يقولون القصة واقعية والعهدة على الراوي
قصة عريس نسى عروسته ؟
هذا واحد توه معرس وخلصت الزفة والأمور اللي في القصر.. أخينا في الله اخذ حرمته وركبوا في
السيارة .. ودعس للقصيم يعني أهل العروسة في الرياض وهو ساكن بالقصيم
والبنيه تستحي ومبرطمه طول الطريق .. والرجال ما غير يسولف ويهذر والبنيه سااااكته .. مااااا حولك احد
الرجال يأس من البنت إنها تتكلم .. وقال يا ولد ما وراها هذرره اشغل المسجل وامسك الخط
في الوقت نفسه البنت كانت تبغى تروح دورة المياه ومتوهقه انها بس تتكلم عشان تقوله ابي الحمام الله يكرمكم
عاد هي طمرت على المرتبة الي ورا عشان تنسدح .. الين يوصلون محطة
المهم الرجال ما وعى إلا هذيك محطة ويصفط عندها
وينزل عند البقاله ويأخذ له كيس فصفص وكم ببسي حق الطريق
البنت على نزلت زوجها إلا وتقز هذيك الحمامات حقت الحريم إلي عند المسجد إلي جنب البقاله
قالت يابنت بيمديني اطمر واخلص وارجع قبل لا يرجع هو من البقاله
المهم المسكينة راحت وأخذت وقتها
اخينا في هالوقت قد رجع للسيارة وعلى باله زوجته في المرتبه إلي ورا وخبركم عبايه سودا وآخر الليل ما انتبه إنها مهيب في السيارة وهو شغل ودعسسسسسسسس
البنيه المسيكينه طلعت وهي مرتاااااااااااااااحه و نقص من وزنها كم من كيلووووو
وتناظر يا بنت وين السيارة ... وتتلفت ما تشوف غير الهنود حق المحطة وأبو يمن حق البقاله
عاد تخيلو الصدمه يوم عرفت إن زوجها دق سلف ومشى والبنت المسكينة حتى في نفسها مهيب راضيه تصدق انه مشى .. جالسه تتأمل انه يمكن راح منا ولا منا وبيرجع
شوي ما وعت إلا ذ1ك الجمس اللي مقبل يوم وقفوا عند البقاله إلي جنبها
وتقز الحريم اللي في الجمس ... قالت زين عائله وتروح وترمي روحها على الحرمه الي قدام .. وهي أم العيله وتقول لها خالتي أنا داخله على الله ثم علييك .. وهذي قصتي والعجوز مسكت رأسها وقالت .. يابنيتي انتي تعرفين سيارة زوجك .. قالت إيه اعرفها
قالت قومي اطمري نلحق على زوجك
ويعبون بنزين ويدعسون وراه
نعود الآن لصاحب الفصفص
أخينا في الله مريح وماشي .. بعد ما لقوه في الخط على بعد نص ساعة
عاد تخيل حبيب القارئ انك على طريق القصيم و فجأة وراك جمس يكبس بالنور بشكل مخيف يبيك توقف وش رده فعلك
اكيد الرجال دعسسسسسسسسس قال ياولد هذولا مهابيل بيضروني ومعي عروستي .. ويااافشيلة اذا انطقينا
والجمس وراه داعس يحاول معه انه يوقف .. المهم الذهين اللي يسوق الجمس عرف وش يسوي .. فقام يولع
نورا لجمس اللي في الداخل عشان العريس يشوف ان اللي في الجمس عائله
وأخيراااااااااااااا .. انتبه و يوقف ... قال وش عنده ذا
ونزل وهو معصب
عاد من اللي متوهق في هالموقف .. اكيد هو راعي الجمس يقول في نفسه وشلون اقوله ان مرته معنا
يبي يجيبها بأسلوب تدريجي عشان العريس ما ينصدم .. خبركم مثل هالموقف وش بيقولون عنك اهل العروسه ... اخذت بنتنا وضيعتها
ولله ان تلزق فيك السالفه طول عمرك و العالم يتمشووون ولا عندهم سالفة غيرك .. تصير علك دائم الحلى .. ولا تصف يم علك ابو سهم .. يتشمتون فيك.. المهم راعي الجمس سلم وقال له اخوي ما كأنك مضيع لك شي
قال له العريس ... لا ولله ما ضيعت شي
قال له تأكد
قال العريس ... وشلون
قال راعي الجمس .. رح طل في سيارتك شف في شي ناقص لك
العريس قام يوسوس حتى المشكله مرته ما جت على باله
المهم راح ودخل خشته داخل السيارة وقال يا مره في شي طاح مننا وحنى في المحطه محد رد عليه
ويوم لون وجهه بدا يميل للكرت الاحمر.. ووووووووين راحت المره
ورجع لراعي الجمس وقال هات السالفه 00
قال يا ولد مرتك لقيناها عند المحطه انا واهلي وقالت لنا انها
نزلت للحمام وانت مشيت ولا دريت عنها 00
عاد العريس كل انواع النفاضات نزلت عليه تلعثم ولا قدر يتكلم
المهم راعي الجمس راح وقال للعروسه يلااا طسي عند زوجك شوفيه متصوووومع عليك
المهم العروسة ركبت مع زوجها في السيارة وانطلق لسانها اللي كان مربوط وقامت تتعذر له .
وتقول لا تزعل مني أنا كنت مستحييه أني اقولك إني طول الخط وأنا أبغى أروح دورة المياه.. وانت ماشاء الله عليك ركبت السيارة وانطلقت
هههههههههه <== يا شين التميلح .. توها تتميلح .. عاد انقلب الوضع صار العريس هو اللي مبرطم طول الطريق والعروسه الي قاعده تبربر ما بقى إلا أنها هي اللي تسوووق .. عشان أخينا في الله مرتاع من اللي صار
وسلامتكم
((منقول للوناسة ))
[/align]
22-11-2011, 02:31 PM
عريس نسى عروسته
العرض العادي
