21-06-2011, 05:23 AM
|
|
Guest
|
|
تاريخ التسجيل: Mar 2011
المشاركات: 1,601
معدل تقييم المستوى: 0
|
|
وش أصلك ؟
هالحين كلما تعرفت على أحد جديد .. لازم يقفز هالسؤال .. وش ترجع ؟ ووش أصلكم ؟
ليش عندكم ضروري كل واحد يعرف شجرة العائلة بالكامل إنطلاقاً منه ووصولاً إلى حد آدم ؟
طيب اللي ما يهمّه يحفظ هالمشوار كله ..
يعني أنا أمثّل نفسي لوحدي .. تصرفاتي و أعمالي و فلوسي و كلي على بعضي تخصني لوحدي .. ليه لازم أبقى مسجّل ضمن أملاك عائلتي و لازم تصرفاتي تكون خاضعة لستنادارد مُعين خاص بالعائلة هذي ؟
طيب .. ضحك علي ابليس و عملت عملة مهببة .. ليش يجون أهلي إما ينصروني و يعينوني على المنكر و يظلمون الناس ؟ أو الأدهى و الأمر من ذلك .. أنهم يتبرون مني و يقولون لي أخرج من تحت مظلتنا .. فأنت رجيم .. و تفشّل بعد ! 
لو طلبت مثلاً حذف اسم العائلة و قلت أبغى أحتفظ فقط من باب المحافظة على الاجراءات الرسمية .. باسم أبوي و جدي و بس كفاية .. ليه يُعتبر هالشيء عيب ؟ أو يؤخذ من باب أني منحرج من أصلي أو عائلتي ؟
شغلة ثانية ..
الآن .. كل العوائل و القبائل .. مثل ما فيهم الصالح ، فيهم المهوب صالح .. سواءً حسب ستاندارد العائلة أو القبيلة نفسها أو حسب الستاندارد العام .. ليه يصرون الناس على الفخر و التفاخر بالمسمى هذا و بصفات و عادات و تقاليد هالعائلة أو القبيلة .. متناسين في نفس الوقت أنه لا بد أن كل ناس لا بد يكون فيهم على الأقل أحد مُخل بالمقياس المُخصص للأشياء الكويسة و مع ذلك يستمرون بالتفاخر بالأشياء الكويسة و كأن الأشياء الموكويسة ما صارت أبد ..
نُقطة ثالثة ..
الحين وقوعي تحت مظلة الإنتماء الإجبارية هذه ، يجعلني خاضع لمقياس الفضيلة الخاص بهذا المُجتمع المُصغر ، و شيء أكثر من طبيعي أنو لما أتصرف تصرف يخالف هالمقياس إما أكون مُعرض للضغط و التدخل من الأطراف الواقعين تحت نفس المظلة بحجة أني قاعد أخالف المقياس المُقدس أو حتى مُمكن أن يتجاوز التدخل مرحلة مُحاولة التأثير على الرأي إلى تغيير الرأي بالقوة ..
طيب وين راحت حريتي هنا ؟ و ايش بقيت أملك أصلاً دام كل شيء يخصني هو أصلاً مشروع قطة بين البقية أو كبار وجهاء العائلة و القبيلة .. و الإتجاه العام لهم يحرص كل الحرص أن نكون كلنا نسخة من بعضنا مع فتات بسيط جداً من الحرية .. و دام أني صَفَيتْ على الفتات بس .. ليه أتبجح و أفتخر بالانتماء هذا و أعتبره مصدر قوة و أني انسان حر و مدري ايش .. و الواقع يقول أن المجال المتروك لي التحرك فيه هو شيء لا يذكر إطلاقاً و المُصادرة لحرياتي تشمل حتى طريقة لباسي أو اختياري لشريكة حياتي أو حتى من أخالط أو لا أخالط من الناس .. و كل حاجة ..
نرجع للبداية ..
نفرض أني ما أعرف شجرة العائلة كلها ..
هل هذا يخليني انسان درجة ثالثة ؟
هل مطلوب مني علشان أنجح في اختبار الدماء الزرقاء .. أن أكون مُنحدر من سلالة بقيت ملتزمة بالمواصفات و المقاييس و لازم أني أحفظهم كلهم عن ظهر قلب ؟
هل معقول أني أعلم عيالي و أقول
كلكم لآدم و آدم من تراب
و لا فرق بين عربي و أعجمي إلا بالتقوى
و إن أكرمكم عند الله أتقاكم
و لا تزر وازرة وزر أخرى
و بنهاية المطاف .. أقول .. ابعد عن هذول و هذول و هذول و اتركهم عنك تراهم مو من مواخيذنا ، و هذول فيهم كذا .. و الثانين فيهم كذا وهذليك مضيعين أصلهم .. و و .. ؟
موضوع الأنساب ، و الإنتماءات .. أحسه مآخذ حيّز كبير و مبالغ فيه جداً .. و ما أشوفه يستحق الحجم هذا من وجهة نظري ..
وقلت أكتب و أشوف وجهات نظركم يمكني غافل عن أشياء و تعلموني عنها ،،
|
العرض الشجري
