بنات دقو علي حافز اليوم ..!!
 

السلام عليكم
بنات قبل شويه دقت علي وحده تقول انها من الموارد البشريه وتابعه لحافز مركز طاقات مدري ايش وحكت اشياء كتير بس وربي مافهمت حاجه خخخخ وحددت لي موعد بكره عشان مقابله وقالت احنا ندورلك على وظيفه في قطاع خاص مدارس او مستشفيات او مصانع .. وسالتني عن الموعد اذا يناسبني او لا
بس ابغى اعرف مين دقو عليها وكيف كانت مقابلتهم وايش طلبو منهم؟

السلام عليكم اختي
شوفي ياليت تتصلين في استفسارات حافز وتسألين
قولي بدت المرحلة الثالة ولا لسى لأن فيه ناس تستغل
هالمواقف في اللعب والضحك على الناس وإذا قالوا لك
انها بدت تقدرين تروحين وإذا لا فاعرفي إنها ماعندها
سالفة لان صارت لكثير ولما اتصلوا يتأكدون طلعوا
ناس يكذبون والله يوفقك أختي ويرزقك من واسع فضله

ماعتقد انها تكدب لانو عرفت اسمها كامل وصندوق الموارد البشريه معروف المبنى حقهم
وبعدين اطلبت مني اي بيانات شخصيه فقط سالت عن الموعد اللي يناسبني عشان مقابله الشخصيه
لو بتكدب كان ماعرفت اسمي ول عرفت على نفسها ولا موقعهم :)

الدنيا بخير وبلاش نظره التشاؤم هادي وسوء الظن بالعالم .. بعدين ماراح اروح لوحدي راح اروح معاي محرم يعني مافي خوف من هالناحيه :)

الله يسعدك أختي وتلاقين الوظيفة اللي تناسبك
بس انا مو مسألة نظرة تشاؤم لا والله بس حبيت
انصحك لان فعلا هالشي سبق وصار لبعض البنات
ولا ماكنت راح اقول لك عنه
بالتوفيق

طيب ربي يوفقك بس ليش انتي زعلاتي
نصحيته لك هذا يدل على خوفه عليك
مو نظرة شوام وكلناا سمعناا قصص كثيره
عن التلاعب وشلون فيه ناس ضعيفة نفس
تتحاول تستغل فرصه عشان تحقق شي باانفسهم
واتواقع القصص الى حصلت واقعيه وذكرت من مصادر رسميه
اختي الفاضله بالعكس كلنا نتمني لك التوفيق اول شي
ونصحيه اخويه اهم شي يكون المقابله بنفس المبني

انا مازعلت بالعكس
بس ما احب حد يخوفني وبعدين ماقلت شي انا مجرد بررت وجهة نظري
ويمكن فهمتو علي غلط انا اعتذر

حلمي التدريس كلامك منطقي جداً جداً الله يحقق امنيتك يارب

احنا خرجنا عن الموضوع
انا ابغى اي وحده اتصلو وراحت المقابله قبلي عشان اتطمن بس

اتمنى لـك التوووفـيـق

شكرا لكم

كالعاده لاجواب للاستفسارات المطروحه :)

انا عن نفسسسي محد دق علي انتي تووكلي ع الله وروحي الله يرزقك بالوظيفه اللي تتمنينها يارب

يمكن انتي اول وحده دقوا عليها ^_^

الله يستر
انسدت نفسيتي شكلي بطنشهم

هما كده والا كده يبغوها من ربنا
عشان ياكلو الفلوس ويقولو سوينا اللي علينا وهما مايبغو يشتغلو
واخر حاجه قالولك خدي وظيفه مدري من فين مطلعينها ومتاكدين راح ترفضيها وهوا دا المطلوب عشان يلهفو الفلوس ببطنهم تقول راح يصرفوها من جيوبهم

حسبي الله ونعم الوكيل فيهم بس

صصصصصصصصصصصصصصصصصصصصح يابنت استهدي وروحي ماراح تخسرري شي

بالعكسس يمكن بعدين تندمين لاسمعتي وحده راحت يمهم نصييحه روحي

الله يوفقك ماعندي فكره ولا كنت افدتك ياقلبي

خير ان شاءالله
راح اشوف اخرتها معاهم

شوفي أختي دلع جدة والأخوات والأخوان الباقين

بخصوص الأتصال الي جاك اليوم أحب أوضح

بأن جميع بيانات المتقدمين على حافز بأستطاعة القطاع الخاص الي يبحث عن موضفين وموضفات

