حببتوني في التجاره .. يالله أجل ساعدوني (:
السلام عليكم ورحمة الله وبركاته كيفكم جميعا اخواني اخواتي..؟ :ash: ماراح اطول عليكم كل مافي الموضوع اني ابي المشوره منكم وخاصه ( اهل الخبره ) .. انا قريب بأذن الله راح افتح محل بيع وصيانة جوالات وملحقاتها لآني احب هالمجال عموما حاولت اشتغل لفتره عشان اعرف نظام السوق كيف بس بما اني سعودي بيقولون لي سقها :d فـ ماعندي الا الله ثم انتم تساعدوني وانا متأكد انكم افضل من السوق بمليون مره :h .. أولاً راس مالي من 150-200 الف واللي ببالي اني اخلي المحل مختص بماركه معينه بجميع منتجاتها واللي هي أبل :h بسبب ان مافيه بمدينتي محل خاص بأبل ويوفر منتجاتها لكن اغلب اللي عرضت عليهم الفكره يقولون لا خلي شغلك منوع يعني سامسونج وبلاكبيري وابل ... :do5h: رأيكم وش الافضل اتخصص بشي معين او انوع؟؟؟؟ .. ثانيا وش افضل مكان اشتري منه الجوالات واكسسوارتها بالجمله ( مااقصد شارع فلسطين بجده اللي اقصده افضل محل واسعار وكذا يعني ) علماً بأني من سكان مدينة الطائف وثالثا واللي شاغلني الديكور هل هو مهم انه يكون شي مكلف ورايق او اي شي ؟؟ تكفوووووون ساعدوني ولكم تخفيضات :d اسف ع الاطاله :w |
[align=center]ماشاءالله تبارك الرحمن
الله يمهل لك يارب وييسر لك احس التجارة مهمه في حياة بعض الجنس الذكري اللي وظيفتة تكون بسيطة جداً بمعنى ماتوكل ولا راح توكل عيش ومافيه بديل حلوه فكرتك إنك تفتح محل متخصص وبماركة معروفة ومشهورة زي آبل بس أنا اشوف إنك ماتخصص وتجيب كل شي عشان يكونون زباينك من كل الطبقات الاجتماعية بمختلف الأجناس مو الكل يقدر ع ماركة آبل .. ولو شراها وهو حافي منتف عشان الكشخه مااتوقع بيبحث عن لواحقها إلى لين يجمع مبلغ ثانية وممكن يجونك ناس يهتمون بهالماركة وماعندهم مشكلة يدفعون لكن مااتوقع إن اغلب عيال ديرتك كذا خصوصا الشباب بمعنى مو كلهم عندهم استطاعة او بيكونون اهلهم في طوعهم لذلك اقترح افتح كل شي لكن تميز بشي اللي هو إن محلك يشتهر بتوفير جميع ملحقات ومستلزمات وكل مايتعلق بمنتجات آبل وبكذا بتستفيد ع الصعيدين اللي يبي اي شي من آبل بيلقاه عندك واللي يبي اي شركة ثانية برضو بيلقاها عندك واااانصحك بحسن المعامله عندنا بالرياض في واحد من مجمعات الاتصالات محل صغييير والله ياعليه زحمه ماشاءالله تبارك الرحمن واللي حواليه محلات نايمه خامده او تلقى في بعضهم شخص شخصين لكن هالمحل زحمه للباب سألت زوجي وش الله حادهم والمحلات اللي جمبهم فاضيه يعني ليش ماسكين سرا قال مايصير كذا إلا اذا كانت اخلاق صاحب المحل ومعاملته للزبون ممتااازة جداً بيكون كسبهم ومايبون يتعاملون مع غيره وراضين بالزحمة حتى لو فوقها ريحه وخياس تهون في سبيل المعاملة الطيبة ويمكن الأسعار المعقولة. انصحك اذا تعرف تسوي اشياء بسيطة بيدك زي فورمات وفك رقم سري وخلافه لا تاخذ فلوس صدقني سمعتك بتنتشر وبينتشر عنك راعي المحل حبيب وموب مادي لاني اتعامل مع محل صيانة كمبيوترات عماله الهنود يتعاملون بهالطريقة وماشاءالله عليهم زحمة وناس من بد المحلات اللي جمبهم واضح انهم فاهمين شغلهم ومعاملتهم حلوه واهم شي المصداقية لاني كنت اتعامل مع محل حوله لسعوديين اخوان 2 واحد مطوع والثاني لعاب طبعا اختي دلتني ع المحل اللعاب لما ارسلت كمبيوتري وكلمته اعمله وش ابي حاول يغازل!!! من وقتها مسحت فيه البلاط ومعد قبلت عليه علمت اختي لانها تحتاج محل زي كذا دايم وحتى اخوي بس اخوي ماعلمته انه حاول يغازل بس اختي استغربت قالت ماقد حصل معها شي وقالت حرام وش دخل اخوه وبعدين