|
نداء لتجار وتاجرات الأسواق الألكترونية
السلام عليكم مساء / صباح الخير ع الجميع ياشباب وصبايا ماشاء الله اغلبكم يبيع ويشتري عن طريق النت لكن للاسف كل واحد يبيع بمتجر خاص فيه وزباينة فئة محدودة والمثل يقول ( يد وحدة ماتصفق ) وماعندنا الا سوقين ( متعدد الباعة ) واحد مملوك من شاميين عرب وياخذ نسبة كبيرة من غير رسوم المعاملة وواحد مايقبل الا شركات ومؤسسات وياخذ نسبة ومملوك للبريد السعودي عاد احنا اذا ماجتمعنا في سوق واحد ماراح نقدر نعيش بالتجارة الالكترونية ولا نقدر نخلي شركات الشحن تنزل لنا سعر الشحن غصب عنها ومن هذا المنطلق قررت اني افتح سوق الكتروني متعدد الباعة وبأحسن سكربت ان شاء الله وبفريق خدمة عملاء ودعم وبخليه ( مجاني ) يعني لانسبة بيع ولا رسوم معاملات ولا كلام فاضي وبخليه بطاقم عمل سعودي وبدور لي مصمم سعودي ومبرمج سعودي وبحاول اخليه باستضافة سعودية قدر المستطاع ونبي نبيع احنا يالسعوديين ونشتري على كيفنا وبدفع رواتب الشباب والبنات اللي بيكونون خدمة عملاء ودعم فني من حسابي ... ومايمنع اني اقبل الشباب والبنات المتطوعين بافكارهم وخبرتهم سواء تجار او مشترين او مبرمجين او مصممين او في اي مجال اخر المهم انا نويت على سكربت معين سعره 25.000 يال اعجبني حيل ويقبل التسجيل عن طريق الفيسبوك والتويتر والانستقرام ويدعم خمس صور للمنتج ويدعم فيديو وميزات كثيرة وفتاكة .. وفاوضت كل شركات الشحن بالسعودية عشان ينزلون السعر لنا بالشحن لكن اغلبهم فيه تعنت وخصوصا اذا عرف ان الفريق اللي بيدير السوق سعودي ... عاد اخر سعر وصلت له من احد الشركات كان (00) ريال للتوصيل داخل السعودية لاي مكان و (00) ريال للدفع عند التسليم تضاف للمبلغ و(00) ريال التوصيل من الباب للباب وهذي تنفع للبنات و (00) ريال للدفع عند التسليم تضاف للمبلغ وبكرة يرسلون لي الاتفاقية عشان التوقيع والتصديق وبحاول فيهم محاولة اخيرة يمكن ينزل شي من المبلغ ... عاد المسؤول قال لي صدقني اذا زاد عدد الطلبيات عندكم بينزل سعر الشحن اجباري وراح تتنافس عليكم شركات الشحن عاد نجي للاهم انا ماني محتاج دعم فلوس لكني محتاج دعم معنوي ولوجستي ومحتاج افكار ومقترحات ومحتاج اكُون قاعدة من التجار والتاجرات قبل ابدا المشروع فعليا ومحتاج اهل الخبرة في الاستضافات والتصميم والبرمجة يساعدوني سواء تطوعا او بمقابل ومحتاج كتاب للمدونه اللي راح تكون في السوق عشان ينيرون طريق التجار والمشترين المبتدئين بكتاباتهم وخبرتهم وابداعاتهم سواء تطوعا او بمقابل وبالاخير اتمنى تثرون الموضوع بردودكم الكريمة واللي حاب يرسل لي خاص اهلا وسهلا واللي حاب يتصل او يرسل sms اهلا وسهلا 0530383033 اهم حاجة نكون ايجابيين ونطلع بحاجة حلوة ملاحظة : تم اخفاء اسعار الشحن نظرا لبند السرية من العقد الموقع مع الناقل تحياتي لكم وفالنا التوفيق ان شاء الله |