الأطلاع عليها والأختيار منها هاذي خدمه مقدمته لهم وزارة العمل عشان مايصير لهم عذر

ويقولو جيبو لنا موضفين وموضفات بالأضافه الى أن وزارة العمل تبلغ بشواغر من قبل

القطاع الخاص ويتم أرسال المتقدمين اليهم


لاكن بالنسبه للأتصال الي وردلك اليوم ويقولون من حافز حافز لم يتصل بأحد حتى الأن

وأنا أعتقد بأن المتصلين بكي اليوم أحدى شركات القطاع الخاص الي أطلعة على سيرتك الذاتيه

أو أحد مكاتب التوضيف

بس أنا ماعندي فكري هل هو مسموح لمكاتب التوضيف الأطلاع على السير الذاتية للمتقدمين ولا لا


بصراحه أعتقد بأنه لا لأن وزارة العمل تعرف مكاتب التوضيف ومشاكلهم

ولاكن تم التوصل الى سيرتك ورقم هاتفك عن طريق أحدى الشركات الي يحق لها الأطلاع على السير الذاتيه

ولاكن أنتي تأكدي من الرقم المجاني لحافز وقولي لهم بالحرف الواحد بأنه أتصل فيني جهه تدعي

توضيفي أما في مستشفى أو مصنع أوغيره هل لكم علاقه في الأمر

وركزي على كلمة جهه ونصيحتي وبلغيهم بأنك لن تقبلي الأ في جهه من القطاع الخاص الي تم

الأطلاع من قبلها على سيرتي وليس مكتب توضيف ياخذ من الراتب وغيره


أو مزود بسيرتي من قبل أحد معارفه في القطاع ممن أطلعو على سيرتي الذاتيه

وفقك الله

الرقم المجاني لحافز

92200115599

وفقك الله لاتنسينا من دعائك

صارتلي ظروف اليوم وماقدرت اروح
ويمكن كمان بكره ماقدر اروح رغم انو اتصلت على الرقم اللي اتصلت منو البنت وقلتلها بكره يمكن اجي قالت عادي تعالي بكره

بس بكره اخر يوم اجازه معقول يداومو ؟؟ ولو فرضا ماقدرت كمان بكره اروح هل يستبعدوني من حافز؟؟؟

والله حاسه انو كمان بكره ماقدر اروح مشكله ماعندي مواصلات واخاف اروح لوحدي ماحد فاضيلي يوديني :(

السؤال:هل اذا طنشت او اعتذرت انو ماقدر اجي يستبعدوني من حافز نهائيا؟؟

السلام عليكم
انا دخلت المنتدى ادور عن هالموضوع
اليوم نفس الشيء دقت علي وحدة طلبت تحديد موعد اذا بكرة مناسب لي
وقالت انهم تبع نطاقات حافز وعطتني العنوان
فياليت تخبريني وش صار معاك اذا رحتيلهم

يووه ياقلبي سوري تو انتبه لردك

تيب جربي دقي عليها وقولي لها
انا كلمتها وقلت لها مو اكيد اجيكم قالتلي رديلي خبر عشان تأكيد الموعد

والان كلمتها واخذت الوصف المضبوط
ماظن تروح عليكي لان الاسم مسجل عندهم

والله يا اختي امس لما اتصلت على اساس اليوم اجيهم وماقدرت
واتصلت انا اليوم عليها وقلتلها ماقدرت اجي قالت بكره قلتلها طيب وحددت لي موعد

بس للاسف حتى بكره مو اكيد اجيهم ظروفي شوي صعبه بالمواصلات استحيت ادق تاني واقولها ماقدر اجي

واخاف لو اعتذرت وماجيتهم يستبعدوني من حافز نهائيا .. ويقولو اتصلنا وماحضرت

مدري ايش اسوي

روحي انتي وامك بالتاكسي. . عادي مافيها شي
كيف تبغي تتوظفي وماعندك احد يوديك ؟ لازم تتدبري نفسك
روحي بالتاكسي واتكلي على الله