سعوديين خل ننفعهم لحد ما جا يوم ارسلت لابتوبها بالشاحن وجلس عندهم مدري كم ورجع بدون الشاحن!!! ولما طلبت شاحنها عطوها غيره وقال هذا شاحنك!! ولما اصرت موب هو قالوا ماندري وكان شاحنها جديد توها شاريته وأصلي من بعدهاااا سحبت عليهم وسألتني عن محلي اليوم المحل اللي اتعمل معه سحبت له اخواني كلهم وولد أختي ويوم تزوجت زوجي وأخوانه وأكيد هم كل واحد جاب له زباين عن طريقة شايف كيف السمعه مهمه جداً جداً جداً وأي غلطة صغيرة تكلفك زبون وهالزبون بيسحب معه كذا زبون جااايين عن طريقة واللي جايين عن طريق طريقة واللي .... الخ مجرد وجهة نظر وإن شاءالله يفيدونك اصحاب الخبرة[/align] |
الله يوفقك ويفتحها عليك ويرزقك يااااارب
|
صراحه ما ايدك على تخصيص ابل فقط وحتى لو خصصت ابل وحدها اعتقد بعد فتره راح تتراجع والسبب الزبائن مو كلهم باستطاعتهم شراءه+ بعضهم يستطيع لكن مايحبه فالافضل تنوع على الاقل فالهواتف الذكية مثل بلاك بيري وايفون وجلاكسي... وبالنسبة للديكور طبعا لابد تهتم فيه بس موبشرط يكون غالي اهم شئ تختار ديكور مميز والوان ملفته ...وبالتوفيق لك
|
انا صراحة ما انصحك بالمشرووووووووع ذا كلة وانت بكيفك
اخوي اي مشروع تبي تدخله حاول تحط ميزانيتة ثم تحسب المردود المادي بالتقريب ثم تشوف المدة الزمنية اللي بترد لك راس المال ثم بعد ذلك فكر بالفائدة مشروع كلفتة من 150 الف الى 200 الف اعتقد اذا مو ناجح بالمرة يرد كلفتة في سنتين الى سنتين ونص بالكثير اما محل جوالات فاذا كلف مرة 60 الف ريال اذا تبي نصيحتي بها المبلغ تقدر تبداء بمشروعين شف لك مشروع ثاني احسن لك وادرس السوووووق زين قبل تبدى نصيحة وخصوصا بالطائف اعد التفكير مية مرة والله يوفقك ويزقك من واسع فضلة انت وجميع الاعضاء |
^
بالعكس مدام إنه عنده خبره في هذا المجال الافضل يبدأ فيه وأنا أنصحك تنوع .. مو بس آبل .. لان بصراحه سامسونج تنافس وأتوقع تتغلب على آبل لو إستمرت ومو مشكلة آبل أو سامسونج .. أهم شيء يكون محلك إذا دخله زبون مايطلع يدور غيرك .. حتى نوكيا . صلحها وبالتوفيق لك يارب |
الله يوفقك اخوي وتبداء في مشروعك وتنجح
بالنسبة للجوالات زي ماردت الاخت اهم شيء المعاملة الحسنة للزباين وسمعة المحل لانها عامل مهم في جذب الناس للمحل ومن وجهة نظري لا تتخص في ابل بس بالعكس يعني ماحد راح يجيك الا اللي معهم ابل طيب والبلاك بيري وسامسونج واجهزة نوكيا والشركات المختلفه ؟؟ نوع افضل لك وفك الباسوورد والفورمات وتركيب البرامج السريعه خله مجانا للعميل بكذا راح تستقطب زباين كثير وانتبه من الاشياء المحرمة مثل تحميل اغاني نغمات والخرابيط هذي ابتعد عنها وربي بيوسع لك في رزقك والله يوفقك |
اقتباس:
.. هلا فيك اختي :w عن نفسي واللي اخطط له اني مااتوظف لاني احب التجاره واميل لها لكن ماندري عن الظروف ووش بيصير :) فعلا كلامك صحيح مافي شي اهم من الاخلاق العاليه بالتجاره او غيرها :d الله يعطيك الف عافيه على ردك اللي استفدت منه كثير |
اقتباس:
|
اقتباس:
فعلا كلامك عين العقل الله يعطيك الف عافيه على مشاركتك في موضوعي المتواضع |
اقتباس:
ليه اخوي ماتنصحني بهالمشروع؟؟ ممكن توضح لي اكثر لو سمحت؟ :) الان التوجه للعالم كله صار للتكنولوجيا !! انتظرك اخوي العزيز توضح لي السبب اذا امكن :ash: |
اقتباس:
والله صراحه الخبره لك عليها :d بس احب هالمجال كثير وافهم فيه شوي وفعلا كلامك صحيح بخصوص سامسونج انها راح تنافس ابل بس نوكيا فكنا منها خلاص طاح سوقها :d يعطيك الف عافيه |
موفق بإذن الله ... لك مني أجمل تحية .