[SIZE="5"]اول شي يسعدني اني اردعليك وبصراحه فكرتك جدا ممتازه صراحه انا شخصيا اعاني لمن ابا اشتري شيى عن طريق النت كل واحد متجر خاص في ليه مانوحد المتجر ويكون في كل شي عن نفسي انا صراحه ماعندي اشياء جديده بس انا معاك لاني احب اتبضع عن طريق النت واللي تبينه انا حاضر انا عندي خبره بالفوتوشوب وال 3 دي ماكس ان شاء الله اني اقدر اساعدك اخوك امين من جده[/SIZE]
|
اقتباس:
|
فكرة اكثر من رائعة
الله يسهل مهمتك ويسدد خطاك ويوفقك ويوسع رزقك قادر ياكريم ويكفيك شر الحساد اللي يحاربون النجاح امين يارب |
فكرة ممتازة الله يقويك
احذر تتراجع اذا واجهت صعوبات بخصوص اسعار شركات الشحن اللي اعرفه انها في حدود ما ذكرت واللي قال لك انها راح ترخص صادق اذا استمريت وكثروا عملائك راح ترخص لكن فيه اضافة تتمثل ان كثير من تجار الانترنت مشتركين في شركات الشحن بأسعار قليلة لأنهم عملاء قديمين عندهم فممكن تستقطبهم باشتراكاتهم وتعطيهم مزايا اعلانية وتسويقية من غير ما توفر له الشحن احرص على انك تستفيد من المواقع العالمية الشهيرة في كيفية عرض السلعة بصور واضحة ومن زوايا متعددة وفي التصنيف الجيد للسلع سواء داخل الموقع ككل او داخل الصفحة الخاصة بالتاجر احرص على وضع تقييمات من الزبائن للباعة علشان تحتفظ فيما بعد بالبائع الجيد وتتخلص من الردئ لأن رداءة سلعه او تعامله راح تضر بثقة الناس في الموقع تلقائيا كيفية الدفع مهمة وكثير من الناس يفضلون الدفع عند الاستلام فحاول تكون هالخاصية عند اغلب التجار ( بعض التجار يرفض وجودها ) ابتعد ما امكن عن الوعود باشياء صعب تحقيقها مثلا تعد في اعلاناتك ان البضاعة تصل الزبون بسرعة وانت غير واثق من ذلك لأنه هذا من المؤثرات على الثقة والتجارة قائمة بنسبة كبيرة جدا على الثقة فلو كنت تستطيع ايصال البضاعة في خمسة أيام قل انك ممكن توفرها في ثمانية وستحاول ان تكون في وقت اقل من ذلك حاول ان يكون تصميم ستايل السوق حديث وبسيط احذر أن يكون موقع سكر من المواقع القدوة لك فهو من أسوأها إن لم يكن الأسوأ على الاطلاق هذا ما اتذكره الآن بحكم خبرتي في التسوق من الانترنت واذا تذكرت أشياء أخرى سأعود يهمني وسيسرني نجاحك لأسباب متعددة وأتمنى لك التوفيق |
لفت نظري انك راح تحطه مجاني حاول تستشير فيها اقتصادي وفي رأيي لو تخليه بمبلغ بسيط افضل والرأي لك
|
يعني تقريباً فكرتك نفس فكره موقع امازون وكده اكثر من بايع واسعار مختلفة صح
لو اللي فهمته غلط |
بخصوص شركات الشحن .. انا اشتغلت فترة في شركة شحن .. وكان من بين عملاءنا موقع كوبون اذا تعرفونه .. وفي بداية الامر .. كانت شركتنا تشحن له بمبلغ 17 درهم عن كل عملية شحن .. حتى لو رفض العميل يستلم الشحنة .. دام انها طلعت من عندنا يعني خلاص محسوبة .
