السلام عليكم ورحمة الله وبركاته

صباح الحب والإخاء للجميع بدون أستثناء

القصه /
بوجزلكم فيه قدر المستطاع /

ولد عمي خريج معهد مهني وشهادة متوسطه ( بس شغله في السيارات متقنه وبقوه والفضل لله )

توظف في شركه صغيره , وكان يتعرض لبعض المضايقات من المدير ( مصري الجنسيه ) مدير الفرع ( كان يقوله انت هندي ........ وسمى صاحب الشركه ) , وكانت تجيه مضايقات خفيفه من بعض الهنود الي معه في نفس الورشه , واستحمل وصبر وبراتب 1500 على ما اذكر , وطلب انه يقدم على صندوق الموارد البشريه عشان يعطونه 1500 ثانيه ولكن المصري رفض , ومع ذالك كمل وصبر , وكان المصري يطلب منه يسوي اعمال في الورشه ما هي من مجال عمله ولكنه رفضها وبكذا حقد عليه المصري وراحت شهور وكان صاحبنا يدرس ليلي ولما جت الأختبارات طلب اجازه مدتها أسبوعين ( وهي اجازه نظاميه متعارف عليها في المملكه لمن يدرس وهو على راس العمل ) وكلم المصري وقاله بتوقف اسبوعين وراح جاب ورقه بس ما استلمها المصري وقال خلها معك لأنك ما وقعتها , وتغيب اسبوعين وفي اخر يوم اختبارات مر على الشركه وكلم المدير المصري وقاله خلصت وسئله متى ارجع لدوام ارجع بكره الخميس والا أرجع السبت قاله داوم بكره وفعلا رجع وداوم ولما جاء يوم الاحد سلموه ورقه فصله .

ولما سئله قاله ليه مشى المصري من عنده وقاله انا قلتلك اشتغل وما اشتغلت ( يقصد يوم طلب منه يسوي بعض الأعمال الي ما هي من اختصاصه قبل 9 شهور )

كل هذي الأحداث مرت في قرابه السنه بالضبط , وكنت اذا زرتهم يشكيلي من الوضع وفي نفس الوقت اشوفه متحمس ومتحدي وصابر وحالو يوصل للأدارات العالي , ومن ضمن ما قالي يقول المصري كان ياخذ نسبه من الأرباح اليوميه كعموله ( نسبه مجنونه )

الخلاصه / والعبره

ولد عمي زي ما قلتلكم شهادة متوسطه ويجهل بعض الامور
قلتله بنقدم عليهم شكوى , وقلتله عندك مكتب العمل واذا ما جاب نتيجه نرفعها لديوان المضالم , وعندك الصحف تقدر تكتب معاناتك فيها , وقلتله عندك بعض قنوات التلفزيون ممكن نراسلهم ونشوف وش ردة فعلهم ( طبعا كنت أقصد برنامج 99 )
<<<<<<<< منقهر يقول اذا فتحنا قناة البطاله بنسمع صوت المضلومين للجميع وبكل سهوله

المهم توكلنا على الله واستجمعت كل قواي وخبارتي السابقه في صياغت الخطابات وانتقيت كلمات رنانه وكتبتها بأسلوب يلفت لنظر ويبين الظلم .... وقدمها ولد عمي لمكتب العمل
وفعلا صار لها صدى قوي بسبة هالظلم وبتوفيق من الله وصار المشرف عليها مدير فرع مكت العمل والعمال
وصارت فيه كم جلسه واستدعو المصري واستدعو موظف سعودي يعتبر مدير امام الجهات الحكوميه وفعلا أنصدمو بنقاط الضعف الي عندهم ومنها
1) ما فيه عقد عمل
2) الأساءه للموظف
3) الفصل بدون انذار
4) المطالبه براتب شهر ( لانه ما اخذ أجازته السنويه )
5) ما سلموه خبرة سنه

المهم أخذوه على جنب وطلبو منه تسويه بمبلغ 3000 ريال ويكنسل القضيه وهو طلب منهم 10000 ريال وقالي وقلتله أصر على المبلغ 10000 حتى لو ما يجيك منه شي
ولكن تدخل الموظف السعودي وطلبه يقبل بـ 3000 ريال ووافق ولد عمي بس بـ 4000 ريال

هذي القصه كما حدثة فصولها في الأربع أشهر الماضيه , اتمنى تستفيدون منها