|
اجنبي نصب علي بمليون وسبعمائة الف ريال والصدفه جابت راسه
بسم الله الرحمن الرحيم
السلام عليكم ورحمة الله وبركاته يأخوان شأت الاقدار قبل حوالي ثلاث سنوات ان تجمعني بشخص اجنبي حيث انني كنت اشتغل كداد ;) (لموزين ) وركب معي يريد القصيم جاي من الرياض المهم وحنا مع الخط تخبرون مع السواليف جلس يسب كفيله ويريد كفيل جديد وقال انه مرتاحلي ووده يتشارك معي بمشروع النص بالنص قلتله وش المشروع قالي بوفيه بالصناعيه المهم قلتله ماعندي فلوس قال انقل كفالتي لك ونا افتح البوفيه وعطيك بالشهر 1200 ريال قلت تم المهم بعد ماوصلته تواعدنا وخذ رقمي بعد تقريبا اسبوع دق علي وقال تعالي الصناعيه ووراني محل لتقبيل شراه هو وقال ابي اسجله بسمك رحنا مكتب عقاري وسجل العقد بسمي من البائع وعطاني خطاب نقل كفاله من كفيله موجه لي المهم اتفقنا اسوي لمكتب خدمات عامه وكاله مني لاستخراج تراخيص البوفيه والسجل التجاري ونقل الكفاله له المهم جاب لي اسم المكتب وسويت الوكاله وعطيته من شان يعطيها المكتب المهم اتفقنا كل شهر يحول الفلوس بحسابي وكان يحول كل شهر 1200 ريال كل شهر وبعد مرور ثلاث سنوات قابلت واحد من الشباب بالاستراحه توه متوضف بالبلديه ويسولف معي عن الوضائف وقلت له اني ادور وضيفه جلس يضحك بخبث:wa قال انت خلك على تجارتك وربي احسن لك من الوضيفه قلت اي تجاره قال علينا وجالس يضحك ويقول انت هامور كبير وماشالله عليك :k تشتغل ولا احد يدري عنك قلت يارجال والله انه ذابحني الفقر قال طيب ومحلاتك الي بشارع الصناعه البضاعه الي في المحل الواحد فوق 250 الف الشباب نقزت عيونهم :yaa: قلت انت سكران قال لاوالله انت هامور:r قلت تحاققني من تيس قال تم ركبت معه بسيارت البلديه الرسميه وجينا المحل محل كبير جدا قال للعامل الاجنبي اعطيني الترخيص ويوريني الترخيص قال التيس :d ياشنب اخذته على جنب وقلت ياولد المحل وربي مهو لي قال الترخيص بسمك قال مسوي وكاله لحد ( اصح يانايم ):confused: وعطيه سالفة الاجنبي قال بس امش وراني 4 محلات اخرى كلها بسمي منها محل اجهزه بشارع الخبيب قلت والحل قال نطلع العمال من المحلات ونقفلهن وبكرا يجيك الي مستغل اسمك رحنا للمحلات وقفلناهن بمساعدت الشرطه (قصه طويله ) المهم جاني الاجنبي يبكي ويترجاني ونه غلط بفتح المحلات بدون علمي ونه راح يعوضني ب30000 الف هههههه كل شهر المهم بعد صولات وجولات قلت تم فتحت المحلات وبعد يومين من المراقبه المكثفه على المحلات لقيته يحمل من البضاعه شوي شوي ناوي يجرد فيني :i جيته وقفلت المحلات وقلت اعلى مابخلك اركبه وركبت اقفال جديده للمحلات وجبت محاسبين لجرد المحلات وطلع سعر البضاعه فقط ( مليون وسبعمائة الف ريال) ورحت للمكتب حق الخدمات وسحبت الوكاله وهددتهم اني برفع شكوى عليهم المهم جوني ناس بالبيت وترجوني وحب خشوم وعرضو علي عرض مليون ريال كاش كتعويض و 30000 الف ريال كل شهر مقابل التستر عليهم وستمرارهم بالمحلات :g رفضت العرض وطلبت 2 مليون ريال ونقل جميع المحلات من اسمي ووافقو على طول وحبيت استشيركم اخواني الاعزا هل تصرفي سليم ام لا |
عززز الله انك طحت في كنززززز هههههههههههههه الله يباركلك يارجال والله انها من ربك سبحان من يرزق من يشاء
|
اللي طلبته هو الصح
هذا حقك الحين مستغل اسمك له مدة طويله ونصبك ونيته ماهي زينه حتى بعد ماكشفته كان بيسرقك .. تتوقع انه بيمشي على الاتفاق 30 كل شهر ؟ طريق الحرام مايطول خليه يتوب |
اللي سويته عين الصواب يا حبيبي رزق وجاء لي عندك
أصل اي واحد منا بيصير معه هالموقف صدقني راح يتصرف مثلك وهذا حقك وانا أخوك أهم شي التيس لا تنسى تعزمني عليه لبى قلبك ههههههههههههه موفق خير |
اخوي عشان لاتاكل حرام
افضل شي تعطي السالفة لشيخ وهو يتفي لك ويعطيك العلم الزين والله يغنيك بحلاله |
طيب يا أخي ..