زادت وتيرة الشراء من موقعهم .. طبعا هو موقع يعطيك خصومات في افضل محلات دبي وابوظبي .. وفكرته يا ليت لو تطبق عندكم .. مربحة جدا هي .. عموما .. لما وصلت شحناتهم اليومية حاجز ال200 شحنة .. اضطرت شركتنا تخفيض سعر الشحن الى 13 درهم .. ولما وصلت الشحنات اكثر من 400 شحنة .. وصلتنا اخبار انه شركات مثل DHL و سبيدكس وغيرهم قدموا عروض لكوبون بسعر شحن 10 دراهم .. لكن الموقع رفض التعامل معاهم بحكم علاقته معنا لمدة تزيد عن 4 سنوات .. وايضا لانه شركتنا كان مالكها مدير جوازات دبي .. فاعتقد صاحب كوبون اختار الواسطة على الربح مجرد ما وصلت التعاملات 600 شحنة يوميا .. تم اعطاءهم تخفيض في السعر 10 دراهم في عالم الشحن .. ما يهم سوى شئ واحد .. عدد الشحنات .. كلما زادت .. كلما قل السعر |
فالك التوفيق
بالنسبة لاستقطاب التجار والتجارات امره سهل انت افتتح الموقع واشهره خلال شهر بيكونون كلهم مسجلين عندك المهم الخدمة الزينة والتقنية السهله |
من ناحيه الاستضافه
احب اقولك شغله .. مشروع مثل هذا يحتاج سيرفر كامل مش استضافه .. السيرفر بيكلف من 400 الي 1200 ريال والافضل تاخذ من شركه اجنبيه .. لان اعتماد الموقع كله بيكون علي قواعد البيانات وفيه انواع من الاستضافات .. فنصيحه انصحك تبتعد عن شي اسمه استضافه عربيه بشكل عام وتتجه للاجنبيه , لان اي استضافه بالعالم العربي هي اصلا من الاجانب فتاخذ من المصدر وسيرفر مع اداره كامله افضل ,, وبخصوص السكربيت ,, كذلك ما انصحك اخوي ,, لان الموقع راح يكون للعرض والطلب .. ولا تضيف طرق للدفع وتربطها بالموقع لانك راح تكون معرض للاختراق .. شوف مثلا موقع حراج .. برنامج بسيط معدلين عليه تعديل حلو .. وماشي وضعه هذي من ناحيه الموقع بشكل عام .. واذا حبيت مساعده انا لي الخبره الكافيه لكن لا اعرف ابرمج اما من ناحيه الموضوع بشكل عام .. انا اذكر موقع سوق اول ما بدا كان يسوي اعلانات في كل مكان .. المواقع والاذاعات والشوارع فيه مثل اجنبي يقول .. لو تصرف دولار علي مشروع .. اصرف ثلاثه علي التسويق .. ومن ناحيه العائد المادي .. علي ما فهمت منك انك ماراح تستفيد شي لان الخدمه مجانيه .. مشروع بدون اي عوائد ماديه ما يمشي حاله .. وكل ما قلت ادارتك الشخصيه علي المشروع عموما كل ما صار افضل لك .. يعني مثلا . .. موقع حراج ,, موقع سوق ,, موقع مستعمل .. وين تواجد الاداره في هذي المواقع ؟ عندك حراج ومستعمل .. يحذرون من اي تحويلات خارجيه وغير مسؤولين عن اي قضايا ماديه وعمولتهم ما يسامحونك فيها لو تنطبق الارض علي السماء .. موقع سوق ؟ يعتبر الافضل لانه مثله مثل ايباي .. وسيط ,, الشاري يدفع للموقع .. البائع يشحن والفلوس تكون عندهم لحد ما يسوي تنتهي عمليه الشحن واذا كان فيه خلاف يكون موقع سوق هو الوسيط والحكم .. المقصود من كلامي كله .. انت عندك منافسين .. ثلاث علي راس القائمه والبقيه بعضهم فشل مثل موقع بيزات وغيرها .. اذا انت رجال والله تقول بوفر كل شي مجاني .. وبتتكلف من جيبك .. بقولك المشروع بيطلع لك خساره .. لان الفائده مطلوبه من اي مشروع حتي لو كان شي بسيط .. واغلب المواقع تاخذ 1% من اي عمليه تجاريه وترجع في ذمه الشاري واذا تقول لا والله بدفع ولو كلفني مليون .. والعموله ما تهمني .. لان فيه مصادر دخل ثانيه بتكون مثل الاعلانات بالموقع وغيرها .. بتكون علي راس القائمه .. باذن الله ادرس الموضوع زين .. ولا تنسي التكاليف .. ولا تاخذ سكربيت ب 25 الف اذا انت دورك بيكون وسيط خذ لك واحد مجاني واي مبرمج يطور لك عليه وفيه مبرمجين عرب كثير واغلبهم من مصر الشقيقه .. وخل ال 20 الف الباقيه مصاريف اعلانات مدفوعه للموقع واذا انت بتشتري وتبيع بضاعتك .. هذا امر ثاني بعد واي استفسار انا حاضر واخدمك من عيوني موفق اخوي واعذرني علي الاطاله |
كذلك بضيف شي ..