|
انا صاحب محل ابل في سوق بن جمعه سابقاا
نقلت جدة وتوظفت اايدك علي المشروق وبقوة واذا تبي مساعدة راسلني خاص |
اقتباس:
حياك الله ولا تواخذني ترى والله ما قصدت احباطك لا ورب الكعبة بس اخوي انت حاط ميزانية كبيرة للمشروع ومثل ها الميزانية صعب ترجع لك مردود مادي وربح في مثل ها المشروع في وقت قصير بالعربي يمكن يمر عليك سنتين وانت ما رجعت راس مالك ولا تنسى ان كل سنة يترتب عليها مصاريف زيادة اجار - رواتب ........... الخ اخوي مشروعك من اهم شروط نجاحة الموقع 1- الموقع : لا زم يكون في شارع تجاري وقريب من مكان تجمع محلات الاتصالات 2- البضاعة : اخوي كيف بتوفر البضاعة * استيراد : لا زمك خبرة كافية وعملاء مخلصين لك في الخارج تثق فيهم وفي قدراتهم *سوق الجملة : ممكن بس عيبها هامش ربح بسيط وما فيه امكانية تنافس فس السوق * موزعين : انت سعودي راح تبلش في التعامل معهم وراح تلقاهم يزيدون في الاسعار عليك ولا تراح تلقى تعاون جدي 3- العامل : لا زم يكون متمرس وفي اتصالات او لدية شهادة هندسة حاسب عشان تقدر تجذب الزبائن ولازم يكون خبير في اجهزة الاتصلات عشان الشراء والبيع والاستبدال خلوق وفي يستحق الثقة 4- الدعاية والاعلان : هذي لحالها حكاية ابتداء من لوحة المحل وصولا للعروض الترويجية الى هنا خلنا نوقف طيب تعال يالحبيب خلنا ناخذها بند بند ونفرض انك بترد راس مالك في 3 سنوات اذا قلنا راس المال 15000 على 3 سنوات لازم يكون صافي ربحك الشهري 4166 ريال نجي للمحل : ايجار 30000 في السنة يعني في الشهر 2500 طيب نجي للبضاعة اذا قلنا كبداية بتجيب بضاعة ب60000 ريال وكان نسبة الربح لو بعت البضاعة كاملة 30% يعني ال 60000 تجيب لك 20000 مكسب هذي باخليها لك انت احسبها هذا الكلام في الشهر ولا في السنة ولا في سنتين ؟؟؟؟؟؟؟؟؟؟ راتب عامل 1500 ديكور قل 20000 دعاية واعلان وعروض قل 10000 لو حسبنا كل اللي راح تلقى الكلفة وصلت 121500 ويبقى لك من 150000 مبلغ 18500 ريال هذا يبقى في الصندوق لتامين البضاعة من فترة لفترة اخوي اذا حسبناها كذا بديهيا لا زم على اقل تقدير يدخل محلك ارباح شهرية 10000 ريال صافي تخصم منها الاجار وراتب العامل 10000-4500= 5500 اذا دخلك الشهري 5500 ريال صافي تحطها بالجيب هنا يبيلك على الاقل من سنتين الى سنتين واربع اشهر عشان ترد راس مالك وبعد ها المدة تبدى تجني ارباح فعلية لمشروعك بالحبيب ارجو ان الصورة وصلت وانا انصحك قبل تبدا تعمق في السوق واعرف اسرار ها المشروع زين واذا صار عندك معلومات كافية عن المشروع هنا انت الحكم تغامر او تنسحب اخوي مبلغ 150000 او 200000 مبلغ مو بسيط وانا اشوف انك تقدر تفتح بها المبلغ اكثر من مشروع ومشاريع ناجحة وصدقني كل ما قلت كلفة المشرع كل ما زادت ارباحة وتخيل ان عندك اكثر من دخل هنا انت ما ينخاف عليك على العموم الله يوفقك وييسر امرك واي استفسار انا بالخدمة |
