقهر انكم بنات ماتقدرون تاخذون حقكم بس حاولوا ولا تسكتون حن حقكم ابدا ..

بالتوفيق ..