احذر ان تحجز دومين الموقع عن طريق اي وسيط او شركه استضافه .. لان اي دومين له تصنيف سعري ويرتفع مع كثره الزوار انت احجز الدومين بنفسك لمده عشر سنوات عشان ما يتم اقتناصه عليك ويفضل تحجز نفس الاسم علي كل الامتدادات عشان محد ينفاسك وكذلك لا تنسي تحجز اسماء حكوميه المنتهيه برمز الدوله مثل sa للسعوديه ae للامارات وغيرها مجالي التسويق الاليكتروني وهذا تخصصي وعندي خبره كافيه بالامور التقنيه للمواقع الله يوفقكم |
الله يعطيكم العافية جميعا ... ماقصرتوا استفدت من ارائكم وافكاركم وملاحظاتكم ودونتها عندي
وانتظر المزيد من الافكار والاقتراحات عموما وفيما يتعلق في شركات الشحن وطرق الدفع والبنوك الالكترونية |
ولازم فيه طريقه تضمن مصداقية التاجر والبضاعه المباعه أو على الأقل ضمانات عليها
|
اقتباس:
انا هذي النقطة اللي احتاج لافكار فيها لان تقريبا حذف العضوية وحظر الاي بي هو الحل بعد التقييم السلبي باستمرار او شكوى موثقة |
بجد فكرة ممتازة جدا
صحيح لازم يكونوا التجار ثقة بحيث العميل يكون في راحة وهو يتعامل مع الموقع موفقه |
اقتباس:
|
اقتباس:
|
-
مساء الخير فكرته تراودني من فترة و خصوصا الشهرين الماضية و هي مما لا شك راح تسوي نقلة نوعية للتجارة الالكترونية في السعودية و انا عندي دراسة جدوى كاملة اول عقبة راح تواجهكك شركات الشحن ، انت لازم تأسس شركة الشحن الخاصة فيكك بصراحة جميع شركات الشحن عندها غير اعتمادية و ماتقدر تعتمد عليها لانها راح تورطك في مرات كثير ثاني شي لازم تكون لك شروطك الخاصة في الباعه لانه كل من هب ودب بيجي عندك و النصابين الحين كثير و راح يأثروا على سمعة الموقع و ثالث شيء لازم يكون لك رؤية واضحه بالنسبة للموقع يعني انا الحين بسوي كذا بعد شهرين في المرحلة الثانية بسوي كذا و بعدين بسوي كذا يعني لازم ترسم خطة عمل و تمشي عليها و الله يوفقك |
اقتباس:
اما بخصوص شركات الشحن صعب اني اسس شركة لان يبيها ميزانية ضخمة جدا اما الشركة اللي اتفقت معها احس سعرها مبدئيا زين اما الرؤيا المستقبلية فأن شاء الله موجودة |
فكرة جداً روعة وايضاً تساعد التجار على الانتشار
يعطيك العافيه ويارب يوفقك بالنسبه لـ تجار وطريقة الثقه اعملوا مثل امازون عن طريق التقيم والنجوم وب كذا التاجر راح يخاف على سمعته وايضاً العميل يكون واثق لمى يشوف تقيم المتجر عالي ويكون التقيم حصري على المسجلين او يكون مثل رابط تقيم يرسل من الموقع لـ العميل اذا شرى شي من التاجر |
شركات الشحن لاتهتم بالأقل سعر . اهم شي الخدمة والالتزام
موقع سوق كوم مثلا ارامكس عليها شكاوي كثير في التأخير لكن ميزة الدفع عند الاستلام تخفف من غضب المشتري احيانا توصل السلعه او الطلب الى العميل تالف او فيه عيب او مايكون مثل الصورة اللي بالموقع كيف ممكن تحل هذه المشكلة ؟ سجل المشاكل المحتمله وضع لكل مشكلة حل او مجموعة حلول انا اشوف ان السماح بمعاينة الطلب عند الاستلام يعتبر ضمان قوي لو عجبه يدفع تكلفته ولو ماعجبه مايتم عملية الشراء لكن عليه يدفع تكلفة التوصيل وغرامه ماليه يحددها الموقع |