لو امي تقدر تطلع معايا وتروح وتجي ماكنت استنيت احد وبعدين ما احب اشحطط امي معايا فين ما اروح هيا يادوبك قادره تشيل نفسها
تاني شي لو اشتغلنا نقدر ندبرلنا سواق بالراتب يودينا ويجيبنا
بس للاسف وقت التقديمات ماحد فاضيلنا وكل واحد يتحجج بالف عذر وتلومونا لما نبغى نسوق ونقضي مشاورينا بلا ما نقعد تحت رحمه احد ..
على كل حال انا سايبتها للظروف وان شاءالله يصير خير

الله يوفقك ويسهل دربك
ويسخرلك عباده
عاد المواصلات يب بعض الاحيان حسب الظروف
بس حاولي وان شاء الله يسهل امورك وامورنا على خير

هذي انا ان شاءالله تتيسر وربنا يوفقنا
بس اذا رحتي ياليت تديني خبر ايش قالولك لانو انا حاسه جد انو ماقدر اروح بكره كمان

وش دعوى عاد تتعازمون من تروح؟؟

للي مايبحث عن مصلحته لاينتظر الناس تبحث له عنها؟؟

اختي مو معقوله ماعندك احد يوديك. . طيب ماعندك اخوات ؟
الله يوفقك ويسهل امرك

الله يوفقك ويدقون علينا يارب

طيب لمن تدق عليكِ وحدة من طرف حافز .. أسألي عن المكان والموقع
والراتب لحتى تعرفي راسك من رجليك وبدال ماتخسري مواصلات
واذا رفضتيها راح يبحثو لك ثاني عن وظيفة
بدليل دقو ع اختي وهي تخصصها ادارة وعندها حاسب والخ
وعرضو عليها وظيفة بسنتر بوينت ب5000 الاف مشرفة
ورفضت بحكم انو صعب جامعية وبالاخر هيك
وبعد فترة دقو عليها ثاني بوظيفة محتاجة لغة انجليزية
ورفضت بحكم لغتها متوسطة
وصار لهم اسبوع ولادقو بس ع كذا في امل انهم يتصلو
لحتى مايلزقو فيكي اي وظيفة واذا فقدو الامل عطوكي الفلوس ههههههههههه
حبيت افيدك
مودتي ~|

يعني هم بيشاورونا ع الوظيفه اذا نبيها اولا ؟؟

الله يوفقك

بالتوفيق

الله يوفقك ويوفق الجميع

حافز بيسرمك فيكم البحر < < ههههههههههههه
عادي لا تنسي اسئليها قولي لها في تجديد مع حافز 6 سنوات قدام وكذا ههههههههههه
بروب خخخخخخخ

الله يوفقكم ان شاء الله


هذا رد وحده دقوا عليها وهم من جده مثلك :


السلام عليكم ورحمة الله وبركاته ...

ببدا بالموضوع على طول .......

بدايتي زيكم سجلت بياناتي ... بعدين طلبوا مني احدثها وتم التحديث ...

وبعدها باسبوع جتني مكالمه من وحده وعرفت بنفسها انها من برنامج حافز مركز طاقات ..

وطلبت مني الحضور لاجراء مقابله وحددنا الموعد المناسب لي ...
(متعاونين جدا من ناحية الوقت )


ورحت باليوم المتفق عليه ..

وكان المكان بجده طبعا والموقع هو مبنى الموارد البشريه الدور الخامس مركز طاقات وارسلوا لي التفاصيل على الايميل والعنوان ..


طبعا الموقع بعيد جدا جدا عن بيتي انا بشمال جده وهو بأخرها .. لكن الحمد لله وصلت على الوقت ..

دخلت لقيت بنات زيي ينتظرون سجلت اسمي عند االدخول ..

وانتظرنا شوي وبعدين قسمونا مجموعتين بقاعتين مختلفه وكل قاعه جتنا محاضره ...

وشرحت لنا فكرة البرنامج ومعلومات عن شركة طاقات (INGUES) .
طبعا هالشركه ماسكه جده بس والرياض اتوقع شركه ثانيه


طبعا الشركه شركه استراليه لها خبره بموضوع القضاء على البطاله ولها تجارب ناجحه ب 8 دول ولهذا السبب تم الاستعانه بها .......