دامهم بيعطونك 2 مليون وش رح تسوي ب 2 مليون ؟؟ دام المحلات جاهزة وماشي سوقها روح وخذها مقابل 2 مليون واستلم ادارتها انت واستمر شغلك لا يختلف |
ماشاء الله تبارك الله
الله يوفقك |
اخوي المصيبه اللي ماتدري عنها يمكن الرجال مستغل السجل التجاري في تنزيل البضاعه بالاجل يعني شكلك مديون عند بعض الموزعين باأكثر من 2 مليون ويمكن كذلك يستورد بضاعه من الخارج باأسم المؤسسه وفي ظهرك يبغالك تشيك مع الجمارك ونصيحه شف لك مكتب محاسبه ويراجع الفواتير وخلص نفسك واشطب السجلات والرخص وفيه حاجه بعد اكيد المحلات شغاله لها كم سنه شوف الزكاه كم راح تكون وتقدر تتأكد طلع برنت من الامانه بعدد الرخص اللي باأسمك وكذلك وزارة التجاره وعدد السجلات اللي عليك .
|
نسال الله ان يوسع عليك ويفرج كربتك
لي ملاحظة على كلمة شائعة وهي غلط كلمة شاءت الاقدار المشيئة الكاملة لله وليس للاقدار بل الاقدار من الله عز وجل والكلام يطول في هالامر بالنسبة لوضوعك ادرس الامر باستفاضة وشاور من تثق به واذا قررت عمل شي استخر وباذن الله يدلك ربي لكل خير |
الغي الوكالة
وشف كم عليك مديونية من تجار الجملة لأنهم بيعطونك ٢مليون بس كم عليك دين بالأجل شف كل الفواتير الصادرة والواردة وكم سعر البضاعة وكم نزل بالمحل وهل هي كاش ولا تحت التصريف -- حاول تأخذ نسبة من الأرباح حاول تبصمة على شيكات مفتوحة وكمبالات بدون مبالغ حتى إذا طالبك بكرة بدين او اي شي تكتب في الشيك ضعف المبلغ اللي يطلبك . |
*=== (( ما يلفظ من قول إلا لديه رقيب عتيد )) ===*
في البدايه من وجهة نظري اطرح الموضوع على شيخ لأجل يبين لك عشان ما تدخل في الحرام وثاني شي شوفلك محامي لك وقدم له جميع المستندات عشان ما يغرك المبلغ 2 مليون ويكون الاجنبي ماخذ بالاجل اكثر من اربعه او خمسه مليون وقتها ما راح تفيدك ال 2 مليون والله يوفقك ويوفق الجميع |
آخوي
سبحآن من يوزع الارزآق .. حقك و آقل من حقك .. فهو استغل اسمك بدون علمك واخلف الاتفاق الي بينكم الاتفاق كان على بوفيه فقط بـ 1200 .. لكن طلع خبيث وحاول يلعبها عليك لكن سبحان الله .. لا تتنازل عن حقك . |
من ابسط حقوقك اهم شي لاتكون مديون بالتوفيق
|
الموئيد ابي اصير صديقك راسلني على الخااااص
هههههاي الله يوفقك |
ياخوي حتى ولو عطوك مليونين ريآل وسحبو بالثلاثين الف خذ المليونين ريال وخلهم ينقلو المحلات باسم سعودي ثاني وريح نفسسك
مليونين ريال تفتح لك مشروع محترم |
اقولك خلهم يفتحون باسمي اعطيهم كل شي هههههههه وبعد سنه اطب عليهم زيك
|
ماهو هين ثلاث سنوات ناصب عليك والصدفه اللي جابته بعد بعد الله
السالفه كبيره لا تتساهل فيها يبي لك زي ماقالو الاخوان محامي وتسأل لك شيخ والله يسهل امورك ويستر عليك |
اسمحلي سالفتك ما تتصدق اخوي
خلال 3 سنوات بس يعرض عليك مليونين ويعطيك كل سنة 360 الف ريال ؟؟!!! |
من البداية ما أدري يحق لك إنك تاخذ الفلوس وأنت ماتعبت فيها والا لا..؟؟
بس لا أحد يفتي من غير علم..ويقول هذا من أبسط حقوقك زي ماقالوا الأخوان اسأل إذا كانت حلال أو حرام.. والله يكتب لك التوفيق ويفتح لك الرزق من أوسع أبوابه.. |
الحمد لله إنك قفشته ... مع العلم لو إنه خسر و صار عليه ديون راح تكون على راسك لكن فكك الله :)
و الوكالة يا أخوان حددوها بتاريخ تنتهي فيه ... يعني اكتب في الوكالة للمعقب أو غيره أنها تنتهي بعد 6 شهور من تاريخ كذا ... بعض المعقبين يستغل الوكالة المفتوحة و يجيب عليها عمالة باسمك و أنت ما تدري فالحذر الحذر |
الله يوفقنا واياك ، انا من رأيي انك تستفتي شيخ ثقة وتقدر تروح لمقر الافتاء قريب من اسواق بن دايل بالرياض وتسألهم ، واشرح لهم السالفة بدون ذكر قيمة المبلغ .