اقتباس:
اللهم آمين ويوفقك انتي بعد بكل امور حياتك اكيد المعامله الطيبه هي اساس كل شي يعطيك العافيه |
اقتباس:
|
اقتباس:
ماادري اذا اقدر ارسل رسايل بعدد مشاركاتي هذي !! لكن بحاول ارسلك رقمي |
اقتباس:
لا اخوي انا ماقلت انك حطمتني بالعكس من افضل الناس اللي نصحوني انت حاب اسالك سؤال واعذرني عليه .. انت سبق واشتغلت بمجال الجوالات؟؟ تعرف كم تكلفة 10 ايفونات و10 اي باد الخ ...؟؟؟ الجوالات حاليا اسعارها مو مثل زمان اذا ضربتها الحمى الف رياال :) وغير كذا انت مشدد على نقطة اني ارجع راس المال بأسرع وقت ليه طيب؟؟ بالعكس انا ابغى استفيد من راس المال هذا على المدى البعييييد ومو مستعجل عشان ارجع راس المال يعطيك الف عافيه يالغالي |
اقتباس:
اخوي رايح اريحك شوي انا لم يسبق لي العمل في ها المجال لاكن اعرف ناس اشتغلو بها المجال وللاسف ما قدرو يواصلو فيه ونهاية المحل للتقبيل اما بالنسبة لا سعار الجوالات اخوي مالك لوا اقل جهاز اليوم من ( ايفون - اي باد - جلكسي ) 2000 ريال اذا كان مستعمل ملاحظة مهمة اذا تفكيرك بانك تحصل المكاسب من البيع والشراء اخوي غلطان لان المكسب من الجهاز اذا مرة زاد مو اكثر من 80 ريال في الجهاز واحسبها اخوي كم تتوقع تبيع جهاز بالشهر اغلب مكاسب اصحاب محلات الجوالات من البرمجة ياخذون على اي جهاز اذا كان ايفون او جلكسي ايباد مو اقل من 100 ريال والموضوع ما يستاهل حتى 20 ريال من هنا تلقاهم شغالين برمجة واكسسوارات تجيب الهم الارباح اخوي الخبرة بها المجال هي اهم عوامل النجاح ومن غير خبرة ما انصحك بالنسبة لتركيزي على استرجاع راس المال اخوي اي شخص عنده راس مال اول شي يفكر فيه هو الفترة اللي بيرجع له راس ماله فيها عشان تشغيلة من جديد اما تحجز 150000 سنتين او ثلاث سنوات هذي صعبة شوي ومو زينة اعتقد انت بس ادرس السوق والمشروع زين ثم شف قدراتك وامكانياتك ومعرفتك بها المجال ثم قرر اهم شي لا تستعجل وتغامر نصيحتي لك اذا تبغى نصيحتي اضمن لك 4000 ريال او 6000 ريال شهري بدون ما تتعب ولا تفتح محل او غيره انا اشوف ها الامر احسن عن طريق اي مشروع اخر وانا باذن الله افيدك اذا نويت بس اهم شي شل فكرة الجولات من راسك والله يوفقنا واياك ويرزقنا الرزق الحلال |
الساعة الآن 09:37 PM |
Powered by vBulletin Version 3.8.9
Copyright ©2000 - 2024, Jelsoft Enterprises Ltd
جميع الحقوق محفوظة لحلول البطالة
استضافة، تصميم مواقع، برمجة تطبيقات، من توب لاين