وبعدين شرحت لنا فكرة البرنامج وكيف راح نسوي .. وعطونا ملفات فيها اوراق ومعلومات عن كل شئ ..

ولما خلصت جلسنا ساعه تقريبا .. طبعا لما كلمتني قالت لي انه لازم اجلس عندهم ساعتين يعني تعطيك خبر كم المده ..

طبعا لكل متقدمه مشرفه خاصه بالتوظيف لها ..

بعد المحاضره اخذت فينا جوله عالمركز وعرفتنا على اماكن العمل الخاصه بالمتقدمات دورات المياه ومكاتب المحاضرات وكذا ..
بعدها ..
جو المشرفات الخاصات بالتوظيف وكل وحده نادت اسم وحده مننا ..

واول مقابله معاها تكون تعريفيه تتعرف فيها عليك وعلى طوحك وطلباتك ورغباتك الوظيفيه وكذا ..

وبعدها تحدد مدى جاهزيتك ...

طبعا الفكر بشكل عام انه راح تستمرين بالمركز لمدة 4 شهور يتخللها لقاءات متكرره بالمشرفه الخاصه فيك و محاضرات تطويريه لمهاراتك الذاتيه مثل
طريقة عمل سيره ذاتيه ..
فن اجراء المقابلات الشخصيه ويصلحون لك مقابله للتجربه وكذا ..
كيفية البحث عن وظيفه بالطرق الصحيحه ..
وعلى هالمنوال باقي المحاضرات تكون ..
طبعا بعض ورش العمل تستمر لمدة 3 ساعات ..
وكل محاضره راح يعطونك واجبات وتطبيقات تسوينها لهم اما بالبيت او بالمركز ومخصصين مكان عمل خاص تتوفر فيها اجهزة الكمبيوتر وتلفونات لاجراء طلبات التوظيف الي تلقينها ...
وطبعا خلال هالـ4 شهور يتم توظيفك ان شاء الله وتستمر مشرفة التوظيف بمتابعتك اول 3 شهور للاطمئنان من راحتك واستمرارك بالوظيفه

طبعا المده ال 4 شهور تطول وتقصر حسب جاهزيتك وحسب عطاءك معاهم بالمحاضرات واللقاءات ..

انا لظروف خاصه طلبت تأجيل موضوعي وانتظر الرد منهم

طبعا بتسألوني وش مؤهلاتي الي خلتهم يكلموني قبل بعضكم اقولكم شهاده جامعيه وبس يعني الاختيار عشوائي بالكمبيوتر و مالها دخل المؤهلات وكذا بالاسبقيه ..

وايضا للمعلوميه الوظايف كلها اهليه وليست حكوميه ..





وموفقين وان شاء الله اكون افدتكم ...
ودعواتكم لي يتحقق كل الي اتمناه ويصلح ذريتي يارب ..

اهلين وسهلين اختي الكريمه حلا العبدالله مشكوره كثير على النقل الرائع والله يعطيك العافيه سلمت يداك اختي الكريمه على النقل اللي ان شاء الله يستفيد منه الكثيرمن هم من سجل في هذا البرنامج والله يوفق الجميع .. تحياتي لـشخصك الكريم ,, ولاتحرمينـا من اي معلومه يخص برنامج حافز للعاطلين والباحثين عن العمـل وان شاء الله نسمع بالايام القليله القادمه المرحله الثالثه لهذاالبرنامج وباذن لله سيستفيد منها من له الاحقيه في هذه الاعانه التي امر بها الملك اطال الله في عمره وسدد خطاه ,,

معك قلبي ~

جزاك الله خير ان شاء الله ..

وانا ما كنت اعرف عن بدايه المرحله الثالثه ولكن لاحظت ان اللي دقوا عليها من مدينه جده فقط ..

وان شاء الله احنا بعدهم , ونشوف وش راح يصير وش بيقولون لنا , ون شاء الله نكتب تجاربنا هنا

حتى يستفيد منها اللي راح يروحون عقبنا ..

يعطيك العافيه و ربي يوفقك ويسعدك ..