الله اكفنا بحلالك عن حرامك واغننا بفضلك عن من سواك. |
السلام عليكم ورحمة الله وبركاته
اخر المستجدات بالموضوع 1- ذهبت الى محامي وطلب مني اتعاب 17% مقابل رفع شكوى على الاجنبي و مكتب الخدمات و احد المطابع المشهوره الاجنبي /حسب النضام يصفي امواله ويسافر بهن الى بلده بعد سجن سنتان مكتب الخدمات / قضيته تزوير التوقيع مو مذكور بالوكاله واستخدام التوكيل بعد فترت انتهئه التوكيل سنتان والتراخيص جددت بتاريخ جديد العقوبه المتوقعه حسب توقعات المحامي سجن 6 اسهر للمعقب ودفع غرامه لاتتجاوز 10000 ريال حسب النضام المطبعه / اخراج اختام و فواتير بدون تفويض بذالك حتى بالوكاله مو مذكور للمكتب التفويض بذالك العقوبه حسب النضام غرامه لاتتجاوز 100000 مائة الف ريال وبالوسطه 500 ريال يعني النضام بقوه مع الاجنبي يسرح ويمرح وبالاخير يرحل الى بلده وياخذ امواله معه اما من الناحيه الشرعيه الاجنبي اخل بالاتفاق اي ان الاتفاق كان على البوفيه فقط الاجنبي حاول المكر علي بسحب البضاعه من المحلات يعني ماتوقع اني ضالمه وكل هالاتفاق برضاء تام من الطرفين __________________________________________________ _______ المحلات كشفت انا 70%من البضائع منزله باالاجل بأسمي ويتم سدادها بأنتضام يعني هو ناوي فيني نيه بينزل حتى يثقون فيه التجار اكبر كميه ومن ثم يصفي البضائع وينحاش وهو مستغل اسم عائلتي حيث ان احد اقربأي من اكبر تجار الجمله بالمملكه ... اشكركم اخواني الاعزاء على مشاركتي مشكلتي وعلمو انني استفد من تعليقاتكم الشي الكثير وتأكدو انني اتقبل النقد البناء الهادف من الاخوه السعوديين فقط .. ولازال للموضوع بقيه وسوف اسرد لكم اخر المستجدات |
انا برأيي أنك تتفق معه وتكسب الفرصه ولا تشتكيه اطلاقاً
لأن اذا اشتكيته بتخسر انت وهو يعني اذا شكيته بينسجن وياخذ فلوسه معه واصحاب المكاتب بيدفعون الغرامه وينسجنون ممكن لكن انت ايش استفدت ؟ رجعت سواق لموزين مفلس ! ولا تواخذني بها الكلمه انت تقدر تتفق معه وتسد ديونك على التصريف من البضاعه وتستفيد من المحلات وتستغل قضية سجنه سحب فيه تسحيب والله لا تطلع ذهب وخذ ضمانات عليه وخلك كفيل له وهو تحت التهديد فرصه لك ما تتعوض بس يبي لها مخ :) فكر في الموضوع كويس ولا تستعجل ابدا وخاصة في الشكوى بالتوفيق |
عمي خذ فلوسك منه وارتح من وجع الراس وانقل كفالتة على اي احد يبيه
دام الامور انكشفت على حقيقتها |
جــــــــــميل
|
لا وربي تصرف رجال مشالله عليك الرجل فاتح من وراك محلا ومطلع ملاين مندون ما تدري وانت ياغافلين لكم الله
انا لو منك اعطيه البضاعه بس والمحلات انا فتحها لانها لها اسمها بالسوق لكن تصرفك رائع جدا |
مشاء الله تبارك الرحمن
رزق انكتب لك من رب رحوم اصرفها بمايرضي الله الله يوفقك |
لاحول ولاقوة الا بالله
اكثر البيتوت هنا تدمرت بسبب الفقر والعوز وعدم حصول رب الاسره على الوظائف أو اعمال وتجاره تسد رمق أسرته والعماله تنهب في خيرات البلاد أن لا اقصد حقهم الذي يكسبوه من عرق جبينهم ولكن بالتحايل والتستر اغلقت ابواب واتكل البعض على ما يدفعه العامل مقابل التستر فالا متى ونحن نشاهد شبابنا يستجدي والديه للبنانزين ولوجبته في المطعم اين التوعيه أين المحفز للعمل وتيسير المجدين من شبابنا ومساندتهم لينتجوا وتنجح مساعيهم لعمل |