اقتباس:
بالعكس اختي استقطاب التجار والتاجرات صعب لأن هم اصلا فاهمين اني منافس لهم ماهم مقتنعين ان فكرة السوق هي لجمع التجار تحت سقف واحد وكل تاجر يعرض بضاعته للمشترين اذا قدرت اقنعهم بالهدف من الموقع ممكن تسهل عملية الاستقطاب لكن تبقى عمليه الاشهار صعبه لان المنافسين مستحوذين على الاعلانات ولكن كل عقده ولها حل وان شاء الله تنحل بأفكاركم ومقترحاتكم |
اقتباس:
بما ان الفلوس راح تكون عندي اعتقد الحل الانسب اني ارجع الفلوس للمشتري وارجع البضاعة المضروبة لراعيها على حسابه |
وعليكم السلام
يعطيك العافية الفكرة ممتازة وتم طرحها كثير لكن الإمكانيات المتوفرة لدينا ضعيفة لدعم مثل هذه الفكرة عموماً أنا ممكن أساعدك وأفيدك بأمور كثيرة بإذن الله بحكم خبرتي الطويلة في التجارة الإلكترونية لدي سؤال مهم: ما هو هدفك من هذا المشروع؟ وإلى أي مدى يمكنك تحمل أعباءه المالية؟ أنا أعمل حالياً مع مبرمج باكستاني حاصل على ماجستير من كندا ويعمل في قطاع عسكري سعودي وهو رجل متدين ومتواضع ولا يطمع بالمال وتعرفت به عن طريق مديره في العمل وهو يصمم لي حالياً موقعي الشخصي الذي أنوي افتتاحه كبداية لمشروع تجارة إلكترونية واستخرجت سجلت تجاري لهذه الفكرة يمكن أن نستفيد منه بشكل أو بآخر ولكن يهمني معرفة هدفك وتوجهك إلى أين تريد أن تصل بهذه الفكرة |
السلام عليكم .. مدري هل الفكرة انذكرت او لا ... انه تعملو حجز للمبلغ يعني المشتري يرسل المبلغ لكم .. وبعدين البايع يرسل البضاعة للزبون .. اذا وصلت واتأكد من سلامتها .... يرسل المبلغ للبائع .... وزي كذا D:
والله أعلم هي انذكرت الفكرة ولا لا ,,, وبالتوفيق ... |
اقتباس:
|
طرحت فكرتك على تاجر حبيت اعرف نظرته قالي النستغرام احسن لي من الموقع ... حتى المبلغ راح يتحول بحسابي ع طول وارسل البضاعه للزبون والشحن 15 ريال بالبريد السعودي .......... يمكن ردي يزعجك بس حبيت انقلك بعض افكار التجار ....... بس هذي الحقيقه التجار والتاجرات عندهم حسابات بالنستغرام وصعبه استقطابهم لموقع ..... همسه زمان كنت افكر بموقع عقاري بحكم شغلي بالعقار قبل ابداء صرت اسمع بالنستغرام بحثت وفتحت حساب مجاناً ..... مشروعك وفكرتك ممتازه بس اكبر مشكله راح تواجها. .........( النستغرام ) .......... بالتوفيق
|
ليش ماتخليه تطبيق لاجهزة اندرويد وابل وتخلي الموقع فقط مرجعيه للتطبيق وبامكانك تخليه متاح للتصفح عبر الكمبيوترات