ماشاء الله
من قال حراااام او حلااااال السالفه واضحة وضوح الشمس والحق معك والله انت عطيته فرصه ثانيه بعد بس كان ناوي ينصب عليك في المره الثانيه وما تااااب واهو النصاب متفق معاك على محل واحد فقط وما استشارك في المحلات الثانيه لو انها على محل واحد وراتبك 1200 كان قلنا مو مشكله بس هذا نصاااااااب وبعدين مليونين وش تسوي بالنسبه لهم تحصله ملااااييين عنده جزاه واقل من جزاه ومثل ما قالو الاخوان روح شيك على اسمك ليكون مستغلينك باشياء ثانيه وانت ما تدري .. حسبي الله ونعم الوكيل |
عز الله انك طحت في كنز الله يرزقك
|
من الأفضل تستشير شيخ ويفتيك
لاتغرك الفلوس يمكن لاسمح الله يبليك في احد ابناءك اويبليك بمرض وتصرف ها الفلوس ولاتكفي على مرضك لانه من وجهت نضره انك عطيته الوكالة لكل شي اخوي شوف مفتي يفتيك الدنيا دنيه فكر في اخرتك |
وين رح خوينا ؟؟
طمنا يالطيب وهذا تحذير لكل الشباب عشان ماعاد يتسترون اليوم خوينا ربي يسره معه لكن لو صار العكس وخسر الاجنبي وحمله ديون وسجنه واكل 10 سنين بسبب حقوق الناس وضع عمره وشبابه بسبب التستر |
ياخوان الاجانب ذولي فاهمين النظام وحافظينه بعد والمصيبه ان يشوفون نقاط الضعف ويلعبون عليها..
صاحب الموضوع وش صار عليك ؟ |
افضل شئ تجلس معه يعلمك كيف قدر خلال 3 سنين فقط ينمي التجارة ويفتح كل ذى المحلات وكمان سيوله يدفع مليونين ، استفد منه الفائدة الحقيقة ترى المليونين بيطيروا وبترجع للموزين
|
أخي الوليد
النظام الذي تتكلم عنه هو نظام مكافحة التستر وليس نظام التزوير والتلاعب المكتب " وقع " والمطبعة " أصدرت أختام " بعد انتهاء الوكالة وبدون تفويض بالتوقيع نظام التستر فقط على البوفيه محل الاتفاق ........ أما باقي المحلات فيجري فيها نظام التزوير -------- أهم شيء الانتباه الى نقطة الديون للمؤسسات والشركات الموجودة على المحلات التي بإسمك ربي يبارك لك ويفكك من شياطين هذا الزمان |
بسم الله الرحمن الرحيم
اشكركم اخواني الاعزا على التفاعل مع قصتي وافيدكم انني سوف اوافيكم بأخر المستجدات بموضوعي ولاكن عذرا لن ادلي باي شي حتى انتهي من المشكله وهي تقريبا سوف تنتهي قريبا وشكرا لكم |
انا اشوف ان 2 مليون انها
مثل العقوبه ولا اقدر اقول انها حلال او حرام بس لاتنسى خويك الي في البلديه |
تصرف سليم
ع فكره تراه ماوافق على هذا العرض الا اكيد انه مدبسك بفواتير مع الموزعين تفوق هذا المبلغ تأكد انتبه واستلم منه كل شي بورق ولو في الشرطه يكون احسن عشان تخلي مسئوليتك من كل شي اخذه بأسمك بكره يجون يطالبونك الشركات ...وين تروووح موفق |
[align=center][/align]قبل كل شي اسأل اهل الفتوى عن حكم هذا الأمر برمته ونسأل الله لكم الرزق الحلال
|
بالتووووووووفيق يارب
|
| الساعة الآن 08:05 PM |
Powered by vBulletin Version 3.8.9
Copyright ©2000 - 2024, Jelsoft Enterprises Ltd
جميع الحقوق محفوظة لحلول البطالة
استضافة، تصميم مواقع، برمجة تطبيقات، من توب لاين