الاغلبيه العظمى الان مايستخدمون اللاب توبات وكل شغلهم على الاجهزة الذكيه وتصفح المواقع من الاجهزة الذكيه لك عليه شوي ويطلع ملخبط ويسد النفس بدل ماتحط 25 ألف في السكربت بامكانك باقل من هذا المبلغ برمجة تطبيق للاندرويد وابل مثلا تقدر تخليه مشابه بتطبيق سوق بلاي بدل من التحميل شراء حتى تكون سهل للاستخدام والاغلبيه يعرف يستخدمه وايضا مثل ماذكر الاخ نص عين خلك انت المسؤول عن التحويلات مثل سوق كوم حتى تتجنب النصب لكن اذا ببتبع الاسلوب اللي ذكرته وهو حظر الايبي وطرد ماينفع هذا اسلوب منتديات وراح وقته وبامكان اي شخص تخطيه وراح يكثر النصب في متجرك ويمكن ترفع عليك قضايا بسببه ايضا المتجر خله رسمي وتكون له مؤسسه انت منافسينك سوق كوم بالدرجه الاولى والافضل انك تركز على عيوبه وتخليها ميزتك في المتجر قوتك حطها كلها في التسويق التسويق التسويق التسويق التسويق استخدم كله وسائل التسويق الممكنه والغير ممكنه هو العائق الوحيد اللي راح يواجهك ان تجاوزته ابشر بنجاح باهر في البدايه ركز على التجار والتاجرات اللي مايعرفون يصرفون بضايعهم وجالسه عنهم وخلهم يبعون لك المحتوى ويضيفون بضايعهم في المتجر بعد ماتعبي محتوى ممتاز ابدا في مرحلة التسويق حتى لما شخص يدخل متجر يجد محتوى امامه والافضل تسويق المتحوى مع المتجر تحتاج جهد جبار وفريق عمل معك يساعدك لانك لوحدك مستحيل تقوم بجميع الادوار تحتاج مسوقين وتحتاج اشخاص لخدمة العملاء واستفساراتهم وتحتاج شخص يدير المتجر والافضل يكون انت وتحتاج مبرمجين في حال حصل اخطاء في سيرفر الموقع يحلونها لك اتمنى لك التوفيق لكن تحتاج ترسم كل خطواتك تصاعديا قبل ان تبدأ وتمشي على هذي الخطوات ولا تتجاوز خطوه قبل ان تنجهزها |
الفكره جدا ممتازه وسبآقة
ومن ناحية التجار والتاجرات مشاء الله كثير واكيد ان الفكره بتنجح ان شاء الله ربي يوفقك |
اقتباس:
|
.
من خلال تسوقي الشخصي من الانترنت لي ملاحظات على الاسواق الالكترونية : الايجابيات : تنوع البضائع الغزيز جدا في الصنف الواحد . تعدد الصور للقطعة الواحدة. تفاوت مستويات الأسعار. تحديد مستوى الجودة للسلعة ( من البائع احيانا، خاصة في البيع بالجملة - وهذا نادر في المواقع العربية بل بعضها تمارس الغش وتحسن الصور ببرامج ، ومن المواقع السيئة في هذا موقع سكر- ، ومن المتسوقين أحيانا أخرى). الوصف التام والدقيق للسلعة مثلا الملابس: الطول بالسنتيمتر للجذع والكم والرجل ودرجة اللون وهكذا. توحيد الوصف للأنواع عند كل البائعين مثلا "شيرت" تجدها خاصة لهذا النوع من الملابس لدى كل البائعين في الموقع ، وفي موقع آخر تجد كل بائع يطلق عليها وصف بعضهم شيرت وبعضهم بلوزة وهكذا. سرعة التحديث للموقع ( أي قطعة انتهت يتم التنويه لذلك فورا وهذا مهم جدا ونادر في الاسواق العربية) التجديد المتتابع للبضائع فلا ترى بضائع كما الأسواق التي يعلوها الغبار ( خاصة في المواسم : موضة الربيع ، والصيف إلخ ) الجدية في العروض فلا مجال لجس نبض مشتري مطلقا. توفر تخفيضات خاصة في بضائع الموسم المنصرم أو الحديثة في بدء طرحها ( هذا غير الاستفادة من تصريف البضائع يفيد في الإيحاء بأن السوق متجدد ونشط). توفر الشحن السريع، والمجاني أحيانا. سهولة الوصول للموقع وسهولة التسجيل والدخول فيه وسهولة الوصول للقطعة. وجود وسائل تواصل بين البائع والمشتري عبر الموقع كالدردشة والبريد الالكتروني. سرعة التفاعل مع المتسوق بالرد على استفساراته إما بالعمل بنظام الشفتات لموظفين أو تحديد وقت دخول البائع حسب التوقيت العالمي وتوضيحه في أيقونة خاصة بذلك في رأس الصفحة الخاصة به. تقبل وتحمل تعامل المتسوقين وتفهم قلقهم ( الزبون على حق وإن كان على خطأ قاعدة تجارية معروفة). إرسال القطعة المختارة وإن حدث خطأ ونفذت يتم الاعتذار من المتسوق وإعادة المبلغ المستحق له بدلا من إرسال قطعة شبيهة لم يطلبها ( تحدث من بعضهم ونحظر الشراء منه مستقبلا) إلا في حالة تم تخييره بقطعة بديلة يختارها. تزويد المتسوق ببوليصة الشحن ليتمكن من المتابعة. توفر عدة لغات مناسبة خاصة لغة المتسوق المستهدف. سرعة السيرفرات ( البعض يظن أن هذا راجع لسرعة الانترنت لدى المتسوق وهذا صحيح أحيانا لكنه أحيانا أخرى من سوء السيرفرات وعدم قدرتها على تحمل الضغط خاصة بعض المواقع الصينية) أما السلبيات فهي توفر الضد لكل ما ذكر أعلاه. هذا ما عندي حاليا وعذرا للإطالة رغبت في الإفادة وآمل أن يكون سوق عربي يرقى للطموحات |
المشروع هذا فكرت فيه كثير وفيه عقبات كثيره ممكن تواجهك واذكر طرحت الفكرة على اكثر من واحد لان ابي شريك يكون معي لكن مرت الايام ونسينا الموضوع وبحكم اني خريج هندسة حاسب الي لازالت الفكرة متعلقه بذهني وعندي افكار كثيرة للمشروع هذا وانا ابي شريك جاد معي واذا ودك بالشراكه انا ماعندي مانع. والله يوفقك يارب بكل خطوة
|
فكرم رائعه
الله يوفقك |
اقتباس:
ان شاء الله راح تكون من الاولويات وشكرا لك على المشاركة |
اقتباس:
|
ما شاء الله مشروع ناجح ان شاء الله
انا سويت متجر ولكن كانت المشكلة ان السكربت مجاني فكانت الاشياء محدودة ركز على الاستضافة لان اغلب الاستضافات العربية تقدر تقول تعبانة واذا في استضافة جيدة 100% السيرفرات خارج المملكة بالنسبة للسكربت ممتاز واي سؤال حاضر لو تبغى متطوعين انا موجود بما ان تخصصي حاسب بالتوفيق لك |
اقتباس:
تسلم اخوي مبرمج جافا متوسط .. جعلك ذخر وان شاء الله اذا احتجتك راح اتواصل معك على طول |
نصيحة نصيحة الموضوع بيكلف لك شيء كبير الدعم المادي لازم منه ..
الافضل تخلي رسوم سنوية 200 ريال من كل بائع عندك بالموقع |
| الساعة الآن 11:05 PM |
Powered by vBulletin Version 3.8.9
Copyright ©2000 - 2024, Jelsoft Enterprises Ltd
جميع الحقوق محفوظة لحلول البطالة
استضافة، تصميم مواقع، برمجة تطبيقات، من توب لاين